რიჩარდ ნორლანდი - ქართული მხარე რუსეთთან ურთიერთობის გაუმჯობესებას ცდილობს

მიუხედავად იმისა, რომ რუსეთს ოკუპირებული აქვს საქართველოს ტერიტორიის 20%, ქართული მხარე ცდილობს, გაუმჯობესდეს რუსეთთან ურთიერთობა, რაც არის რეგიონში უსაფრთხოებიდან გამომდინარე ყველას ინტერესი, - ამის შესახებ ამერიკის შეერთებული შტატების ელჩმა საქართველოში რიჩარდ ნორლანდმა დღეს ბათუმში ჟურნალისტებს განუცხადა.

როგორც ელჩმა განმარტა, სოჭის ოლიმპიურ თამაშებში საქართველოს მონაწილეობის საკითხი მოგვიანებით გადაწყდება. "რაც შეეხება სოჭის ოლიმპიურ თამაშებში საქართველოს მონაწილეობის საკითხს, გადაწყვეტილება მიღებული იქნება მოგვიანებით, როცა თარიღი მოახლოვდება. გასაგებია, რატომ შეიძლება საქართველოში გული დასწყდეთ ამის გამო, მაგრამ საქართველოს სურს კონსტრუქციული ნაბიჯები გადადგას რეგიონში უსაფრთხოების ინტერესებიდან გამომდინარე", - აღნიშნა რიჩარდ ნორლანდმა.

საქართველოს არჩეულმა პრეზიდენტმა გიორგი მარგველაშვილმა რუსეთის პირველ არხთან ინტერვიუში განაცხადა, რომ სოჭის ოლიმპიადაზე მისი გამგზავრების შესაძლებლობა განიხილება. "ჩვენ ასევე განვაცხადეთ, რომ მონაწილეობას მივიღებთ რუსეთის ისტორიისთვის ერთ-ერთ ყველაზე მნიშვნელოვან მოვლენაში – ოლიმპიურ თამაშებში და გავფანტეთ დაძაბულობის ფონი", - აღნიშნა მარგველაშვილმა და დასძინა, რომ ამ ეტაპზე განიხილება სოჭის ოლიმპიურ თამაშებზე ქართველ სპორტსმენთა მხარდასაჭერად სახელმწიფოს მეთაურთა წასვლის საკითხი. მისივე თქმით, სოჭის ოლიმპიადაზე ქართველი სპორტსმენების გამგზავრება კარგი დასაწყისია იმისთვის, რომ არ შეიქმნას რაიმე პოლიტიკური დაძაბულობა. როგორც გიორგი მარგველაშვილმა აღნიშნა, ქართული მხარე მოლოდინით უყურებს სოჭის ოლიმპიადას და იმედოვნებს, რომ სპორტული და კეთილი ნების ემოცია დასაბამს მისცემს გარკვეული სახის ახალ ურთიერთობებს არა მხოლოდ რუსეთში, არამედ მთელ მსოფლიოში.

"ინტერპრესნიუსი"