მნიშვნელოვანი ინფორმაცია
1
აპრილიდღის ზოგადი ასტროლოგიური პროგნოზი
სამშაბათი, მთვარის მეოთხე დღე დაიწყება 07:33-ზე, მთვარე კუროშია
კარგი დღეა ახალი საქმეების დასაწყებად. აგრეთვე დაკარგული ნივთების, ადამიანების მოსაძებნად. გააფართოეთ ბიზნესი, დაარეგულირეთ ურთიერთობა ბიზნესპარტნიორებთან. მოაგვარეთ ფინანსური საკითხები. არასასურველია უძრავი ქონებით ვაჭრობა. მოერიდეთ კამათს, საქმეების გარჩევას. კარგი დღეა სწავლისთვის, სამეცნიერო სამუშაოსთვის, გამოცდის ჩაბარება სხვა დღისთვის გადადეთ. ცუდი დღეა მოგზაურობის დასაწყებად, შორ მანძილზე მგზავრობისთვის. შეძლებისდაგვარად მოუარეთ ყვავილებს, დარგეთ ხეები, გაისეირნეთ ბუნებაში. მოერიდეთ ალკოჰოლს, სიგარეტს, კუჭის გადატვირთვას; ოპერაციების ჩატარებას კისერსა და ყელზე. რაციონიდან გამორიცხეთ პროდუქტები, რომლებიც სახამებელსა და ნახშირწყლებს შეიცავს.
მნიშვნელოვანი ინფორმაცია
მკითხველის რჩევით
კვირის კითხვადი სტატიები
თვის კითხვადი სტატიები
ასევე დაგაინტერესებთ
ლიკა ლაბაძე - არჩევნის წინაშე რომ დავდგე, შეიძლება, საყვარელ მამაკაცს კარიერული წინსვლა ვარჩიო
23:10 / 20-07-2013
"ამაყი და დაუმორჩილებელია. ვერ ეგუება ჩარჩოებს, შეზღუდვებს, აკრძალვებს. უყვარს ლიდერობა და ამას არც მალავს. საყვარელი ადამიანისთვის ყველაფერზე წავა. მისთვის იუმორი ერთ-ერთი საბრძოლო იარაღია; ის ხუმრობს, ცრემლი რომ დამალოს", - ასე ახასიათებენ ასტროლოგები ვეფხვის წელში დაბადებულ თევზებს, ეს კი ტელეწამყვან ლიკა ლაბაძის ზოდიაქოს ნიშანია.
- ასტროლოგიით რამდენად ხარ დაინტერესებული?
- ჩემი ზოდიაქოს ნიშნის დახასიათება წაკითხული მაქვს და საკუთარ ხასიათთან ბევრი მსგავსება აღმოვაჩინე და ბევრი პარალელიც გავავლე. ყოველკვირეული პროგნოზის ნაკლებად მჯერა და არც პირადი ჰოროსკოპის შედგენის სურვილი მაქვს - არ მინდა, მასზე "დამოკიდებული" გავხდე.
- "უყვარს ლიდერობა და ამას არც მალავს; ეს თვისება ბავშვობიდან სისხლში აქვს გამჯდარი".
- ეს სიმართლეა. საზოგადოებაში, სამსახურში და ა.შ. ჩემი ადგილი თუ არ მაქვს, იქ საერთოდ არ ვჩერდები. ბავშვობიდან ასე ვარ, ბაღის ზეიმებზეც ყოველთვის წინ ვიდექი.
- "ამაყი და დაუმორჩილებელია".
- ჰო, ჩემი დამორჩილება მგონი, შეუძლებელიც კია. სიამაყე ცოტათი მაინც თუ არ გაქვს სისხლში გამჯდარი, ლიდერი ვერ იქნები. მთავარია, ეს ამპარტავნებაში არ გადაიზარდოს. ყოველთვის ვცდილობ, თავმდაბალი ვიყო და სიამაყე არ მომერიოს.
- "ვეფხვი ვერ იტანს დაქვემდებარებულის როლში ყოფნას, რის გამოც, ხშირად კონფლიქტშია ზემდგომებთან".
- კონფლიქტური საერთოდ არ ვარ. ადამიანები ამბობენ, რომ ჩემთან თანამშრომლობა, მეგობრობა ძალზე კომფორტულია. ყოველთვის ვცდილობ, ემოციები ვმართო და როცა რაიმე არ მომწონს, ყველაფერს ცივილიზებული გზით ვაგვარებ. ჯანსაღი დიალოგი პრობლემის მოგვარების საუკეთესო საშუალებაა.
- "რისკი და დაუფიქრებელი ქმედებები მისთვის უცხო არ არის".
