31
მარტიდღის ზოგადი ასტროლოგიური პროგნოზი
ელიტარული ალკოჰოლის მწარმოებელ კომპანიას "ასკანელი ძმები" პრესტიჟული ჯილდო "ხარისხის ნიშანი" გადაეცა. ცერემონია კაფე-რესტორან "ფოლკ გარდენში" გაიმართა. საპატიო ჯილდო კომპანიის დამფუძნებელს ჯიმშერ ჩხაიძე ასკანელს "ხარისხის ნიშნის" პრეზიდენტმა გრიგოლ კუნჭულიამ გადასცა.
კომპანიამ წარმატებით გაიარა ერთთვიანი კომპლექსური და მასშტაბური შემოწმება, რის შედეგადაც 3 წლის ვადით ხარისხის ნიშნის მფლობელი გახდა. სავალდებულო კონტროლს კი ყოველ მომდევნო წელს გაივლის.
როგორც "ხარისხი ნიშნის" პრეზიდენტი გრიგოლ კუნჭულია აცხადებს, "ხარისხის ნიშნის მისაღებად კომპანიამ "ასკანელი ძმები" უმკაცრესი კონტროლი გაიარა და ყველა პარამეტრით უმაღლესი შეფასება მიიღო. "ხარისხის ნიშნის" სერთიფიკატი ეს არის პროდუქციის მაღალი ხარისხის დამადასტურებელი მოწმობა. კომპეტენტურმა სპეციალისტებმა შეისწავლეს და შეაფასეს ხარისხის მენეჯმენტი, ჩაატარეს დოკუმენტების ანალიზი, შეამოწმეს ტექნოლოგიები და ტექნიკური აღჭურვილობა, პერსონალის კვალიფიკაცია, ხარისხის მართვის სისტემა, ობიექტების მდგომარეობა, წარმოების პირობები, სანიტარულ-ჰიგიენური ნორმები და მოხარული ვარ, რომ შეგვიძლია ასეთ ღირსეულ და წარმატებულ კომპანიას გადავცეთ ეს საპატიო სერთიფიკატი", - აცხადებს გრიგოლ კუნჭულია.
"ის ფაქტორი, რომ "ასკანელი ძმების" პროდუქცია ჩვენი გვარის სახელს ატარებს, ძალიან დიდ პასუხისმგებლობას გვაკისრებს. ამიტომ, ჩვენი მთავარი ამოცანა ყოველთვის იყო და იქნება მაღალი ხარისხის შენარჩუნება. როგორც იცით, აქამდე უკვე ძალიან ბევრი ჯილდო და აღიარება დავიმსახურეთ საქართველოს ფარგლებს გარეთ, განსაკუთრებით ევროპის ქვეყნებში. მაგრამ ათმაგად გვიხარია, რომ საქართველოშიც მივიღეთ ასეთი მაღალი შეფასება და პირობას ვდებთ, რომ "ხარისხის ნიშნის" შენარჩუნებაზე ყოველთვის ვიზრუნებთ. მით უფრო გვაქვს გრანდიოზული გეგმები, ვაპირებთ ახალი საწარმოო ხაზის მშენებლობას, თანამედროვე ტექნოლოგიების დანერგვას და ეს პროცესი ჩვენი უცხოელი კონსულტანტების რეკომენდაციებით წარიმართება," - აცხადებს ჯიმშერ ჩხაიძე ასკანელი. მისივე ინფორმაციით, ამ დღეებში "ასკანელი ძმები"-ს პროდუქციამ უკრაინაში ოქროს 4 მედალი მიიღო და ამასთან დაკავშირებით საქართველოს უკრაინული პარტნიორი, უმსხვილესი სადისტრიბუციო ქსელის მენეჯმენტი და ოცკაციანი დელეგაცია სტუმრობს.
საქართველოში სამომხმარებლო ბაზარზე ხარისხის ნიშანი 130 კომპანიას აქვს მინიჭებული, თუმცა ამ ეტაპზე მათგან მხოლოდ 70 ინარჩუნებს ხარისხის ნიშნით საკუთარი პროდუქციისა და მომსახურების მარკირების უფლებას. 8 ივნისს ხარისხის ნიშანი "ასკანელ ძმებთან" ერთად კიდევ 5 ქართულ კომპანიას მიენიჭა. ესენია "საქართველოს ფოლკლორის სახელმწიფო ცენტრი", "უშიშროებისა და საკუთრების დაცვის სამსახური თორნი", საწარმო "ჯორჯიან ბეიქერსი", კაფე-რესტორანი "ფოლკ გარდენი" და ტურისტული კომპანია "GTM" (Georgian Tourism Marketing).
კომპანია "ასკანელი ძმები" 15 წლის წინ დაარსდა და სადღეისოდ ერთ-ერთი წამყვანი კომპანიაა ქართული ელიტარული ალკოჰოლის მწარმოებელ კომპანიებს შორის. კომპანია აწარმოებს 8 სახეობის კონიაკს, 32 დასახელების ღვინოს, 4 დასახელების ჭაჭას. "ასკანელი ძმების" პროდუქცია აღიარებულია საუკეთესოდ და მიღებული აქვს 100-ზე მეტი ჯილდო სხვადასხვა გამოფენებსა და დეგუსტაციებზე. "ასკანელი ძმები"-ს მიერ წარმოებული სასმელები გადის ექსპორტზე აშშ-ში, უკრაინაში, ჩინეთში, გერმანიაში, დიდ ბრიტანეთში, ესტონეთში, ლიტვაში, ლატვიაში, პოლონეთში, ჩეხეთში, ყაზახეთში, ფინეთში, აზერბაიჯანში და ბელორუსიაში.
R
