რით შეაშინა მანიკა ასათიანმა თანაწამყვანი

ახალი სატელევიზიო სეზონიდან, "მაესტროს" დილის ეთერი მანიკა ასათიანისა და ლევან ჟორჟოლიანის შეხმატკბილებულმა ტანდემმა დაიკავა. თანაწამყვანები ეკრანს მიღმაც მეგობრობენ, მაგრამ გაირკვა, რომ რაღაც პერიოდის განმავლობაში, ლევანს მანიკასი "ეშინოდა", "დაუნდობელი" თანამშრომლები კი მის დაბეზღებას არ ერიდებოდნენ...

ლევანი:

- მანიკა "მაესტროში" გავიცანი და ერთმანეთს თანდათან დავუახლოვდით.

- მანამდე მანიკას შესახებ არაფერი იცოდი?

- როგორ არა! "რუსთავი 2"-ის დილის ეთერიდან მახსოვდა. მერე გონებაში აღვიდგინე, რომ "ჯეოსტარშიც" მონაწილეობდა.

მანიკა:

- ერთმანეთს ადვილად გავუგეთ, რადგან კონფლიქტური და რთული ხასიათის მქონე არც მე ვარ და არც - ლევანი. თავდაპირველად, 4 წამყვანი ვიყავით. 4 ადამიანის ერთმანეთთან შეგუება უფრო რთულია, მაგრამ ჩვენს შემთხვევაში, სხვაგვარად იყო - ერთად ყველანი კარგად ვგრძნობდით თავს. ახალი სეზონის გადაცემის დაწყებამდე არ ვიცოდით, რომ წამყვანები მხოლოდ ჩვენ ვიქნებოდით... ზაფხულში მე და ლევანმა ტრენაჟორებზე სიარულიც ერთად მოვინდომეთ.

- შენც წონის პრობლემა გქონდა?

- არა. უბრალოდ, სხეულის გასამკვრივებლად, ენერგიის მოსამატებლად ვვარჯიშობდი. ლევან, ახლა თქვი, რომ ვარჯიში მე გაიძულე!

ლევანი:

- კი, მართლა მანიკამ მაიძულა. მითხრა, - ახალგაზრდა ბიჭი რას ჰგავხარო (იცინის)?! გასული სეზონის ბოლო გადაცემის ფოტო რომ ვნახე, ლამის გული გამისკდა: მაშინ 90 კილო ვიყავი, ახლა 74-ზე "ჩამოვედი".

მანიკა:

- ვაკონტროლებდი, ლუკმებს ვუთვლიდი. ერთი პერიოდი, თანამშრომლები ჩემთან აბეზღებდნენ, - ლევანი ქვემოთ ხაჭაპურს ჭამს და გვეუბნება, - მანიკას არ უთხრათო. ჩემი ეშინოდა (იცინის).

ლევანი:

- ყველაზე საინტერესო ის არის, რომ კვების რეჟიმი თვითონვე დამარღვევინა: "ჟელიბონი" იყიდა, მე კი ცდუნებას ვერ გავუძელი.

მანიკა:

- ჰო, მაგრამ ეგ ამბავი გუშინ მოხდა, როცა უკვე 15 კილო გქონდა დაკლებული. ახლა წონა უნდა ვუკონტროლო, რომ არ მოიმატოს.

- ახალი რუბრიკა დაგემატათ - პროფესიონალი ტანმოვარჯიშე გამამხნევებელ ვარჯიშს გვთავაზობს. მისი რჩევებით სარგებლობთ?

- სტუდიის პირობებში ვარჯიშის საშუალება ნამდვილად არ გვაქვს. ზოგადად, მიმაჩნია, რომ ნებისმიერი ადამიანისთვის თათია დონაძის მიერ შემოთავაზებული ვარჯიშები აუცილებელია - თუნდაც იმიტომ, რომ დილა ენერგიულად დაიწყოს, გამოფხიზლდეს...

ლევანი:

- ტრენაჟორებზე სიარული დროსთან და ხარჯებთან არის დაკავშირებული და შეიძლება, ბევრისთვის ხელმისაწვდომი არ იყოს. ჩვენი ეთერის მეშვეობით კი შეგიძლიათ, 5 წუთის განმავლობაში ივარჯიშოთ.

მანიკა:

- ასევე შეგიძლიათ, მოძრაობები დაიმახსოვროთ და დღის ნებისმიერ მონაკვეთში გაიმეოროთ. ახლა მე და ლევანი იოგაზე სიარულს ვაპირებთ.

- მანიკა, ლევანი როგორი ბიჭია?

- ძალიან აქტიური, მეგობრული და რაც მთავარია, ჭკვიანი. ურთიერთობაში თავისუფალია - ნებისმიერ საკითხში "აგყვება" და დაგეხმარება, ყველაფერში ხელს შეგიწყობს. ძალიან კარგი პარტნიორია.

- ლევან, მანიკას როგორ დაახასიათებ?

- გარდა იმისა, რომ ულამაზესია, ძალიან მეგობრული, დადებითი პიროვნებაა. როცა სამსახურში გაცილებით მეტ დროს ატარებ, ვიდრე - სახლში, სამსახური შენი მეორე ოჯახი ხდება. გვერდით ისეთი ადამიანი გჭირდება, ვინც შენს ჭირსა თუ ლხინს გაიზიარებს. მიხარია, რომ მანიკა ასათიანის სახით, იდეალური თანამშრომელი და კარგი მეგობარი მყავს.

