9
აპრილიდღის ზოგადი ასტროლოგიური პროგნოზი
"თქვენ დღეს იმყოფებით ცნობილი მოქანდაკის, აგული ერისთავის პერსონალურ გამოფენაზე. გამოფენას გახსნილად ვაცხადებთ! აქვეა მჭედელი სავლე, ამ ადრინდელ ნაწარმოებში ჩანს ანტიკური ხელოვნების გავლენა, მიუხედავად ამისა, მხატვარი მაინც ახერხებს საკითხის ექსპრესიონისტულად გადაწყვეტას და აი, შედეგიც - ცხვირი ჰგავს? - ჰგავს, თვალები ჰგავს? - ჰგავს, შუბლი ჰგავს? - ჰგავს, ესე იგი - ჰგავს..."- ალბათ, გეცნოთ ეპიზოდი ფილმიდან "არაჩვეულებრივი გამოფენა", სადაც აგული ერისთავი მეუღლეს თავისი მარჯვენით შექმნილ "შედევრებს"აცნობს. ამ ქანდაკებებს შორის ერთ-ერთი ბატონ ბონას ეკუთვნის - კაცს, რომელიც ჯანმრთელი და საღ-სალამათია, კისლოვოდსკშიც ისვენებს, მაგრამ საკუთარ თავს საფლავი წინასწარ გაუმზადა(?!).
ხუმრობა იქით იყოს და, საქართველოში დღეს უამრავი ასეთი საფლავია - საფლავი, რომელსაც მისი მომავალი პატრონები წინასწარ იზომავენ და წინასწარ გეგმავენ, რა მოხდება მათი სიკვდილის შემდეგ. საფლავის წინასწარ მოზომვა კი ძალიან ძვირი სიამოვნებაა და როგორც გავარკვიეთ, სულ მცირე, ათასი ლარი მაინც ღირს. სახელმწიფო სასაფლაოზე ფასები აშკარად შეღავათიანია, თუმცა მათ გარდა თბილისში კერძო სასაფლაოებიც არსებობს, სადაც ფასებს მფლობელი ადგენს და ორადგილიანი საფლავი ხშირად 6, 7, 10 ათასი ლარიც კი ღირს. თუმცა, არსებობს უფრო ძვირფასი საფლავებიც და რაც უფრო პრესტიჟულ უბანში მოისურვებთ დაკრძალვას, მით უფრო ძვირი იქნება თქვენი სამუდამო ნავსაყუდელი...
სტატისტიკის მიხედვით, ყოველთვიურად თბილისში 600-700-მდე დაკრძალვა რეგისტრირდება, ხოლო მთელი საქართველოს მასშტაბით - 50 ათასამდე. გარდაცვლილთა რიცხვიდან გამომდინარე, წლიდან წლამდე იზრდება სასაფლაოების ფართობიც და საფლავის ადგილის პოვნაც ძნელი ხდება. მართალია, უფასო სასაფლაოებზე ორადგილიან საფლავში ჭირისუფალი ფულს არ იხდის, მაგრამ ასეთი საფლავის პოვნას და უამრავი პროცედურის გავლას ჭირისუფალი ხშირად ვერ ასწრებს, ამიტომ იძულებული ხდება კერძო სასაფლაოს მიმართოს, სადაც ფასები საკმაოდ მაღალია. თუ გაგიმართლათ და ორადგილიანი უფასო საფლავის მფლობელი გახდით, მხოლოდ 230 ლარის გადახდა მოგიწევთ - საფლავის გაჭრის, ჩასვენებისა და მომსახურებისთვის. დამატებით თითო ადგილი კი უკვე 500 ლარი ღირს. რაც შეეხება დაკრძალულ მიცვალებულზე მეორე მიცვალებულის დაკრძალვას, ეს მომსახურება 300 ლარი ღირს და პირველი მიცვალებულის დაკრძალვიდან 20 წელი უნდა იყოს გასული. ეს - ოფიციალურად, თუმცა საბოლოოდ ყველაფერი მაინც სასაფლაოს ადმინისტრაციასთან შეთანხმებით წყდება…
