7
აპრილიდღის ზოგადი ასტროლოგიური პროგნოზი
9 წლის ლიზა ქირია "რუსთავი 2"-ის დილის გადაცემა "დილა მშვიდობისა, საქართველოს" წამყვანის და პრესის მიმომხილველის ოთარ ქირიას ქალიშვილია. ლიზა სკოლა "ბაქსბუდის" მეოთხე კლასის მოსწავლეა. 9 წლის გოგონა ენაწყლიანი რესპონდენტი აღმოჩნდა. ძალიან უყვარს მოგზაურობა, მამა და სიურპრიზები. გარდა იმისა, რომ გოგონა წარჩინებული მოსწავლეა, ის დიზაინერობას აპირებს და თავისუფალ დროს ესკიზებზე მუშაობს.
- ლიზა, ვინ უნდა გამოხვიდე?
- დიზაინერი, მაგრამ ჩემი არჩევანი მამას არ მოსწონს. ძალიან ბევრი კაბის ესკიზი მაქვს დახატული. ერთი ბლოკნოტი მაქვს, სადაც ვხატავ. ერთხელ პოდიუმზეც გამოვედი, ავთო ცქვიტინიძის შეკერილი სამოსი მეცვა. სკოლაში თექაზე მუშაობას გვასწავლიან. ერთი წელია ვსწავლობ და საინტერესო ნამუშევრები შევქმენი. დამზადებული მაქვს სამი პატარა ხალიჩა, ერთი სააღდგომო თემატიკას ასახავს, ასევე დამზადებული მაქვს სააღდგომო კვერცხი, შარფები. ძალიან რთულია თექაზე მუშაობა, ერთი შეცდომაც რომ დაუშვა, ჩათვალე, რომ ტყუილად იშრომე.
- გამოფენა ხომ არ გქონია?
- დიახ, ხელოვნების მასწავლებელმა სკოლაში მშობლებისთვის გამოფენა მოაწყო, ჟიურიმაც შეაფასა ბავშვების ნამუშევრები. შექება მეც დავიმსახურე (იღიმის).
- პირველად რა დაამზადე?
- ჩემი პირველი ნამუშევარი იყო შარფი, რომელიც ძალიან მიყვარს. როცა რამეს აკეთებ, ძალიან გიყვარდება, მეც ასე ვარ. ჩემს ნამუშევრებს გასაჩუქებლად ვერ ვიმეტებ (იცინის).
- კითხვა გიყვარს?
- ახლა ორ წიგნს, "ტომ სოიერის თავგადასავალს" და "მე, ბებია, ილიკო და ილარიონს" ერთად ვკითხულობ. ერთი სკოლის დავალებაა, მეორე კი ჩემი სურვილით ავირჩიე.
- ჟურნალისტობა არ გინდა?
- მაგაზეც ვფიქრობ. მამიკო სულ მარიგებს, თუ ჟურნალისტობას გადავწყვეტ, ძალიან, ძალიან კარგად უნდა ვისწავლო, წავიკითხო ბევრი წიგნი და მივიღო კარგი განათლება. საერთოდ, მისი რჩევები ჩემთვის მისაღებია.
- ვინ არის შენი საყვარელი ტელეჟურნალისტი?
- ეკა სამხარაძე გამორჩეულად მიყვარს. ისე, ბევრი მომწონს და მიყვარს. მე და დედა ხშირად ვუყურებთ "ვანოს შოუს" და კარგადაც ვხალისობთ ხოლმე. "რუსთავი 2-ზე" "ნიჭიერს" ვუყურებდი, კარგი გადაცემა იყო. დრამერსა და პიანისტს ვგულშემატკივრობდი. მუსიკა მომწონს, მამას სურს ფორტეპიანოსა და გიტარაზე დაკვრა ვისწავლო, მაგრამ მე ვყოყმანობ.
- ვინ არის საქართველოს პრეზიდენტი?
