ტოლი ბოისამ რეპეტიციაზე სუხიშვილები გააოცა

"ცეკვავენ ვარსკვლავები" მორიგი ტურისთვის (ქართული ცეკვები) ემზადება. ვარსკვლავები რამდენიმე დღეა სუხიშვილების მოცეკვავეებთან ერთად, ინტენსიურ რეპეტიციებს გადიან. ყველა ძალიან მონდომებულია, რომ ქართული ცეკვა ღირსეულად წარმოადგინოს.

"ამბები.გე" ცირკის კულისებს ესტუმრა. სცენაზე ანატოლი ბოისა და სალომე ჭაჭუა იდგნენ... მათ ცეკვას ყურადღებით ვადევნებდით თვალ-ყურს. პატარა პაუზის დროს კი ტოლისაც გავესაუბრეთ.

- ცოტა ხნის წინ ვარჯიშიდან, რეპეტიციაზე მოვედი. აქედან სახლში უნდა გავიქცე, რომ ვისადილო და მერე ისევ კალათბურთში გავაგრძელო ვარჯიში. ყველაზე მცირე, დღეში 3 ვარჯიში მაინც მიწევს.

- ამ პროექტის გამო კალათბურთს ყურადღება ხომ არ მოაკელი?

- არა, კალათბურთს ყურდღებას როგორ მოვაკლებ? ეგ ხომ ჩემი პროფესიაა, რითაც თავსაც ვინახავ და ოჯახსაც ვარჩენ. ამიტომ ვალდებული ვარ, მთელი ყურადღება კალათბურთისკენ მივმართო, თუმცა ვცდილობ, პროექტშიც მაქსიმალურად დავიხარჯო. მინდა, რომ ყოველი ტური ჩემთვის წინ გადადგმული ნაბიჯი იყოს. სამუშაო პროცესს ბევრი შეფერხება ახლავს ხოლმე, რაღაცები არ გამოდის, რაზეც მერე ვკამათობთ. ძირითადად შენიშვნებს ქორეოგრაფები მაძლევენ. ვცდილობ, გონებრივად ვიყო ჩართული და ეს პროცესი რთულია (ჩემი გრაფიკით მაგათ არ უცხოვრიათ და არ იციან ეს ყველაფერი). ამიტომ მიმაჩნია, ცეკვას ნორმალურად ვართმევ თავს. იმ ნომრებმაც, რაც აქამდე ჩემს პარტნიორთან ერთად წარმოვადგინე, აჩვენა, რომ მართლაც ვცდილობ და შემიძლია, რაც თავდაჯერებულობას მმატებს. მჯერა, თუ ასეთი შემართებითა და ასე დაუღალავად გავაგრძელებ მუშაობას, რაღაც წარმატებას მივაღწევ.

- ტოლი, გაგიმართლა საოცარი და სუპერპროფესიონალი მოცეკვავე - სალომე ჭაჭუა შეგხვდა.

- ვფიქრობ, რომ ამ პროექტში ყველა მაგარი მოცეკვავეა... სალომე რომ პროფესიონალია, ამაზე არავინ დავობს. მაგრად რომ არ ცეკვავდეს, ამ პროექტშიც არ იქნებოდა.

- ჭაჭუასთან ცეკვა "ჩააწყვე"?

- არ ჩამიწყვია (სიცილით ამბობს). ამასთან, სალომეს მეწყვილეობით მიმაჩნია, რომ დიდად არც გამიმართლა, რადგანაც ჩემგან გაცილებით მეტს მოელიან. რაც შეეხება "ჩაწყობას", რანაირად "ჩავაწყობდი?" მაგ დროს, როცა გადაწყვიტეს, რომ სალომე ჩემი პარტნიორი უნდა ყოფილიყო, საქართველოში არ ვიყავი. ნაკრებთან ერთად, შეკრებაზე გახლდით.

- რეპეტიციებზე "გაწამებს" სალომე?

- "წამებით" რა გითხრათ და შენიშვნებს მაძლევს, როცა რაღაც მეშლება. როდესაც დაღლილი, კალათბურთის ვარჯიშიდან რეპეტიციაზე მოვდივარ, რა თქმა უნდა, რაღაც მეშლება... ეს ჯანსაღი, სასწავლო პროცესია და ასეც უნდა იყოს. შეცდომები კიდევაც მექნება, სხვანაირად არც იქნება. მეც რომ პედაგოგი ვიყო და მოწაფე ჩემს მითითებებს არ ასრულებდეს, შენიშვნებს მეც მივცემდი. ამიტომ ბუნებრივი რამ არის, როცა პროფესიონალი მოცეკვავე თავის არაპროფესიონალ მეწყვილეს შენიშვნებს აძლევს.

