რატომ იხურება "ლაგუნა ვერე" - "თუ პანჩურს ამოგვარტყამენ, ივანიშვილთან მივალთ ან 400 შეზლონგზე დავწვებით"

"ლაგუნა ვერე" თბილისელებისთვის ყველაზე ხელმისაწვდომი გამაჯანსაღებელი კომპლექსია, რომლის მსგავსიც კავკასიაში არ არის. ერთ დროს, აქ წყალბურთელთა შეჯიბრებები, ევროპის ჩემპიონატები ტარდებოდა, იყო დრო, გრანდიოზული და პრესტიჟული კონცერტებიც იმართებოდა სინქრონული ცურვის თანხლებით, დღეს კი, გავრცელებული ინფორმაციით, ობიექტს დახურვა ემუქრება.

ოფიციალური ვერსიით, "ლაგუნა ვერე" იმის გამო იხურება, რომ გაზრდილი გადასახადები მას არარენტაბელურს ხდის და ობიექტი წამგებიანი გახდა, თუმცა კულუარებში სხვა ინფორმაცია ვრცელდება - ამბობენ, "ლაგუნა ვერე" 2007 წელს მფლობელებს ინვესტორისთვის მიუყიდიათ, რომელიც ახლა სპორტული კომპლექსისთვის პროფილის შეცვლას აპირებსო. ამ ისტორიის ყველაზე უარყოფითი მხარე კი ისაა, რომ უმუშევარი რჩება ათეულობით ადამიანი, დაიხურება ცურვის შემსწავლელი ჯგუფები, თბილისელები კი ზაფხულის ხვატში ერთ-ერთი საყვარელი ადგილის გარეშე რჩებიან. "ვერსია" ინფორმაციის გადასამოწმებლად "ლაგუნა ვერეს" ეწვია. შეშფოთებული მომსახურე პერსონალი საჯარო საუბარს არ მოერიდა:

- ხელმძღვანელობა 20 იანვრიდან გვატყუებდა, 1 კვირაც და გაიხსნებაო, დღეს კი "ქართუ ჯგუფიდან" ახალი დირექტორი, დავით ჩხეტიანი მოვიდა და გამოგვიცხადა, ხვალ შეგიძლიათ სამსახურში აღარ გამოხვიდეთო. თითქოს 2 თვით გვითხოვენ, მაგრამ ტყუილია - 110 კაცი ვრჩებით უმუშევარი, თანაც გაგვაფრთხილეს, არ გავაპროტესტოთ, რადგან კანონი ჩვენს მხარეს არ არის და თურმე, კონტრაქტი იანვარში შეგვიწყდა. შეკითხვაზე – თუ ასეა, მაშინ რატომ გვალოდინეთ, იქნებ ამ ხნის განმავლობაში სხვა სამუშაო გვეპოვაო, გვიპასუხეს ამ გაუგებრობისთვის ბოდიშს გიხდითო.

- ამბობენ, რომ ტერიტორიაზე სავაჭრო ცენტრის გაკეთებას აპირებენ, ზოგი აცხადებს, საცხოვრებელი კომპლექსის გაშენება უნდათო...

- მსგავსი ინფორმაცია არ გვაქვს. ისე, აქ საცხოვრებელი უბანი ვერ გაშენდება იმიტომ, რომ ქვეშ მდინარე ვერე გადის. ისევ საცურაო კომპლექსი გაკეთდება, ტურბაზა ან რამე მსგავსი... თუ არა და, დაინგრევა და იქნება ცარიელი ადგილი. მთელი ქალაქი ფეხზე უნდა დადგეს, "ლაგუნა ვერე" თბილისს ემსახურებოდა. ამათ არაფრის შიში არა აქვთ. თუ პანჩურს ამოგვარტყამენ, ბიძინა ივანიშვილთან მივალთ ან გადავკეტავთ გზებს, 400 შეზლონგი გვაქვს, გავშლით და ზედ დავწვებით, აბა, რა ვქნათ?