- ალბათ გაგიხარდათ, როცა შეიტყვეთ, რომ მეგობრებს, გადაცემის ერთად წაყვანა მოგიწევდათ...

მანიკა:

- დარწმუნებული ვარ, ერთმანეთს ლევანი და ნინუცაც კარგად შეეწყობოდნენ, ასევე - მე და კახაც. ამის პრობლემა არ იყო. უბრალოდ, გადაცემის წარმომადგენლებმა გადაწყვიტეს, რომ ნინუცა და კახა საკუთარ რუბრიკებს უფრო მოუხდებოდნენ. გულიც დაგვწყდა, რომ ორნი დავრჩით, მაგრამ მუშაობა ნამდვილად არ გაგვჭირვებია.

ლევანი:

- ჩვენთვის ერთგვარი რიტუალი იყო, როცა გადაცემის დასრულების შემდეგ, ოთხივე კაფეში ჩავდიოდით, ვსაუბრობდით, სხვადასხვა საკითხს განვიხილავდით...

- სიუჟეტების მომზადება აღარ გიწევთ. ამის გამო, საქმე ხომ არ გაგიიოლდათ?

- როცა ეთერში 4 თანაწამყვანია, შეიძლება, გარკვეულ მომენტში მოდუნდე. ახლა მხოლოდ ორნი ვართ და აქტიურები უნდა ვიყოთ: მანიკას მიერ მოთხრობილ კულტურის ამბებს ვისმენ, რომ შემდეგ რეპლიკა "გავაკეთო"... პასუხისმგებლობა მოგვემატა.

მანიკა:

- სიუჟეტებს რაც შეეხება, უბრალოდ, ის დრო დაგვეზოგა, რასაც მათ მომზადებას ვანდომებდით, თორემ ვერ ვიტყვით, რომ საქმე გაგვიიოლდა.

ლევანი:

- გადაცემის დამთავრებისთანავე, მეორე საეთერო დღისთვის ვემზადებით: ტექსტებს თავად ვადგენთ, რესპონდენტებს ვარჩევთ...

- თქვენი აზრით, დილის გადაცემაში თქვენი ტანდემი რატომ აირჩიეს?

მანიკა:

- წინა ფორმატში ყველას ჩვენ-ჩვენი საქმე გვქონდა გადანაწილებული: მე სიუჟეტებს კულტურის, მოდის სფეროს, ხელოვნების შესახებ ვამზადებდი, ლევანი პრესას და ინტერნეტის ამბებს მიმოიხილავდა, სამუშაოდ უფრო სერიოზულ თემებს იღებდა; ნინუცას და კახას "კვირეულები" ჰქონდათ... ახლა ერთი მთავარი თემა გვაქვს, რომელზეც ვსაუბრობთ. მე კვლავ კულტურის ამბებს ვუძღვები, ლევანს კი თავის სფეროში შემცვლელი არ ჰყავს: ვერ წარმომიდგენია, რომ კახა გაზეთებთან იჯდეს და პრესას მიმოიხილავდეს. ნინუცაც და კახაც მსახიობები არიან და საკუთარ პროფესიულ ნიჭს სიუჟეტებში კარგად ამჟღავნებენ.

ლევანი:

- მათი გარდასახვა ძალიან მომეწონა, მაგალითად - კახა პიცის მცხობლის ამპლუაში (იცინის).

- შენ და ლევანი საკვებზე საუბრის გარდა, კიდევ რაზე კამათობთ?

მანიკა:

- წეღან ვიკამათეთ: ლევანს პიცა უნდა და პიცერიაში მეპატიჟება, მე კი ჩიზბურგერი მინდა (იცინიან)...

- სამუშაო დღეს როდის ამთავრებთ?

- ისეთ სფეროში ვმუშაობთ, სამუშაო საათებს ზუსტად ვერ გათვლი: შეიძლება, გადაცემის დასრულების შემდეგ 1 საათში გავთავისუფლდეთ (ეს ძალიან იშვიათად ხდება), მაგრამ უკან მობრუნება გვიწევს; შეიძლება, მთელი დღე ტელევიზიაში ვიყოთ, მაგრამ საქმე კიდევ ვერ დავასრულოთ... საშუალოდ, დღის 4 საათამდე ვმუშაობთ.

- თავისუფალ დროს როგორ ატარებთ?

ლევანი:

- მალე მაგისტრატურაში (მედიის კვლევების განხრით) სწავლა მეწყება. სავარაუდოდ, საღამოს ლექციებზე მომიწევს სიარული. ჯერჯერობით, თავისუფალ დროს მეგობარს ვუთმობ ან შინ მივდივარ, ვსადილობ...

მანიკა:

- სახლში ასვლის წინ საკვებ პროდუქტებს ყიდულობს. ოჯახის ბიჭია (იცინის).

ლევანი:

- ეს იმიტომ, რომ ძირითადად, მარტო ვცხოვრობ.

მანიკა:

- ჩემი აზრით, საკუთარი საქმე ნებისმიერი ქალისთვის აუცილებელია, მაგრამ სამსახურის მერე დროს აუცილებლად, შვილთან ერთად ვატარებ...

ეთო ყორღანაშვილი

ჟურნალი ”გზა”

(გამოდის ხუთშაბათობით)