- (იცინის) ეგ ჯერ არ არის დაზუსტებული.
- უკვე დააზუსტეს, გიორგი მარგველაშვილია. ინაუგურაცია რა არის?
- არ ვიცი.
- არჩევნები?
- სადაც ხალხი თავის "კუმირს" ხმას აძლევს. გამახსენდა, ერთხელ ვარ ნამყოფი არჩევნებზე.
- ვინ არის საქართველოს პრემიერი?
- გეფიცებით, არ ვიცი, ვინ რას აკეთებს, რას საქმიანობს. საერთოდ არ ვუყურებ "კურიერს".
- ლიზა, აქცია რას ნიშნავს?
- როცა ფასებია დაბალი. კიდევ ბევრი ხალხი ერთად რომ დგას და რაღაცებს აპროტესტებენ, მაგასაც ნიშნავს.
- ფული რისთვის სჭირდება ადამიანს?
- საკვები რომ იყიდოს. ქუჩაში ბევრი ისეთი ადამიანია, ვისაც ფული არა აქვს და უჭირს. მე რომ მდიდარი ვიყო, უსახლკაროებს სახლს ავუშენებდი, შევქმნიდი სამუშაოებს. გაჭირვებულებს ფულს კი არ მივცემდი, დავასაქმებდი და ამ ადამიანებს ყოველ თვე ექნებოდათ ხელფასი, საკუთარი ფული. როგორც მე მაქვს სამსახური.
- სად მუშაობ?
- მამიკოს მეორე სამსახურში "მაზერქეაში" შაბათ-კვირას ადამიანებს სამოსის შერჩევაში ვეხმარები, შემდეგ ფულს მიხდიან და მეც არ ვხარჯავ. სასწავლებლად ლონდონში მინდა წასვლა, ჰოდა ამისთვის ფულს უკვე ვაგროვებ.
- მამა ბრაზიანია?
- კი (იცინის), დეიდამ საბერძნეთიდან სკეიდბორდი გამომიგზავნა და შინ სკეიდბორდით ვერთობი ხოლმე. ჰოდა, შესაბამისად, ბევრი ნივთი ზიანდება, ტყდება, ამიტომ ბრაზობს ხოლმე. მამიკო განსაკუთრებით მიყვარს.
- ვიცი, რომ მამიკოს გარდა, მოგზაურობაც ძალიან გიყვარს...
- დიახ. ეგვიპტეში ვიყავი სექტა "გადარეულებთან" ერთად.
- სექტა გადარეულები რას ნიშნავს?
- არსებობს სექტა, სახელად "გადარეულები" და ეს სექტა "რუსთავი 2"-ზე მუშაობს. მისი წევრები არიან: მამიკო, მე, დედიკო, ეკა სამხარაძე მისი შვილი ლიზა და "რუსთავი 2-"ის თანამშრომელი ქეთი ქებაძე. სახელიდან გამომდინარე, ეგვიპტეში გადარეულებივით ვიქცეოდით, ვგიჟობდით. ერთად როცა ვიკრიბებით, ისევ ვხალისობთ ხოლმე.
- გადარეულები ვინ შეგარქვათ?
- ეკას შვილმა ლიზამ. ეკას ნომერში ხვლიკი შეუვარდა, მე და მამა დასახმარებლად რომ მივედით, სასტუმროს თანამშრომელმა ხვლიკის საწინააღმდეგო სპრეი შემთხვევით მე და ლიზას სახეში შეგვესხა. მამიკო ძალიან გაბრაზდა და იქ ისეთი ამბები დაატრიალა, სულ დაჟეჟა იქაურები. ეგვიპტეში ვნახე, სფინქსი და პირამიდები. ბევრ ქვეყანაში ვარ ნამყოფი, ვენეციაში, პარიზში, საბერძნეთში, ესპანეთში.
თეკლა ტუღუში