- დახურვის ერთ-ერთ მიზეზად სახელდება ისიც, რომ ობიექტი წამგებიანია დანახარჯს ვერ ფარავს.

- რას ლაპარაკობთ წამგებიანი კი არა, მომგებიანია, ჩვენ როგორ უნდა მოგვატყუონ, მარტო ზაფხულის სეზონის ორი-სამი თვე ქაჩავს მთელ წელიწადს, დახურულ დარბაზებზე აღარაფერს ვამბობთ. უბრალოდ, აქაურობის დაშლა უნდათ...

"ვერსია" "ლაგუნა ვერეს" ტექნიკურ დირექტორს, დავით ბედოიძესაც ესაუბრა:

- თქვენ ბრძანდებით "ლაგუნა ვერეს" ახალი უფროსი?

- არა, მე გახლავართ ტექნიკური დირექტორი, ახალ უფროსთან გნებავთ საუბარი?

- რა თქმა უნდა, მასთანაც მინდა.

- თუ გამოგივიდათ, კი.

- რატომ, რთულია ამ ადამიანის პოვნა?

- გააჩნია, როგორ მოინდომებთ...

- ბატონო დავით, მომსახურე პერსონალი ძალიან უკმაყოფილოა.

- უკმაყოფილოები რითი არიან - რომ ვერ გავიხსენით?

- რომ ვერ გაიხსენით არა, იმიტომ რომ, დაიხურეთ.

- არ დავხურულვართ, უნდა გავხსნილიყავით 20 თებერვალს და ყინვამ შეგვიშალა ხელი, მთელი წყალგაყვანილობა გაფუჭდა, ახლა ჩავატარეთ სამუშაოები და შეიძლება, ერთ კვირაში გავხსნათ.

- აბა, დღეს რატომ გაათავისუფლეს სამსახურიდან 110 ადამიანი?

- გათავისუფლდებიან იმ შემთხვევაში, თუ კაპიტალურ რემონტზე დავდგებით. მაშინ თავისთავად ხელმძღვანელობაც დროებით უმუშევარი დარჩება. 35 წელზე მეტია აქ თითი თითზე არავი დაუდია, ყველაფერი ძალიან ძველია, ერთს გააკეთებ, მეორე ფუჭდება. თუ იქნება საშუალება, რომ გავიხსნათ და თან, ეს სარემონტო სამუშაოები ჩატარდეს, მაშინ ობიექტი იმუშავებს, მაგრამ, თუ ჩატარდება კაპიტალური რემონტი, მოგვიწევს მისი გაჩერება. არის ორი ვარიანტი, თან იმუშაო და თან აკეთო, რასაც ახლა გვინდა მივაღწიოთ, ან დაიკეტება და ერთ წელიწადში გაიხსნება. ეს, ერთი მხრივ, კარგია იმიტომ, რომ ამხელა კონკურენციის ფონზე, ძველი აუზი აღარავის უნდა, თუმცა "ლაგუნა ვერე" ბრენდია და ხალხი მაინც დადის, თანაც ამას ფასებიც ხელს უწყობს, ცუდია იმიტომ, რომ ამდენი ადამიანი უმუშევარი დარჩება.

- ეს ადამიანები ერთ წელიწადში თავიანთ ადგილებს დაუბრუნდებიან?

- შეიძლება, რემონტი 3 თვეშიც დასრულდეს, მაგრამ მერე სეზონი ჩაივლის და გახსნას აზრი აღარ ექნება... ამიტომ ვამბობ ერთ წელიწადს. ისე აქ სერიოზული რემონტი თუ ჩატარდა, გადახურვებითა და ტრიბუნებით, მაშინ, შესაძლოა, უფრო მეტი დროც დასჭირიდეს. როცა გაიხსნება, რა თქმა უნდა, დაუბრუნდებიან ძველ ადგილებს, თუ ამ დროის განმავლობაში სხვაგან არ დაკავდებიან.