- "ქართული ცეკვების" ტურისთვის როგორ ემზადები?

- "დავლურს" ვცეკვავ და ძალიან მსიამოვნებს. მნიშვნელობა როგორ არ ჰქონდა იმას, რომელს ვიცეკვებდი, რადგანაც რამდენიმე ცეკვა მაქვს, რომლებიც მიყვარს და ნებისმიერ მათაგნს, სიამოვნებით წარმოვადგენდი. მათგან ერთ-ერთი "დავლურია". ეს ცეკვა ჩემს ქორწილშიც ვიცეკვე. ასეთი სახით არა, მაგრამ რაღაც ელემენტები ვიცოდი... მინდა, რომ ხვალ კარგად შევასრულო და ხალხს მოეწონოს.

- ამ დღისთვის სპეციალური სამოსიც შეგიკერეს?

- კი, რა თქმა უნდა, აი, ხედავთ, როგორი აზიაცკები მაცვია?.. ჩოხა სუხიშვილების კოსტიუმებიდან იქნება, რის გამოც დიდ მადლობას გადავუხდი და საერთოდ, მადლობა სუხიშვილების მოცეკვავეებს, ამ ცეკვის მომზადებაში ძალიან მეხმარებიან. სწორ შენიშვნებს მაძლევენ და კარგად მიხსნიან.

- ცოლს მოცეკვავის ამპლუაში მოსწონხარ?

- ცოლს კი არ მოვწონვარ, ვუყვარვარ და ამიტომაც გამომყვა. საერთოდ, ერთად გადავწყვიტეთ, რომ ამ პროექტში მონაწილეობა მიმეღო. ჩემს მეუღლეს მართლა მოსწონს, რასაც ვაკეთებ. რა საქმესაც არ უნდა მოვკიდო ხელი, ყოველთვის გვერდში მიდგას.

- მოკლედ, ცეკვა ისწავლე, ხომ?

- ცეკვა ვიცოდი, მაგრამ პროფესიონალურად - არა. გადაღლილი და ნერვებმოშლილი კი ვარ, მაგრამ ცუდ საქმეს არ ვაკეთებ. ისე, სულ პარკეტზე კი მიწევს ყოფნა კალათბურთზეც და ცეკვებზეც, მაგრამ ორივე ძალიან მაგარია! ალბათ ცოტა ხანში პარკეტის დაგებასაც დავიწყებ...

პუსკა გამსახურდია, სუხიშვილების სოლისტი:

- უკვე მესამე წელია, აქტიურად ვადევნებ თვალყურს ამ პროექტს. არავის ეწყინოს, მაგრამ წელს ძალიან კარგი შემადგენლობაა. მთლიანობაში მონდომებულები, მშრომელები არიან... რაც შეეხება ტოლიკას, მოწესრიგებული და პუნქტუალურია. ამასთან, აქვს კარგი იუმორის გრძნობა, რასაც რეპეტიციაზე ავლენს. ხალისიანი და საერთოდ, კარგი ადამინია. შესაძლებლობის მაქსიმუმს აკეთებს. მეც შესაბამისად ვეხმარები. ამ ცეკვას, რასაც ახლა ვამზადებთ, ძალიან კარგად ასრულებს. თან, სალომე ჭაჭუას პარტნიორობა ადვილი საქმე არ არის, მაგრამ თავს ართმევს. არადა, მართლა რთულია ადამიანს, რომელსაც შეხება არ აქვს ცეკვასთან, მით უმეტეს, კალათბურთელია, ამ სიმაღლე კაცმა ერთ კვირაში ცეკვა ისწავლოს. ამისთვის სითამამეც გჭირდება, რომ ამხელა პუბლიკის წინაშე წარსდგე, როგორც მოცეკვავე. ვფიქრობ, რომ ეს ტური კარგი სანახავი იქნება და მაყურებელიც და ჟიურიც კმაყოფილი დარჩება.

ლალი ფაცია

სპეციალურად "ამბები.გე"-სთვის

ასევე იხილეთ:

-გლადიატორის და ვეფხვის შერკინება - ბოისა-ჭაჭუას "პასო დობლე" და პირველი 40 ქულა

-სალომე ჭაჭუას ცეცხლოვანი "ჯაივი" ანატოლი ბოისასთან