- გაუაზრებლად არასდროს ვრისკავ. გული მიგრძნობს, როდის უნდა გავრისკო და როდის - არა. ცვლილებებს არ ვუფრთხი. ვფიქრობ, კარგი ინტუიცია მაქვს. როცა ამა თუ იმ ნაბიჯს ვდგამ, წინასწარ ვხვდები, რისკის შედეგი რა იქნება.
- "მას შესწევს ძალა, საყვარელ საქმეს თავი ბოლომდე მიუძღვნას, მაქსიმალურად დაიხარჯოს".
- როცა იმ საქმეს ვაკეთებ, რომელიც მომწონს და მიყვარს, თავდაუზოგავი შრომა შემიძლია. მეგობრები მეუბნებიან: ყოველ დილით 5 საათზე როგორ იღვიძებო? არადა, მარტო გაღვიძება ხომ არ არის საქმე? კარგად გამოფხიზლებულიც უნდა იყო, მაყურებელს დადებითი ენერგია რომ გადასცე, დილა გაუხალისო. ყოველი ეთერი მინისპექტაკლია, რომელსაც შევწირე მეგობრები, გართობა და შეიძლება ითქვას, პირადი ცხოვრებაც. შინ დაბრუნებული, შუადღეს აუცილებლად ვისვენებ, საღამოს 9 საათზე კი ვიძინებ (იღიმის)...
- "ხშირად სიჯიუტე და მეწვრილმანეობა უშლის ხელს იმაში, რომ მიზნის მიღწევა უკონფლიქტოდ შეძლოს".
- ჯიუტი ვარ, მაგრამ ამ თვისებას ოჯახის წევრებთან, ახლობლებთან უფრო მეტად ვავლენ, ვიდრე - სამსახურში. სიჯიუტე საქმის კეთებაში ხელს არ მიშლის. უფროსის აზრს ყოველთვის ვითვალისწინებ.
- "ვერ ეგუება ჩარჩოებს, შეზღუდვებს, აკრძალვებს".
- ნამდვილად ასეა (იცინის), მაგრამ საქართველოში ამ თვისებით ცხოვრება ძნელია. ასე მგონია, აქ ყველა ერთმანეთს ეჯიბრება. საზოგადოებაში თავისუფლების ხარისხი ძალიან დაბალია. ქუჩაში რომ გახვალ, ყველა შენ გიყურებს და იძულებული ხარ, თითოეული ნაბიჯი გააკონტროლო. საიდანღაც მოტანილი სტერეოტიპებით ცხოვრობენ: ვითომ კარგი თბილისელი გოგონები ახლა აუცილებლად, დაბალქუსლიან ფეხსაცმელს იცვამენ; ქუჩაში მაღალქუსლიანით თუ გახვედი, ე.ი. ბანძი ხარ; აუცილებლად სლენგით უნდა ილაპარაკო და ა.შ. ამ ყველაფერზე მეცინება. ასეთ ადამიანებთან ურთიერთობა არ შემიძლია.
- "ფულსა და დიდებას შორის არჩევანი რომ გააკეთებინოთ, დიდებას აირჩევს".
- აუცილებლად ასე მოხდება. ბევრი სამსახურზე უარს დაბალი ანაზღაურების გამო ამბობს, ჩემთვის კი ეს მეორეხარისხოვანია. მთავარია, მიყვარდეს საქმე, რომელიც უნდა ვაკეთო. შეიძლება, ასე იმიტომ ვფიქრობ, რომ ოჯახი ჩემს ხელფასზე არ არის დამოკიდებული, შვილები არ მყავს სარჩენი.
- "ექსტრიმით სავსე ცხოვრება აქვსო..."
- მართალია. თხილამურებზე დგომაც მომწონს, პარაშუტიდან გადმოხტომაც, მაგრამ თუ ვიგრძნობ, რომ ჩემს სიცოცხლეს საფრთხე ემუქრება, ამას არ გავაკეთებ. ექსტრემალი კარიერაშიც ვარ.
- "მისი ნიჭია, იბრწყინოს საზოგადოებაში. ვეფხვი ყოველთვის კრებს თანამოაზრეთა დიდ ჯგუფს, რაც ეხმარება იმაში, რომ ნებისმიერ სირთულეს თავი ღირსეულად დააღწიოს".
- ხშირად, სირთულეებიდან თავის დაღწევას კარგად განვითარებული ინტუიციის წყალობით ვახერხებ. რთული მდგომარეობიდან გამოსასვლელ გზას ყოველთვის ვპოულობ.
- "თევზები უმეტეს შემთხვევაში, დინებას მიჰყვებიან".
- მე განსხვავებული თევზი ვარ.
- როგორი?
