2
აპრილიდღის ზოგადი ასტროლოგიური პროგნოზი
კომპანია "აირზენამ" მოსკოვის მიმართულებით ფრენები შეწყვიტა. კომპანიის ხელმძღვანელობა ავიაკომპანიებთან ერთად თანაბარ პირობებში ჩაყენებას ითხოვს.
ავიაკომპანიის წარმომადგენლები გუშინ ავიაციის სააგენტოს ხელმძღვანელობას შეხვდნენ და საკუთარი მოთხოვნები გააცნეს.
"ავიაკომპანია "ჯორჯიან ეარვეისი" ყოველდღიურად განიცდის სერიოზულ ფინანსურ ზარალს. შესაბამისად, პარიტეტის პრინციპის დარღვევა სასტიკად ეწინააღმდეგება იმ მოთხოვნებს, რაც გააჩნია ავიაკომპანიას აღნიშნულ ფრენებთან მიმართებაში", - განაცხადა "აირზენას" გენერალურმა დირექტორმა იასე ზაუტაშვილმა.
კომპანიის გენერალური დირექტორის თქმით, საქართველოში შემოჰყავთ 13 რუსული ავიაკომპანია, რითაც ქართულ ავიაკომპანიას "აირზენას" ძალიან დიდი საფრთხე ადგება.ავიკომპანიის წარმომადგენლები ითხოვენ, გაუქმდეს რუსეთის ფედერაციაში გაგზავნილი 8 ივლისის ნოტა, რომლითაც რუსეთის ავიაკომპანიებს მიენიჭათ შეუზღუდავი უფლება თბილისი-მოსკოვი-თბილისი მიმართულებით ფრენებზე.
შეხვედრა, რომელიც ავიაციის სააგენეტოს ხელმძღვანელობასა და კომპანიის წარმომადგენლებს შორის შედგა, საკმაოდ ხმაურიანად წარიმართა. მხარეები ერთმანეთს სიტყვიერ შეურაცხყოფას აყენებდნენ. "აირზენას" დირექტორმა იასე ზაუტაშვილმა ავიაციის სააგენტოს უფროსს, გურამ ჯალაღონიას დაჭმუჭნული ფურცელი ესროლა, რის შემდეგაც გურამ ჯალაღონიამ "ჯორჯიან ეარვეისის" გენერალურ დირექტორს შეხვედრის დატოვება მოსთხოვა.
"შოუს დგამთ თუ რა არის!", - მიმართა გურამ ჯალაღონიამ იასე ზაუტაშვილს, რაზეც ზაუტაშვილმა მიუგო, რომ ჯალაღონიას სასწრაფოდ უნდა გაეგზავნა რუსეთისთვის ტელეგრამა და ყველაფერი საწყის მდგომარეობაში დაებრუნებინა, თორემ ავიაკომპანიის წარმომადგენლები პროტესტს არ შეწყვეტდნენ.
ავიაკომპანიის თანამშრომლებმა ავიაციის სააგენტოს უფროსის, გურამ ჯალაღონიას დაკავებული თანამდებობიდან გადაყენებაც მოითხოვეს.
"აირზენას" საკითხს გუშინ ეკონომიკის მინისტრი გიორგი კვირკაშვილიც გამოეხმაურა და აღნიშნა, რომ არის ორი მხარე: კომპანიის ინტერესები და ტურისტები, ჩვენ უნდა დავიცვათ ბალანსი ამ ორ მხარეს შორის.
მისი თქმით, ტურიზმის შემცირების ხარჯზე კერძო კომპანიების დახმარება არ მოხდება.
"აირზენას საკითხში არის ორი მხარე. ერთი მხარე არის კომპანიის ინტერესები და მეორე მხარე არის მომხმარებელი, ანუ ტურისტები, რომელშიც იგულისხმება საქართველოს მოქალაქეები და სხვა ქვეყნის მოქალაქეები. მოლაპარაკებებში ვართ რუსულ მხარესთან. დიპლომატიური ურთიერთობების არარსებობის გამო ეს მოლაპარაკებები ტექნიკურ დონეზე მიმდინარეობს. ჩვენ უნდა დავიცვათ ბალანსი ამ ორ მხარეს შორის. ჩემთვის აბსოლუტურად გაუგებარია სპეკულაციები, რადგან მოლაპარაკებები არ დაგვისრულებია და ვფიქრობ, ცალკეული ადამიანები ძაბავენ ამ სიტუაციას. ტურიზმის შემცირების ხარჯზე ჩვენ კერძო კომპანიების დახმარებას ვერ მოვახდენთ. ჩემთვის ამ ადამიანების გულისტკივილი გასაგებია, მაგრამ ეს პრობლემა არის ძალიან მრავალწახნაგოვანი", - განაცხადა გიორგი კვირიკაშვილმა.
"აირზენას" თანამშრომლებმა დღეს საპროტესტო აქცია თბილისის საერთაშორისო აეროპორტთან გამართეს და მათი მოთხოვნების დაკმაყოფილება კიდევ ერთხელ მოითხოვეს. ავიაკომპანიის პროტესტს რამდენიმე ქართული ტურისტული კომპანიაც შეუერთდა.
როგორც ტურისტული კომპანია "ოლ ტურსის" დამფუძნებელმა, მაია მჭედლიძემ განაცხადა, ისინი სოლიდარულები არიან იმ მოთხოვნების მიმართ, რაც "აირზენას" აქვს.
მისივე თქმით, ქართული ტურისტული კომპანიები მძიმე მდგომარეობაში არიან, რადგან არ არსებობს რეგულაციები, რომლებიც უცხოურ ტურისტულ კომპანიებთან კონკურენციის გაწევის საშუალებას იძლევა.
"აირზენას" აქციას ასევე შეუერთდნენ საავიაციო სტუდენტების ნაწილიც.
კომპანიის წარმომადგენლები საპროტესტო აქციის გამართვას, ხვალ მთავრობის ადმინისტრაციის შენობასთან აპირებენ. ასევე კომპანიის წარმომადგენლების განცხადებით, თუ მათი მოთხოვნები არ დაკმაყოფილდა, ისინი ხვალ საღამოს თბილისის საერთაშორისო აეროპორტის პარალიზებას მოახდენენ.
დააკმაყოფილებენ თუ არა ავიაკომპანიის წარმომადგენლების მოთხოვნებს, ჯერჯერობით უცნობია.
თეა ბითაძე
AMBEBI.GE
