14
აპრილიდღის ზოგადი ასტროლოგიური პროგნოზი
"პრეზიდენტს კიდევ ერთი უფლებამოსილება შეეზღუდა, ოღონდ ახლა უკვე განათლების სფეროდან. ერთი შეხედვით არცთუ მნიშვნელოვანი - სტუდენტური ფასდაკლების გამოყენების წესის, საერთაშორისო სასწავლო ოლიმპიადაში მონაწილის უმაღლეს დაწესებულებაში სწავლისა და დაფინანსების პირობების განსაზღვრა პრეზიდენტის პრეროგატივა აღარ იქნება. თუ პარლამენტმა შესაბამისი კანონპროექტი მიიღო, მისი უფლებამოსილება განათლების სამინისტროსა და მთავრობაზე გადანაწილდება. ამ ყველაფერში ყველაზე საინტერესო ისაა, რომ იდეის ავტორი განათლების სამინისტროა, რომელსაც "მარგველაშვილის კადრი" - მისი ყოფილი მოადგილე თამარ სანიკიძე ხელმძღვანელობს", - წერს გაზეთი "რეზონანსი" სტატიაში სათაურით სანამ პრეზიდენტი უელსში იყო... / მარგველაშვილს კიდევ რამდენიმე უფლება ჩამოართვეს.
"აქამდე ეს საკითხები პრეზიდენტის ბრძანებულებებით რეგულირდებოდა, თუმცა, პარლამენტს "უმაღლესი განათლების შესახებ" კანონში დაგეგმილი ცვლილებები უკვე წარედგინა და მის მიხედვით, სტუდენტის პირადობის მოწმობით ფასდაკლების გამოყენების წესის დამტკიცების უფლებამოსილება მთავრობას ენიჭება, ხოლო საერთაშორისო სასწავლო ოლიმპიადაში მონაწილე საქართველოს ნაკრები გუნდის წევრის უმაღლეს საგანმანათლებლო დაწესეულებაში ჩარიცხვის და დაფინანსების საკითხებს განათლებისა და მეცნიერების სამინისტრო განსაზღვრავს", - აღნიშნავს გამოცემა.
"ცვლილებებს ბუნებრივად მიიჩნევს განათლების ყოფილი მინისტრის ყოფილი მოადგილე დავით ზურაბიშვილი და ამბობს, რომ ამ საკითხებში პრეზიდენტის როლი ისედაც ფორმალური იყო - მხოლოდ ხელის მოწერის დონეზე და რომ რეალურად ის სამუშაო პროცესში არანაირი ფორმით არ ერთვებოდა. შესაბამისად, ამ ფორმალური წვლილის გაუქმებას იგი უფლებამოსილების შეზღუდვად არ აღიქვამს. "სტუდენტური ფასდაკლებების გამოყენების წესის განსაზღვრასთან პრეზიდენტს არც აქამდე ჰქონია საერთო, ის უბრალოდ ხელს აწერდა. ყველაფერი სამინისტროში მზადდებოდა. ასე რომ, მისი მონაწილეობა ფორმალური იყო, რეალურად კი არც პრეზიდენტის ადმინისტრაციაში და არც აპარატში ეს საკითხი არ განიხილებოდა. ასე რომ, საუბარი, თითქოს პრეზიდენტს რაიმე უფლებამოსილება შეეზღუდა, არასწორია", - მიიჩნევს ზურაბიშვილი.
"იმაზე, თუ რაში დასჭირდა განათლების სამინისტროს არსებულ კანონში ცვლილებების შეტანა, რაც მარგველაშვილს თუნდაც ამ "ფორმალური" პროცესიდან გამოთიშავდა, "რეზონანსს" პოლიტოლოგი და განათლების მინისტრის მრჩეველი რამაზ საყვარელიძე ესაუბრა. "გიორგი მარგველაშვილსაც ვიცნობ, ქალბატონ სანიკიძესაც. შემიძლია ვთქვა, რომ ქალბატონ თამარს მარგველაშვილისადმი ძალიან პოზიტიური დამოკიდებულება აქვს და უდიდესი პატივისცემითაა განმსჭვალული. მას ნამდვილად არაფერში ეტყობა იმის სურვილი, რომ პრეზიდენტის საწინააღმდეგოდ მავნე ნაბიჯი გადადგას. ასე რომ, მეეჭვება, ამ ცვლილების მოტივი ეს იყოს. რაც შეეხება იმას, თუ რატომ ხდება ასეთი ცვლილებები, ბევრ რამეს ინსტიტუციას დავაბრალებდი, იმიტომ, რომ იგი ცუდი ხარისხისაა. ფუნქციები არაა მკაფიოდ გაყოფილი. როცა საპრეზიდენტო რესპუბლია ვიყავით, ყველაფერს პრეზიდენტი წყვეტდა. ახლა ნახევრად საპარლამენტო რესპუბლიკა ვართ და ეს უკვე არეულობის წყაროა", - აღნიშნავს რამაზ საყვარელიძე.
"საპარლამენტო რესპუბლიკისკენ წასვლა იმას ნიშნავს, რომ პრეზიდენტს რჩება მხოლოდ ის ფუნქციები, რაც ინგლისში, კონსტიტუციურ მონარქიაში მონარქს აქვს. ანუ, ხელისუფლებაში დაპირისპირების შემთხვევაში პროცესში ჩართვა და დარეგულირება. სხვა ყველაფერი აღმასრულებელი ხელისუფლების ხელში გადადის. ასეთია იმ მიმართულების ლოგიკა, საითაც ჩვენი კონსტიტუციონალიზმი მიდის. სწორად მიგვაჩნია ჩვენ ეს თუ არა, სხვა თემაა. მკაფიო კონსტიტუციური განაცხადი უნდა გაკეთდეს, რომ ჩვენ ამ მიმართულებით მივდივართ და ცვლილებები აქედან გამომდინარეობს. ეს გაუგებრობებს მოხსნიდა. როცა არც განაცხადი კეთდება და პროცესები ნელ-ნელა მიმდინარეობს, ეს ეჭვებს იწვევს და ტოვებს შთაბეჭილებას, რომ ამის უკან რაღაც დგას", - დასძენს პოლიტოლოგი.