- ბრძოლისუნარიანი. დინებას არასდროს მივყვები და ვფიქრობ, ამაში ვეფხვის თვისებები მეხმარება. ცხოვრებაში არაერთი სირთულის წინაშე ვმდგარვარ, მაგრამ არ დავცემულვარ, ტკივილი და განსაცდელი ღირსეულად გადამიტანია.
- რთული პერიოდები პირად ცხოვრებაში გქონდა თუ კარიერაში?
- ორივეგან მქონდა. სიყვარულში იმედგაცრუებაც გადამიტანია. ცხოვრებას თავად ვირთულებ, რადგან მიზნამდე მისასვლელად ყოველთვის რთულ გზას ვირჩევ. მუდმივად მაქვს სურვილი, ვაკეთო ის, რაც აქამდე არ მიკეთებია. ტანჯვის, დიდი შრომის, დავარდნისა და ადგომის შედეგად მიღწეულ გამარჯვებას სულ სხვა გემო აქვს. ამ ყველაფრის გარეშე ჩემი ცხოვრება ვერ წარმომიდგენია.
- "მისთვის იუმორი ერთ-ერთი საბრძოლო იარაღია; ის ხუმრობს, რათა დამალოს ცრემლი".
- ძალიან რთულია, ვინმემ ამატიროს. არ მსიამოვნებს, როცა საკუთარ სისუსტეს თავადვე ვგრძნობ. ჩემს იუმორზე კი აბა, რა გითხრა? ამ "საბრძოლო იარაღის" ნაკლებობას მართლაც, არ ვუჩივი.
- "პესიმიზმსა და ოპტიმიზმს შორის მუდმივად მერყეობს".
- უფრო სწორი იქნება, თუ ვიტყვი, რომ გადაწყვეტილების მიღება მიჭირს. როცა გაორება მეწყება, რჩევას ახლობლებს ვეკითხები.
- "ოცნების სამყაროში ცხოვრობს, ქრონიკული მეოცნებეა".
- ქრონიკული მეოცნებე თინეიჯერობის წლებში ვიყავი, ახლა კი გავიზარდე და მივხვდი: ადამიანი თუ ძალიან მოინდომებს, ყველა ოცნების ასრულებას შეძლებს.
- წარსულში აუხდენელი ოცნება არ დაგრჩენია?
- არა. ახლაც მაქვს ოცნებები, რომლებიც შეიძლება, ბევრისთვის არარეალური იყოს, მაგრამ მე დარწმუნებული ვარ, აუცილებლად ავიხდენ!
- რაზე ოცნებობ?
- ამაზე წინასწარ ლაპარაკი არ მინდა; რომ ავისრულებ, მერე გეტყვი (იღიმის).
- "საყვარელი ადამიანისთვის ყველაფერზე წამსვლელია".
- მთლად ასეც არ არის: არჩევნის წინაშე რომ დავდგე, შეიძლება, კარიერული წინსვლა ვარჩიო.
- ორივეში წარმატებული რომ იყო...
- ასე მგონია, ერთ-ერთს რაღაცას დავაკლებ. ასე რომ არ ვფიქრობდე, აქამდე გავთხოვდებოდი. ადამიანების უმეტესობას ან პირად ცხოვრებაში უმართლებს, ან კარიერაში. ორივეგან წარმატებული იშვიათად შემხვედრია.
- შეყვარებული ხარ? ქალაქში შენი და გენო მალაზონიას რომანზე ლაპარაკობენ...
- პირად ცხოვრებაზე ლაპარაკი არ მინდა.
- "ძალიან მიმნდობია, ამიტომ მისი მოტყუება ადვილია..."
- მხოლოდ ძალიან ახლობელ ადამიანებს ვენდობი. ვფიქრობ, ჩემი მოტყუება ადვილი არ არის.
- წყალი გიყვარს?
- ძალიან. წვიმაც მიყვარს. ზღვაში იმდენად ღრმად შევდივარ, ნაპირი აღარ ჩანს ხოლმე.
- მალე შვებულებაში გადიხარ. დასვენებას სად აპირებ?
- ამ სეზონზე იმდენად გადავიღალე, რომ აუცილებლად, კარგ დასვენებას მოვიწყობ. 10 დღე ზღვის სანაპიროზე ვერ წამოვწვები, ამას აქტიური დასვენება მირჩევნია. სავარაუდოდ, წელს იტალიას ვესტუმრები.
თამუნა კვინიკაძე
(გამოდის ხუთშაბათობით)
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
კადრები: რა ხდებოდა 2 ძლიერი მიწისძვრის დროს მიანმარში? - დაღუპულთა რაოდენობა 1 000-ს გასცდა
კვირის კითხვადი სტატიები
მნიშვნელოვანი ინფორმაცია
მკითხველის რჩევით