- ვინ იყო ის კაცი, დილით რომ მოვიდა და პერსონალი სამსახურიდან დაითხოვა?

- ჩვენ გვაქვს კიდევ 2 დღე, თუ ამ პერიოდში ტექნიკურმა ჯგუფმა გამოსავალი ნახა, ობიექტი გაიხსნება, თუ არა – დროებით დაიხურება.

ოფიციალური განცხადებით, ობიექტი წამგებიანია, არადა, თანამშრომლები ამბობენ, რომ ეს ტყუილია და მოგებაც შემოდის.

- 12 წელია, ეს აუზი მხოლოდ თავს ინახავს, ზოგჯერ შეიძლება მიზერული მოგებაც მოიტანოს. ლაგუნას არ უნდა შეხედო, როგორც ბიზნესს, მთავარია, თავი შეინახოს. ეს ბიზნესი ამინდზეა დამოკიდებული, თუ ის 3 თვე მზიანია, ლაგუნა თავს შეინახავს, თუ არა, პატრონი უნდა გყავდეს, რომელიც ხარჯს დაფარავს. რატომ გავედით წაგებაზე? ტექნიკური მხრიდან მომიწია გამათბობლის ყიდვა, ხარჯი გამეზარდა.

- ფასი რატომ არ გაზარდეთ?

- ეს მისაღები იქნებოდა საზოგადოებისთვის? 12 წლის განმავლობაში დენისა და გაზის გაძვირების მიუხედავად, ფასი არ გაგვიზრდია, პირიქით, ქოლგა და შეზლონგებიც კი უფასოდ გვქონდა.

- როცა გარემონტდება და გაიხსნება, ძველ ფასებს დატოვებთ?

- ახალგარემონტებულში მორალური უფლება მექნება, ფასები 10-დან 15 ლარამდე გავზარდო იმიტომ, რომ ძალიან მაგარი იქნება, თუკი მართლა ახალი სახით გაიხსნა აქაურობა, ფასები მეორეხარისხოვანი იქნება. გადახურული ტრიბუნები 5 000 ადამიანს დაიტევს, ღია აუზთან გაკეთდება სცენა, ზაფხულში უკეთესი ადგილი გასართობად და კონცერტების ჩასატარებლად არ იქნება. გამოუყენებელ ტერიტორიაზე 7 000 კვადრატამდე საოფისე ფართები აშენდება. ამაზე საუბარი შარშანაც იყო, შარშანწინაც... მაგრამ მხოლოდ ლაპარაკი როდემდე უნდა გაგრძელდეს?

- ანუ "ლაგუნა ვერეს" ადგილას სავაჭრო ცენტრის ან საცხოვრებელი სახლის აშენებას გამორიცხავთ?

- აქ იმხელა ტერიტორიაა, საცხოვრებელ სახლს თავისუფლად დაიტევს და არ არის აუცილებელი, ამის გამო აუზი დაანგრიო. სავაჭრო ცენტრის აშენება სასაცილოდაც მეჩვენება, კორპუსის აშენება კი ჩემი იდეა იყო, ერთ დროს. საშუალება რომ მქონდეს, აუზის გვერდით 2000 კვადრატზე მეტი ადგილია, წარმოიდგინეთ, რა ფასად გაიყდება იქ ბინები, სადაც გვერდით ისეთი ბრენდია, როგორიც "ლაგუნა ვერეა".

- საზოგადოება და პერსონალი საცურაო კომპლექსის დახურვის გამო საპროტესტო აქციებით იმუქრება...

- მათი ნებაა... სხვათა შორის, ამას თითქოს წინასწარ ვგრძნობდი, იქნებ ეს საკითხი ერთ კვირაში ისე გადაწყდეს, კომპლექსს დახურვა არც მოუწიოს.

