6
მაისიდღის ზოგადი ასტროლოგიური პროგნოზი
ჩვენი რესპონდენტი, მომღერალი ნინა წკრიალაშვილი ამჯერად დაკავებულია პროექტით "ცეკვავენ ვარსკვლავები" და მთელ დროს რეპეტიციებზე ატარებს.
- რატომ გადაწყვიტეთ "ცეკვავენ ვარსკვლავებში" მონაწილეობა?
- წინა სეზონზეც მქონდა შემოთავაზება, მაგრამ ვიუარე... მოგეხსენებათ, ფიზიკური დატვირთვა სტრესის მოხსნის უებარი საშუალებაა და სწორედ ამან გადამაწყვეტინა პროექტში მონაწილეობა. შემიძლია ვთქვა, რომ ამ ყველაფერმა გაამართლა - ძილიც გამომიკეთდა და ჯანმრთელობაც, სისულელეებზე ფიქრის დრო ნაკლებად მაქვს. როცა რეპეტიციაზე არ ვარ, მაშინაც პროექტზე ვფიქრობ. ჩემი ნატვრაა, ტანგო ვიცეკვო და იმედია, ეს სურვილიც ამიხდება...
- თუ საიდუმლო არ არის, ვის მიეცით ხმა არჩევნებზე?
- ამ არჩევნებზე მისვლა ვერ მოვასწარი. ვერც კი ვიგრძენი, წელს თუ არჩევნები ტარდებოდა - ქუჩებში დიდი პლაკატებითაც არავის უვლია. ისე, კარგია ასეთი არჩევნები. ყოველთვის ვიცი, ვის უნდა მივცე ხმა არჩევნებზე და ამას არც არასდროს ვმალავ - დათო ბაქრაძის მხარდამჭერი ვარ, თუმცა, ნინო ბურჯანაძესა და გიორგი მარგველაშვილს შორის თუ მომიწევდა არჩევანის გაკეთება, მარგველაშვილს დავუჭერდი მხარს. ნინო ბურჯანაძის პრეზიდენტობა აბსურდია.
- ერთი წლის წინ განაცხადეთ, თუ არჩევნებში "ნაციონალური მოძრაობა" ვერ გაიმარჯვებს, ხარაკირს ჩავიტარებო, ხომ არ ნანობთ ამ განცხადებას?
- მაშინ ლამის მთელი საქართველო მაფურთხებდა, მაგრამ მე ასე არ მითქვამს. "ნაციონალებმა" ბევრი რამ გააკეთეს ქვეყნისთვის, მაგრამ ბოლოს ყველაფერს ხაზი გადაესვა იმ ლაფსუსების ფონზე, რამაც ქართველები დააზარალა...
- "ნაციონალური მოძრაობის" დროსაც და ახლაც მომღერლები ჩიოდნენ, რომ მათი გვარები ე.წ. "შავ სიებში" ჰქონდათ შეტანილი და არსად ამღერებდნენ, ეთანხმებით თუ არა მათ მოსაზრებას და იბლოკებით თუ არა ამჯერად თქვენ?
- კულტურის სამინისტროში ჩემი მუშაობის პერიოდში ბევრჯერ დაგვირეკავს იმავე ნატო მეტონიძესთან, ლიზა ბაგრატიონთან, ეკა მამალაძესთან და ისინი თავად ამბობდნენ უარს კონცერტებში მონაწილეობაზე. საესტრადო კონცერტი სულ ორჯერ ჩატარდა ჩემი ორგანიზებით და მეც არ მიმიღია მონაწილეობა, უფრო კლასიკურ საღამოებს ვმართავდით. ისე, ყველას აქვს უარის თქმის უფლება, ვისაც უნდოდა, მოვიდოდა... ახლანდელ "შავ სიებს" რაც შეეხება, ვერ ვიტყვი, არსებობს თუ არა ასეთი რამ, მაგრამ 26 მაისის კონცერტზე ყველას დაურეკეს, ნინო ჩხეიძის, სტეფანესა და ჩემ გარდა. ზუსტად ვიცი, რომ კულტურის სამინისტროდან დავიბლოკე, არც ვიცი, მივიღებდი თუ არა იმ კონცერტში მონაწილეობას, მაგრამ ახლა თუ მექნება მსგავსი შემოთავაზება იმ ხალხისგან, ვინც მაშინ დამბლოკა, ნამდვილად უარს ვიტყვი. ვიმღერებ თუ არა კონცერტზე, ამას ჩემთვის სასიცოცხლო მნიშვნელობა არა აქვს.
