8
აპრილიდღის ზოგადი ასტროლოგიური პროგნოზი
სასკოლო ოლიმპიადა "კინგსი" საქართველოს მასშტაბით წელიწადში ორჯერ იმართება. ტესტირება ინგლისურ ენასა და მათემატიკაში ტარდება. "ამბები.გე"-ს რამდენიმე მშობელი დაუკავშირდა, რომლებიც აცხადებენ, რომ ამ ორგანიზაციას არ გააჩნია საკმარისი კომპეტენცია და ინგლისურის ოლიმპიადაზე ტესტებში არაერთი შეცდომა დაფიქსირდა.
"ტესტები ორაზროვანია და ისეა შედგენილი, რომ გამიზნულია არაა ბავშვის ცოდნის გამოსამჟღავნებლად, არამედ მის ჩასაჭრელად", - ასეთია ოლიმპიადის ერთ-ერთი მონაწილის, მეხუთეკლასელი გოგონას დედის, ნესტან ვეფხვაძის შეფასება.
ნესტან ვეფხვაძე ინგლისური ენის სპეციალისტია, შესაბამისად შეცდომები მან მეორე ტურის დასრულებისთანავე აღმოაჩინა და ორგანიზატორებსაც მიმართა. თუმცა სიმართლის გარკვევა რამდენიმედღიანი რთული მიმოწერის შემდეგ შეძლო.
"ინგლისურში მეორე ტურის ტესტები იყო აბსოლუტურად გაუმართავი, ზოგიერთ საკითხს ჰქონდა ორ-ორი სწორი პასუხი. მე პირადად დავთვალე ხუთი ასეთი ტესტი და შევატყობინე ორგანიზატორებს. დაახლოებით 5 დღე იყო შედეგების გამოქვეყნებდე და ისინი მიმტკიცებდნენ, რომ სწორი იყო. არალოგიკურ და გაუმართლებელ პასუხებს მწერდნენ. სინამდვილეში, ტესტი იყო არასწორად შედგენილი, მეხუთეკლასელ ბავშვს იმის მიხედვით უნდა გაეცა პასუხი, თუ რა იგულისხმა ტესტის დამწერმა. საბოლოოდ პასუხი აღარც მომწერეს, მაგრამ ბავშვებს ამ საკითხებში მოემატათ ქულა. რაც შეეხება ფინალურ ტურს, შეცდომები აქაც დაფიქსირდა. ამ ტურში არის ტესტი, რომელშიც, თუ ავიღებთ ბრიტანულ ინგლისურს, არცერთი პასუხი არ არის სწორი, მაგრამ ამერიკული ინგლისურით სამი სავარაუდო პასუხიდან ერთი სწორია. კვალიფიკაციის სერიოზული პრობლემა აქვთ",-ამბობს ნესტან ვეფხვაძე.
"კინგსს მუდმივად აქვს გამართული ტესტების შედგენის პრობლემა, განსაკუთრებით ინგლისურში. მხოლოდ ერთ კლასში, მეორე ტურში მოუწიათ სამი საკითხის მთლიანად გაბათილება. ახლა პირადად მე ორ საკითხზე მაქვს პრეტენზია და ორივეზე მეწინააღმდეგებიან, ამბობენ რომ მათი ვერსიაა სწორი, თუმცა აღიარებული ფაქტია, რომ ის ორი ტესტი, რომელზეც ვედავები, გაუმართავია – ამბობს ერთ-ერთ- ფინალისტი მონაწილის მშობელი.
მისივე თქმით, არაკვალიფიციურად ჩატარებული ოლიმპიადები მოსწავლეთა უფლებებს არღვევს და უნდა არსებობდეს კონკრეტული რეგულაციები ოლიმპიადის ჩასატარებლად. "ვთვლი, რომ რაღაცნაირად უნდა რეგულირდებოდეს ასეთი ოლიმპადების ჩატარება. ისეთ ორგანიზაციებს, ვისაც არ აქვთ საკმარისი კვალიფიკაცია და არ შეუძლიათ ოლიმპიადა გამართულად ჩაატარონ, ამის უფლება უნდა ჩამოერთვათ, იმიტომ რომ ირღვევა ბავშვების უფლებები. ამ დროს ჩნდება უსამართლობის განცდა და ეს არის ბავშვისთვის ძალიან საზიანო, მით უმეტეს პატარა ასაკში".ოლიმპადასთან დაკავშირებით პრეტენზიებს მშობლები "კინგსის" Facebook-ის ვებგვერდზეც აფიქსირებენ. მშობლები წერენ, რომ ინგლისურის ტესტებში არაერთი შეცდომა აღმოაჩინეს.
