30
მარტიდღის ზოგადი ასტროლოგიური პროგნოზი
მოლხენაში ქართველებს ნურავინ შეგვეჯიბრება. სხვა საკითხია, რას ვაკეთებთ მაშინ, როდესაც უზომოდ ვართ ნასვამები და საკუთარ ქცევებს ვეღარ ვაკონტროლებთ. გადავწყვიტე, ცნობილი ადამიანების მიერ სიმთვრალის დროს ჩადენილი სიგიჟეები გამეგო და რამდენიმე მათგანს ერთი თხოვნით მივმართე: გაგვიმხილეთ ყველაზე დიდი სიგიჟე, რაც სიმთვრალის დროს ჩაიდინეთ.
კოტე თოლორდავა, მსახიობი:
- მე და ჩემი მეუღლე ჯერ ცოლ-ქმარი არ ვიყავით, შეყვარებულობის პერიოდი გვქონდა. ერთხელაც ძალიან მაგრად ვიჩხუბეთ და გამწარებულ გულზე, ძალიან ბევრი დავლიე. მერე უამრავი, დაახლოებით, 12 შეკვრა საწერი ქაღალდი ავიღე და მისი სახლის მოპირდაპირე მხარეს, თამარაშვილის ქუჩაზე, ბანკის შენობის კედელზე "სკოჩით" დავაკარი ერთმანეთზე. წარმოიდგინეთ, ყინვაში ამ ქაღალდებს ერთმანეთზე ვაწებებდი, რომ დილით წარწერა დაენახა, სადაც დიდი ფლომასტერით დავაწერე გაკო (განო და კოტე, ერთმანეთს გაკოს ვეძახდით), და ლათინური ასოებით - I am 4 you. რამდენად სიგიჟე იყო, არ ვიცი, მაგრამ მაინც იყო. ეს ყველაფერი მარტომ გავაკეთე. პატრულის მანქანები გაჩერდა - რამეს ხომ არ აზიანებო. პირიქით, შემომიერთდით და "მესამე ხმა იყავით-მეთქი" - შევთავაზე, მაგრამ "ჩვენ სოფლის შენება არ გვინდაო" და განაგრძეს გზა. მანამდე კი მიყურეს და ბევრი იცინეს ჩემს წვალებაზე. წარმოიდგინეთ - კედელს 20 მეტრი აქვს სიგრძე და 3 მეტრი სიგანე. დილით განოს ნაცნობები ურეკავდნენ: გადაიხედე და ნახე, რა წერიაო!
ნიკა გრიგოლია, მსახიობი:
- ერთხელაც დავლიე და დავიძინე. წესით და რიგით, მეორე დღეს გოგონასთან ერთად უნდა გამღვიძებოდა, თუმცა დილით კოტიკო თოლორაიასთან ერთად გავიღვიძე. ეს დაახლოებით, ორი წლის წინ იყო. ნებისმიერ მამაკაცს როგორი რეაქციაც ექნება, მამაკაცის ფეხს რომ მოჰკიდებს ხელს? კინაღამ საწოლიდან გადმოვვარდი!
ნინა წკრიალაშვილი, მომღერალი:
- მხოლოდ ერთ-ორ ჭიქას ვსვამ, მაგრამ მყოფნის. ერთხელაც დაბადების დღეზე დავლიე, მოვდივარ და შუქნიშანთან ჩემს გვერდით პატრულის მანქანა გაჩერდა, თან მიყურებენ, მივუბრუნდი და ვეუბნები: რას მიყურებთ, ნასვამი ხომ არ გგონივართ-მეთქი. მოკლედ, იმდენი ველაპარაკე, რომ მიხვდნენ - ნასვამი ვიყავი და ერთი წლით ჩამომართვეს მართვის მოწმობა. ჩემი ორგანიზმი ვერ იტანს ბევრ სასმელს, თანაც ახალ წელს ძირითადად სულ ვმუშაობ და არ ვსვამ. ისე არა ვარ, ზოგს მერე აღარაფერი რომ აღარ ახსოვს. უბრალოდ, ბევრს ვიცინი ხოლმე.
