რატომ შემცირდა თხილის ფასი გურიაში
როგორი იქნება მიმდინარე წლის სეზონზე ქართული თხილის ფასი - ამის პროგნოზირება თხილის ექსპორტიორ კომპანიებს უჭირთ. მოსავლის შემოსვლის დღემდე თხილის შესასყიდი ფასი გურიაში რამდენჯერმე მკვეთრად შეიცვალა. თხილით ვაჭრობა ადგილობრივ ბაზარზე თავდაპირველად კილოგრამზე 6 ლარიდან დაიწყო, მალევე 3 ლარზე ჩამოვიდა. ხოლო ახლა ბერძულას სახეობის თხილი 4 ლარი და 50 თეთრი ღირს, გულშიშველას ფასი კი ოზურგეთის თხილის მიმღებ პუნქტებში 4 ლარია.
გლეხებს თხილზე ფასების მკვეთრი ვარდნა საეჭვოდ მიაჩნიათ და ექსპორტიორი კომპანიების მხრიდან კარტელურ გარიგებაზე საუბრობენ, ანუ თხილის ექპორტიორები ერთმანეთში თანხმდებიან მოსახლეობისგან თხილის შესასყიდ ფასზე და მას ხელოვნურად აგდებენ.
"მაფია ჩაერთო ბიზნესში და დააგდეს ფასი, აბა 6 ლარი თუ ღირდა ორი კვირის წინ, 4 ლარზე რატომ ჩამოვიდა ფასი?! გლეხის ნაშრომზე ესენი მილიონებს მოიგებენ, ეს ასე იყო ყოველთვის", - აცხადებენ ადგილობრივები.
როგორც გურულები ამბობენ, დაბალი ფასი თხილზე დაახლოებით ორი კვირის განმავლობაში შენარჩუნდა. გლეხები ამბობენ, რომ ასეთი რამ სეზონზე ხშირად ხდება. ადგილობრივები აცხადებენ, რომ მოსავალი ჯერ სრულად არ აუღიათ. ახლა სწორედ ის დროა, როცა მოსახლეობისგან თხილის შეძენა ყველაზე აქტიურად მიმდინარეობს. გლეხები შიშობენ, რომ მაღალი საბაზრო ფასი თხილზე დიდი ხნის განმავლობაში არ შენარჩუნდება და შესაძლოა, ის რამდენიმე კომპანიამ თავის ინტერესებს მოარგოს.
"6 ლარი ღირდა და უცებ დაუგეს ფასი. თხილი ბევრი გვაქვს და ვინაიდან მუშახელის დაქირავების საშუალება არა გვაქვს, ოჯახის წევრები დამოუკიდებლად ვაგროვებთ მოსავალს. წელს ძალიან კარგი მოსავალი მოვიდა, მაგრამ მზემ მოხალა და ფუჭდება. ვისაც უჭირს, მაინც ყიდის თხილს დაბალ ფასად, ვისაც არა და ფასის აწევას ელოდება", - აცხადებენ ადგილობრივები.
წელს საქართველოში 60-80%-ით მეტ თხილის მოსავალს ელოდებიან, ვიდრე გასულ წელს. როგორც თხილის ექსპორტიორთა კავშირის აღმასრულებელი დირექტორი, მიშა ხომერიკი აცხადებს, წელს საქართველოში შარშანდელთან შედარებით საკმაოდ კარგი მოსავალი იქნება. ხომერიკის თქმით, ამ დროისათვის საექსპორტო თხილის საბოლოო ფასი დადგენილი არ არის, რადგანაც ფასის ფორმირება ახლა მიმდინარეობს.
როგორც ცნობილია, თხილის ფასს თურქეთის ბაზარი განსაზღვრავს და სწორედ თურქეთზეა დამოკიდებული, თუ რა ეღირება თხილი საერთაშორისო ბაზარზე.
იმერეთის გუბერნატორის ხელფასი გაორმაგდა
ორი ობლისა და ორი ბებიას შემზარავი გასაჭირი გურიაში