"ნამდვილად არასწორად არის პასუხები შეტანილი. როგორ შეიძლება ითქვას -She does not go to school today because she is ill - ეს არის მცდარი წინადადება, ე.ი. არ დადის სკოლაში დღეს, იმიტომ რომ ავად არის. უნდა იკითხოთ მაინც უცხოელებთან, ამერიკელებთან და ინგლისელებთან, თუ არადა შეიტანოთ შესწორება. ბავშვებს ხალისს უკარგავთ."
"ვარ ძალიან ნაწყენი და ვაპირებ გავასაჩივრო თქვენი ინგლისური ენის ოლიმპიადის უსამართლო შედეგები, რადგან უძლიერეს კონკურსანტს სპეციალურად დააკლეს 4 ქულა, რათა იგი არ მოხვედრილიყო საუკეთესო სამეულში. გასაჩივრების შედეგად მოიმიზეზეს უსუსური და არალოგიკური არგუმენტები. სამწუხაროდ ამგვარ ფაქტებს ეწირება ჩვენი ბავშვების ფსიქოლოგიური განწყობა და იკარგება ყოველგვარი სტიმული. ბავშვები უშედეგოდ მიიჩნევენ ოლიმპიადაში მონაწილეობის მიღებას", - წერენ მშობლები.
აღნიშნულ საკითხთან დაკავშირებით Ambebi.ge "კინგსის" ადმინისტრაციასაც დაუკავშირდა. აღმასრულებელი დირექტორი ალექსანდრე ბასილაძე ადასტურებს, რომ შეცდომები ტესტებში შესაძლოა აღმოჩნდეს, თუმცა საკამათო საკითხები მოსწავლეთა სასარგებლოდ წყდება.
"უშუალოდ ამ ოლიმპიადაზე ჩვენ შევქმენით სპეციალური ჯგუფი, რომელიც დაკომპლექტებულია წამყვანი პროფესორ-მასწავლებელებით, როგორც ინგლისურში, ასევე მათემატიკაში და ტესტების ხარისხი აწეულია. რაც შეეხება პრეტენზიებს, ყოველთვის არის. ადრე უფრო მეტი იყო, თან ინგლისური უფრო საკამათო საგანია, ვიდრე მათემატიკა. პრეტენზიები არის ორ საკითხზე - არის სტამბური, ბეჭდური ხასიათის შეცდომები. მცირე რაოდენობის შეცდომები იპარება ტესტის შინაარსშიც. ერთ-ერთ კლასში მართლაც იყო უფრო მეტი ხარვეზი, რომელიც არ უნდა ყოფილიყო, და ეს საკითხები ჩვენ ბავშვებისთვის სასარგებლოდ გადავწყვიტეთ და რაც იყო საკამათო და ორაზროვანი, ჩავუთვალეთ სწორ პასუხად",-აცხადებს ბასილაძე.
საქართველოს მასშტაბით სასწავლო ოლიმპიადას ათამდე კერძო ორგანიზაცია ატარებს. ოლიმპიადას წელიწადში ორჯერ მაინც ატარებენ. ოლიმპიადის პირველ ტურში მონაწილეობა უფასოა, თუმცა მეორე ტურში გადასულმა მოსწავლეებმა ოლიმპიადაში მონაწილეობის გასაგრძელებლად თანხა უნდა გადაიხადონ, რომელიც ძირითადად 15 ლარს შეადგენს. აღსანიშნავია, რომ ოლიმპიადაში ათასობით მოსწავლე მონაწილეობს.
განათლების სამინსიტროში განმარტავენ, რომ კერძო ოლიმპიადებთან მათ შეხება არ აქვთ და შესაბამისად არც მათი კვალიფიკაციის შესახებ აქვთ ინფორმაცია. როგორც ირკვევა, არ არსებობს საკანონმდებლო ნორმა, რომელიც მათ საქმიანობას დაარეგულირებს.
ნათია ლეშკაშელი, Ambebi.ge
Ambebi.ge: თუ თქვენც გაგაჩნიათ მსგავსი პრეტენზიები სასკოლო ოლიმპიადებთან დაკავშირებით, გთხოვთ მოგვწეროთ კომენტარის სახით