ბურებრივია, "ვერსია" შეეცადა, ამომწურავი ინფორმაცია იმ ადამიანებისგანაც მიეღო, ვინც თანამშრომლებს ესაუბრა. როგორც თანამშრომლებმა მიგვითითეს, "ქართუ ჯგუფს" დავუკავშირდით, თუმცა იქ გვიპასუხეს, რომ ეს თემა მათთვის სრულიად უცხოა და "ლაგუნა ვერესთან" არანაირი შეხება არ აქვთ. არადა, ალბათ, უკეთესი იქნება, თუკი ახალი მენეჯმენტი საზოგადოებას ამომწურავ ინფორმაციას მიაწვდის, რა ტიპის სარემონტო სამუშაოები იგეგმება, რადგან ამით უამრავ გაუგებრობას ავიცილებთ თავიდან და დაინტერესებულ თანამშრომლებსა თუ მოსახლეობას საქმის რეალურ ვითარებას ავუხსნით.

"ვერსიამ", დავით ბედოიძის ლექსიკით რომ ვთქვათ, მოინდომა, "ლაგუნა ვერეს" ახალ უფროსს დავით ჩხეტიანსაც დაუკავშირდა და მასთან ინტერვიუს ჩაწერაც მოახერხა:

- ბატონო დავით, "ქართუ ჯგუფი" აბმობს, რომ "ლაგუნა ვერესთან" არაფერი აკავშირებს. თქვენ რომელ კომპანიას წარმოადგენთ?

- წარმოვადგენ კომპანია "იუნიონს", რომლის დირექტორადაც 1 კვირის წინ დავინიშნე, მანამდე 7 წლის განმავლობაში ეს თანამდებობა ვეფხო ხუნძაგიშვილს ეკავა, ამასთან დაკავშირებით მეტს ვერაფერს მოგახსენებთ.

- უამრავი კითხვა ჩნდება ობიექტთან დაკავშირებით, ამას დამატებული გაბრაზებული თანამშრომლების კომენტარები...

- როცა ადამიანს საარსებო წყარო უწყდება, უარესს რომ არ ამბობს, მიკვირს. მათ აქ მცირე ანაზღაურება ჰქონდათ და ახლა იმასაც კარგავენ. მართალია, ვითვალისწინებთ კოლექტივის მდგომარეობას, მაგრამ ასეთ ავარიულ მდგომარეობაში ობიექტს ექსპლუატაციაში ვერ გავუშვებთ და საკუთარ თავზე ამ პასუხისმგებლობას მე, როგორც დირექტორი, ნამდვილად ვერ ავიღებ.

- იქნებ დააკონკრეტოთ, "ობიექტის ავარიული მდგომარეობა" რას ნიშნავს - რა მდგომარეობაშია დღეს "ლაგუნა ვერე"?

