26
მარტიდღის ზოგადი ასტროლოგიური პროგნოზი
სირიის პრეზიდენტი ბაშარ ჰაფეზ ალ-ასადი 1965 წლის 11 სექტემბერს დამასკოში, სირიის სამხედრო-საჰაერო და ჰაერსაწინააღმდეგო თავდაცვის ძალების ბრიგადის გენერალ ჰაფეზ ასადისა და მუსლიმანური რელიგიური უმცირესობა ალავიტების წარმომადგენელ ანისა მაჰლუფის ოჯახში დაიბადა. 5 წლის შემდეგ, 1970 წლის ნოემბერში ასადი-უფროსი, რომელსაც უკვე სირიის თავდაცვის მინისტრის პოსტი ეკავა, სამხედრო გადატრიალების შედეგად, ხელისუფლების სათავეში მოვიდა - 1971 წლის მარტში იგი ქვეყნის პრეზიდენტად აირჩიეს, ოდნავ მოგვიანებით სათავეში ჩაუდგა მმართველ პარტია "ბაასს". ბაშარ ასადი თავდაპირველად ელიტურ არაბულ-ფრანგულ ლიცეუმ "ჰურიაში" სწავლობდა დამასკოში, სადაც ფრანგულ და ინგლისურ ენებს დაეუფლა. 1982 წელს მან ლიცეუმი დაამთავრა, თუმცა შუალედში სამხედრო სამსახურშიც იყო, საიდანაც სერჟანტის წოდებით იქნა დემობილიზებული.
ამის შემდეგ ასადმა დამასკოს უნივერსიტეტის სამედიცინო ფაკულტეტზე ჩააბარა, რომელიც 1988 წელს წარჩინებით დაამთავრა და უდიდეს სამხედრო ჰოსპიტალ "ტიშრინში" ოფთალმოლოგად დაიწყო მუშაობა. 1991 წელს ასადი სტაჟირებაზე ლონდონში, წმიდა მარიას საავადმყოფოსთან არსებულ ოფთალმოლოგიის ცენტრ Western Eye Hospirtal-ში გაემგზავრა და ფსევდონიმიც შეირჩია, რათა მშვიდად მუშაობის საშუალება ჰქონოდა. იგი პოლიტიკურ სფეროებში არ ტრიალებდა. მომავალი მეუღლე ასმა აჰრასი ლონდონში სტაჟირებისას გაიცნო. 1994 წლის 21 იანვარს ბაშარ ასადის უფროსი ძმა ბასელი, რომელსაც მამამისი თავის მემკვიდრედ ამზადებდა, საავტომობილო კატასტროფაში დაიღუპა. ბაშარ ასადმა დაუყოვნებლივ დატოვა ლონდონი და დამასკოში დაბრუნდა, სადაც სახელმწიფო მეცნიერებები "დაჩქარებული კურსით" გაიარა: ქალაქ ჰომსში სამხედრო აკადემიაში ჩააბარა და კაპიტნის რანგში უკვე სატანკო ბატალიონს ხელმძღვანელობდა, შემდეგ სათავეში ჩაუდგა რესპუბლიკურ გვარდიას და 1999 წლის იანვარში პოლკოვნიკის წოდებაც მიიღო. 2000 წელს კი, ქვეყნის მეთაურის სიკვდილის შემდეგ, პრეზიდენტის მოვალეობის შემსრულებელმა, პირველმა ვიცე-პრეზიდენტმა ჰადამმა ბაშარ ასადს გენერალ-ლეიტენანტის წოდება მიანიჭა და არმიის მთავარსარდლად დანიშნა. სირიის პარლამენტმა კი კონსტიტუცია შეცვალა და საგანგებოდ ბაშარ ასადისთვის პრეზიდენტობის კანდიდატის ასაკი 40-დან 34 წლამდე შეამცირა. იგი სათავეში ჩაუდგა პარტია "ბაასის" სირიის განყოფილებას და ქვეყნის ახალ პრეზიდენტადაც აირჩიეს. ასე იქცა ოფთალმოლოგი ქვეყნის მეთაურად. 2007 წლის 27 მაისს სირიაში მორიგი რეფერენდუმი გაიმართა ქვეყნის მეთაურად ასადის ხელახლა ასარჩევად. საარჩევნო ბიულეტენი მხოლოდ ერთი კითხვას შეიცავდა: "ანდობთ თუ არა ბაშარ ასადს ქვეყნის მართვას 2014 წლამდე?". რეფერენდუმის შედეგებით ბაშარ ასადი ქვეყნის მეთაურის პოსტზე მეორე ვადითა და ხმათა 97.62 %-ით ხელახლა აირჩიეს. ჰაფეზ ასადის მმართველობის პერიოდში სირიის საგარეო პოლიტიკა, უპირველესად, არაბეთ-ისრაელის დაპირისპირების კონტექსტში განიხილებოდა. ხელისუფლების სათავეში მოსულმა ბაშარ-ასადმა აღნიშნა, რომ მამამისის პოზიციებიდან არ გადაუხვევდა ოკუპირებული ტერიტორიებიდან ისრაელის ჯარების გაყვანის საკითხში. აშშ, ისრაელი და დასავლეთის ქვეყნები იმხანად სირიას ისრაელის მოწინააღმდეგე გასამხედროებული დაჯგუფებების მატერიალურ-ტექნიკურ მხარდაჭერაში ადანაშაულებდნენ. თავად სირია ამგვარ ბრალდებებს უარყოფდა. ამასთან, ასადი ისრაელთან მშვიდობიანი დიალოგის აღდგენის შესაძლებლობასაც არ უგულებელყოფდა. აშშ-თან კი სირიას რთული ურთიერთობები ჰქონდა, 2002 წლის 7 მაისს ამერიკის ადმინისტრაციამ სირია პროგრამა "ბოროტების ღერძში" ჩართო, რადგან, ზოგიერთი ცნობით, ერაყის 2003 წლის ომამდე, ის სადამ ჰუსეინის რეჟიმს იარაღით ამარაგებდა. 2011 წლის მარტში სირიაში მღელვარების დაწყების ბიძგად იქცა დერააში პოლიციის მიერ იმ მოზარდების დაკავება, რომლებიც შენობებზე ანტისამთავრობო ლოზუნგებს აწერდნენ. 18 მარტს დერააში ანტისამთავრობო გამოსვლა დაიწყო, რომლის დასაშლელადაც ხელისუფლებამ ძალა გამოიყენა, რასაც მომიტინგეთა შორის მსხვერპლი მოჰყვა. სწორედ ამ დროიდან დაიწყო სირიაში სამოქალაქო ომი, რომელსაც ასეულობით ათასი ადამიანი შეეწირა.
ნანა ჩარკვიანი
ყოველკვირეული გაზეთი "ყველა სიახლე"
(გამოდის ოთხშაბათობით)
