4
მაისიდღის ზოგადი ასტროლოგიური პროგნოზი
ჩვენი რესპონდენტი მარი სახოკია ხობის რაიონის სოფელ ჭალადიდში რამდენიმე ხნის წინ მომხდარ იმ უცნაური ამბებს აღწერს, სოფელს ტყის ღმერთმა ტყაშმაფამ რომ დაატეხა თავს.
- ტყაშმაფამ თავიდან ჯალაღანიების ოჯახი ამოიჩემა, მერე გერსამიების ოჯახში გადაინაცვლა, ბოლოს კი მთელ ჭალადიდს დაუკარგა მოსვენება. ერთხელაც ჩვენს სახლს მოადგა. ჭიშკარმა რომ გაიჭრიალა, ვიფიქრეთ, რომ ეზოში ვიღაც შემოვიდა, მაგრამ გავიხედეთ და იქ არავინ იყო. სწორედ ამ დროს ჩვენი სახლის ფანჯარას უშველებელი ლოდი მოხვდა და ერთიანად ჩაამსხვრია. ისე ვიყავით შეშინებული, ეზოს გარეთ გასვლას ვეღარ ვბედავდით. საქმეში პოლიციაც ჩაერთო, მაგრამ ვერაფერი დაადგინეს. თბილისიდანაც ჩამოვიდნენ მოჩვენების ვიდეოზე გადასაღებად, მაგრამ ამოუცნობმა ძალამ კამერა დაუმტვრიათ. გაგიკვირდებათ, მაგრამ მოჩვენებას ძირითადად ადამიანებზე მიჰქონდა იერიში. ამ საშინელებამ ლამის ერთ თვეს გასტანა. არ ვიცოდით რა გვეღონა, ან საიდან გვემუქრებოდა საფრთხე. სოფელში მთელი ღამე პოლიცია პატრულირებდა. მოჩვენება განსაკუთრებით საღამოს 9 საათისთვის აქტიურდებოდა. ტყიდან ქვების წვიმა მოდიოდა. ვენახები ერთიანად განადგურდა. შეშინებულმა ხალხმა ბავშვები სოფლიდან გაიყვანა.
-რას უკავშირებთ ამ მოვლენებს?
-როცა უხილავ ძალასთან ვერაფერს გავხდით, მთელი სოფელი შევიკრიბეთ, ვიმსჯელეთ და დავასკვენით, რომ თავს ტყის ღმერთი ტყაშმაფა გვესხმოდა. ამ ამბებამდე რამდენიმე ხნით ადრე ტყისმჭრელ თემურ ჯალაღანიას ტყეში ერთი ვეებერთელა ხე მოუჭრია, რომლის ძირში ყოფილა ბუნაგი, როგორც მივხვდით, ტყაშმაფა სწორედ იქ ბინადრობდა... ხის მჭრელმა შეშა სახლში რომ მიიტანა, ამის შემდეგ დაიწყო მთელი უბედურება. ოჯახის უფროსს იმ საღამოს ლეღვის ნაყოფი დაუშინა ვიღაცამ, მაგრამ ეს ყველაფერი ბოროტ ხუმრობას მიაწერეს. მეორე დღეს კი სახლს უშველებელი რიყის ქვები მოხვდა. ადამიანს ამხელა ქვის სროლა სად შეუძლია?! მოკლედ, უეჭველია, ხის ფუღუროში ტყაშმაფას ბუნაგი იყო, იმ ხის მოჭრამ გააბრაზა და ამიტომაც გამოჰყვა ტყისმჭრელს. არსებობს ხალხი, ვინც ტყეში შენიშნა თეთრებში ჩაცმული გიგანტური არსება, რომელიც მიახლოებისთანავე გაქრა -ეს იყო ტყაშმაფა.
-როგორ გამოიყურებოდა ტყაშმაფა?
-როგორც თვითმხილველები ამბობენ, ეს გიგანტური არსება თეთრებით იყო შემოსილი და ერთიანად ანათებდა. მეგრული მითოლოგიის მიხედვით, ოქროსფერთმიანი ტყის მეფე-ქალი ტყაშმაფა მონადირესთან საიდუმლო სასიყვარულო კავშირს ამყარებს, მასზეა დამოკიდებული მონადირის იღბალი. საიდუმლოს გაცემის შემთხვევაში იგი მის რჩეულს სიკვდილს მოუვლენს. ზოგჯერ ქვად აქცევს მონადირეს, ხოლო მის ოჯახს გააღატაკებს. ტყაშმაფას შიშველ ტანს უფარავს თეთრი სამოსი, რომელიც კოჭებამდე სწვდება, ზოგჯერ უჩინარია. ის ხშირად ხვდება ტყეში მონადირეებს, მაგრამ არავითარ შემთხვევაში არ უნდა გამოელაპარაკო, ხელებით უნდა აუხსნა, რა გინდა, თორემ შეიძლება განრისხდეს და ჭკუიდან შეგშალოს. ის ხეებზე ცხოვრობს.
-როგორ განდევნეთ სოფლიდან ტყაშმაფა?
-შევიკრიბეთ და მოვილაპარკეთ, რომ ბოდიში მოგვეხადა მისი ბუნაგის დანგრევისთვის. ტკბილეული მივიტანეთ იმ ხესთან და ტყაშმაფას თავდასხმებიც შეწყდა.