- "ლაგუნა ვერე" 1978 წელს აშენდა. პირველი 10 წელი არანაირ შეკეთებას არ საჭიროებდა, მერე დაემთხვა 90-იანი წლები, არეულობა... მაშინ სპორტისთვის არავის ეცალა. გამოდის, დღემდე თავი იმ ძველი რესურსით მოიტანა. წინათ თუ მერია და სახელმწიფოს სპორტული კომიტეტი მხარს უჭერდა მის განვითარებასა და შენარჩუნებას, ნელ-ნელა ეს პირობები შემცირდა და დღეისთვის არსებულ ტექნიკურ მდგომარეობამდე მივედით. ამას დაემატა კომუნალური ხარჯის ტარიფების ზრდა, თუ მოსახლეობას აქვს ერთი სახის ტარიფი, წარმოებისთვის იგი 50 პროცენტით მეტია. მარტო ბოლო პერიოდში წყალი 3.50-დან 4.50 ლარამდე გაიზარდა. იმისთვის, რომ არ დაირღვეს გარკვეული პარამეტრები ავზების შესავსებად, დღეში 500 ტონა წყალი გვჭირდება. წარმოიდგინეთ, ეს ამ ორგანიზაციასა და საზოგადოება "იუნიონს" რა ფასი უჯდებოდა. 26 ათასი მდინარე და ტბაა საქართველოს ტერიტორიაზე. ამით მსოფლიოს 5 ქვეყანაში შევდივართ და წყალს ამხელა ფასი ნამდვილად არ უნდა ჰქონდეს. მაგალითად, თურქეთი როცა თავად მოიპოვებს ბუნებრივ აირს, საკუთარ მოსახლეობასაც უფასოდ აძლევს. კოლექტივს რაც შეეხება, მათთან წლიდან წლამდე გრძელდებოდა ხელშეკრულებები. ბუნებრივია, 31 დეკემბერს იგი შეწყდა და უნდა განახლებულიყო, თუ ტექნიკური მდგომარეობა ამის საშუალებას მოგვცემდა. ტრადიციულად, იანვარში, არდადეგების დროს, ფილტრების გაწმენდა-დამუშავება-აღდგენის პროფილაქტიკური ღონისძიებები ტარდებოდა, რის შედეგადაც, წელს დადგინდა - ეს ტექნიკა იმდენად ამორტიზირებულია და მილები ისეა მწყობრიდან გამოსული, ფაქტობრივად, ერთი ხელის შეხებითაც შეიძლება ავზები წყლისგან დაიცალოს. თვითონ აუზებიც მხოლოდ იმიტომ არ ინგრევა, რომ თავიდანვე ძალიან დიდი რესურსია ჩადებული. თანაც კლდეზე დგას, თორემ დანარჩენი ტერიტორია დაჭაობებულია.

- ვითარების გამოსასწორებლად, კონკრეტულად, რა სამუშაოებია ჩასატარებელი?

- ძველი ტექნიკა თანამედროვე, გაცილებით გამძლე პლასტმასის წყალგაყვანილობით უნდა შეიცვალოს. წყალსადენის ტექნიკური მუშაკები ექსპერტიზას ჩაუტარებენ მთელ კომუნიკაციას; მერე გაკეთდება გარკვეული პროექტი ან ხარჯთაღრიცხვა, რა მოცულობის სამუშაოები იქნება ჩასატარებელი. უნდა გამოვძებნოთ როგორც წყლის, ასევე ელექტროენერგიის მოპოვების ალტერნატიული საშუალებები. გვინდა მზის ენერგიის გამოსაყენებლად შესაბამისი დანადგარების შეძენა, ასევე გავაკეთეთ "ლაგუნა ვერეს" ტერიტორიაზე 15 წლის წინ გათხრილი ჭაბურღილის რევიზიაც. მოპოვებული წყალი წავიღეთ ლაბორატორიაში, რათა დადგინდეს ვარგისიანობა. რაც უფრო ბინძურია, მისი გაწმენდა მეტ ხარჯთანაა დაკავშირებული. ჭაბურღილიდან ალტერნატიული წყლის მოპოვება, 1000-ჯერ შეგვიმცირებს გადასახადებს. ყველაფერს ისიც დაემატა, რომ ჩვენს ზემოთ ახალი უბანი გაშენდა. მისი მშენებლობით გამოწვეულმა ვიბრაციამ, ჩამოანგრია კლდის ნაწილი, შემოვარდა ჩვენთან ეზოში და დაგვიზიანა 2 დარბაზი. რის გამოც, ყოველთვიურად, 30 000 ლარის ოდენობის შემოსავალი დავკარგეთ.

- მერე, დასახმარებლად, არ მიმართეთ შესაბამის ორგანოებს?

- მერიას 3 წელიწადია დახმარებას ვთხოვთ, მაგრამ უშედეგოდ.

ანი ბეშიტაიშვილი

გაზეთი "ვერსია"