თბილისის ზღვაზე 15 წლის გოგონა დაიხრჩო

თბილისის ზღვაზე მდებარე "იახტ კლუბთან" 15 წლის გოგონა დაიხრჩო. როგორც "ინტერპრენსიუსს" სამაშველო სამსახურიდან აცნობეს, მომხდარის შესახებ ინფორმაცია დღეს 13.40 საათზე მიიღეს. შემთხვევის ადგილზე სამაშველო სამუშაოები ოპერატიულად დაიწყო, თუმცა ცხედრის პოვნა და ნაპირზე ამოტანა 15.30 საათისთვის დასრულდა.

შემთხვევის ადგილზე მობილიზებული იყო თბილისის სასწრაფო-სამედიცინო დახმარებაც, რომლის ექიმებს გოგონას გადარჩენა აღარ შეეძლოთ და გარდაცვალების ფაქტი დააფიქსირეს.

15 წლის ლ.მ. ორ თანაკლასელ გოგონასთან ერთად თბილისის ზღვაზე ვარკეთილის დასახლებიდან მივიდა.

ცუდი ამინდის მიუხედავად, კლასელებმა ცურვა გადაწყვიტეს. ორი მათგანი ნაპირზე გამოვიდა, მესამე კი დაიხრჩო. სიკვდილის მიზეზს გამოძიება დაადგენს.

"ინტერპრესნიუსი"