- თუმცა, რამდენიმე მომღერალი, რომელიც შარშან წინასაარჩევნოდ "ნაციონალურ მოძრაობას" უჭერდა მხარს, დღეს "ქართული ოცნების" მხარდამჭერია...
- ვისაც სადაც უნდა, იქ წავიდეს. მძულს მოღალატე ადამიანები. ერთი ღალატის გამოც შემიძლია გულიდან ამოვიგდო. ვაფასებ ადამიანს, ვინც ბოლომდე დგას საკუთარი, თუნდაც ჩემგან განსხვავებული მოსაზრების დასაცავად, მეც მყავს ასეთი მეგობრები, მაგრამ ამის გამო არავინ დამიკარგავს. ზოგიერთი რომ არჩევნების შედეგების გამოცხადებიდან 20 წუთში სხვა პარტიის მაისურს ჩაიცვამს, ეს მაგიჟებს. იმხანადაც გამაოგნა არა არჩევნების შედეგებმა, არამედ ასეთი ადამიანების საქციელმა, მით უმეტეს, როცა ამას მამაკაცები აკეთებენ. დროთა განმავლობაში რომ იცვლი პოზიციას, ეს ნორმალურია, მაგრამ როცა არჩევნების დამთავრებამდე წითელი მაისური გაცვია და არჩევნების დამთავრებისთანავე ლურჯი მაისურით და ტორტით ხელში მიდიხარ გამარჯვებულის სახლში, ეს მარაზმია. ამის გამო ისე ვიყავი გაღიზიანებული, ერთი თვე ვერ გამოვდიოდი სახლიდან...
- ახალი ხელისუფლების წარმომადგენლებთან მეგობრობთ?
- რა მერე, რომ ვმეგობრობ? დიახ, ახლოს ვარ მინისტრებთანაც, პარლამენტარებთანაც და ცოტა ზემოთაც. მათაც ისევე სჯერათ თავიანთი პოზიციის, როგორც მე, ამის გამო არ დაგვიკარგავს ერთმანეთი.
- ქმრის დაკარგვა მძიმედ განიცადეთ...
- მართალია, მე და თენგო ბოლო სამ თვეს გაშორებული ვიყავით, მაგრამ დიდი ტკივილი მივიღე. ჩემს თავს ვადანაშაულებდი, რომ არ დავშორებოდით, ასე არ მოხდებოდა-მეთქი. მას შემდეგ ბევრი რამ გადავაფასე, მივხვდი, რომ უბედურება მხოლოდ ადამიანის სიკვდილია, რომელსაც ვერაფერს უშველი. რაც არ უნდა მოხდეს ჩემს ცხოვრებაში, თენგო მოუშუშებელ ტკივილად დამრჩება...
- რაც შეეხება თქვენი და პატარკაციშვილის ძმისშვილის რომანს?..
- მე გულს ვეღარავინ მატკენს. ჩემი ფოტო ჯერ გურამ ტატიშვილის ფოტოსთან ერთად დაამონტაჟეს, მერე კობასთან ერთად. მამაჩემს ეს ფოტოები რომ ვაჩვენე, გაგიჟდა კაცი (იცინის). მე და მამა ვმეგობრობთ და მას ყველაფერს ვუყვები. ისე მომერიდა კობას ცოლის, რამდენიმე დღე მასთან შეხვედრას გავურბოდი, მაგრამ მერე დავფიქრდი, რომ ვიღაცის ავადმყოფური ფანტაზიების გამო არ უნდა დამეკარგა, დღემდე ვმეგობრობთ მე და კობა. მომერიდა თენგოს დედისაც, თუმცა თვითონ მეუბნება, ახალგაზრდა ხარ და ცხოვრება უნდა გააგრძელოო...
ესაუბრა თამარ ბოჭორიშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
