"სატელეფონო კომპანიები არ ადასტურებენ, რომ დღეს მიმდინარეობს მოსმენები"

სატელეფონო კომპანიები არ ადასტურებენ, რომ დღეს მიმდინარეობს მოსმენები, - ამის შესახებ საპარლამენტო უმრავლესობის წევრმა თინა ხიდაშელმა განაცხადა.

დეპუტატმა მოსმენებთან დაკავშირებით განცხადება ტელეკომპანია "იმედის" ეთერში, გადაცემა "რეაქციაში" გააკეთა, სადაც ოპოზიციის წარმომადგენლებმა ხელისუფლება უკანონო მოსმენებში დაადანაშაულეს.

"სატელეფონო კომპანიები არ ადასტურებენ, რომ დღეს მიმდინარეობს მოსმენები. სატელეფონო კომპანიები ადასტურებენ იმას, რომ ის არხი, რომელიც წინა ხელისუფლების მიერ მიღებული კანონით გაიხსნა, ისევ გახსნილია და პოტენციალი, რომ ერთდროულად 21 ათას აბონენტს უსმენდნენ, ისევ არსებობს", - აღნიშნა ხიდაშელმა.

"ნაციონალური მოძრაობის" წევრმა მიხეილ მაჭავარიანმა კი ხიდაშელს სატელეფონო მოსმენასთან დაკავშირებით გოგა ხაჩიძისა და ზურაბ ჯაფარიძის ექსპერიმენტი შეახსენა, რასაც თინა ხიდაშელმა არასერიოზული უწოდა. როგორც უმრავლესობის წევრმა აღნიშნა, დაცვა პრემიერის სახლთან ახლაც კი დგას.

ამასთან, ხიდაშელმა პირობა დადო, რომ პარლამენტი მოსმენებთან დაკავშირებით კანონპროექტს მიიღებს, თუმცა ოპოზიცია დარწმუნებულია, რომ უმრავლესობა ამ ცვლილებებს ვერ მიიღებს.

"ინტერპრესნიუსი"