შალვა ნ. უკვე 32 წელია ერთ-ერთ დამკრძალავ ბიუროში მუშაობს. აი, რა გვითხრა მან: "ფასებსაც გეტყვით, შვილო და ყველაფერსაც, თუ ამ სიბერეში გაზეთში არ გამომაჭენებთ: ჩვენთან ბალზამირების ღირებულება 80 ლარია, კატაფალკა - 80 ლარი ღირს, 52-კაციანი ავტობუსი - 150 ლარი, ხოლო სასახლე-მაცივარი 310 ლარი. აბა, რა საფლავი იქნება მემორიალური დაფის გარეშე, ჰოდა ეს დაფა სურათითა და წარწერით, სულ მცირე, 150 ლარი ჯდება. ყველაზე მთავარი კი მაინც კუბოა. სულ ნაირ-ნაირი კუბოები გვაქვს - ფასი 250 ლარიდან იწყება და 4-5 ათას ლარამდეც ადის. ზოგიერთი მუხისაა, ზოგი - წიფლისა, ზოგი კიდევ - თელის... გააჩნია, ვის როგორი მოსწონს. ვინ იცის, რამდენნაირი ადამიანი არ მოსულა აქ: ერთი კაცი გახარებული მოვარდა - როგორც იქნა, სიდედრი დამეღუპა და საუკეთესო კუბო შემირჩიეთ, ხავერდით და ატლასით რომ იყოს გაწყობილიო(!) ერთი კლიენტი მყავდა, იმას რა დამავიწყებს - მთხოვდა, ძმაკაცი დამეღუპა, ცხონებულს ჩემსავით დალევა უყვარდა და ისეთი კუბო დამიმზადეთ, შიგ სულ ღვინისა და არყის სუნი ტრიალებდესო. დღემდე არ ვიცი, მართალს ამბობდა თუ მაიმუნობდა, ერთი სიტყვით, უცნაურ კლიენტებს რა გამოლევს, ამდენი წლის მუშაობის შემდეგ კი მივხვდი, რომ ყველა ჭირისუფალს ჭირისუფალი არ უნდა ერქვას…
მოსახლეობა ხშირად ჩივის, რომ არც კერძო და არც მერიის გაკეთებულ სასაფლაობზე არ არის სასურველი ინფრასტრუქტურა, დარღვეულია სანიტარული ნორმები, არ არის წყალი... როგორც თბილისის საკრებულოს ფრაქცია "ქართული ოცნება-დემოკრატიული საქართველოს"თავმჯდომარე ზაზა გაბუნიამ გვითხრა, ეს ძალიან რთული თემაა, ამიტომ მოქნილ მიდგომას საჭიროებს: "წლების განმავლობაში ძალიან ბევრი ადამიანი უკმაყოფილო იყო იმ სერვისით, რასაც სასაფლაოებზე სთავაზობდნენ. საფლავის ფასი სიმბოლური უნდა იყოს, ჩვენთან კი ოჯახი, რომელიც ისედაც დამწუხრებულია, უამრავ ფინანსურ სირთულეს აწყდება, რაც დაუშვებელია. ხშირად სახელმწიფო სასაფლაოებზე ადგილი არ არის, კერძო სასაფლაო კი ძალიან ძვირი ღირს. ამიტომ, პირველ რიგში, ფასები უნდა იყოს შესაბამისი. გარდა ამისა, ახალი ტერიტორიებიც უნდა გამოვიყენოთ, რადგან სასაფლაოებზე ადგილების დეფიციტია.
მოამზადა ხათუნა ჩიგოგიძემ
ყოველკვირეული გაზეთი "ყველა სიახლე"
(გამოდის ოთხშაბათობით)
