4
მაისიდღის ზოგადი ასტროლოგიური პროგნოზი
წიგნებზე, ლიტერატურაზე ლაპარაკი უყვარს. ამბობს, რომ ყველაზე აქტიური მკითხველი მოსწავლეობისა და სტუდენტობის წლებში იყო. არ უყვარს, როცა ადამიანები ახალ ნაწარმოებებს ეცნობიან და მერე იმ წიგნის სამყაროში ცხოვრობენ. ასეთი რამ თავად მაშინ დაემართა, როცა ბორის ვიანის "დღეების ქაფი" წაიკითხა. რეჟისორი და მსახიობი ბასა ხარაზი საყვარელ ავტორებზე, ნაწარმოებებზე, პოეზიაზე, მხატვრობასა და იმ როლზე გვესაუბრება, რომელსაც სერიალში - "ჩემი ცოლის დაქალები" ასრულებს.
- ბასა, ვიანის გარდა, შენზე შთაბეჭდილება კიდევ რომელმა ავტორებმა მოახდინეს?
- "დღეების ქაფი" ერთ დროს აკრძალული იყო, ფრანგული ორიგინალი ვნახე და ქართულად ვთარგმნე, მაგრამ არ გამომიცია. ბორის ვიანი ერთ-ერთი საყვარელი ავტორია, ყოველ ჯერზე ღრმა და შეუდარებელი. მერე იყო ჯორჯ ორუელი, რომელმაც შემაძაგძაგა. მიყვარს რემარკი, ქართველი ავტორებიდან - ოთარ ჭილაძე და გურამ დოჩანაშვილი. როცა ჟიულ ვერნს ვკითხულობ, წიგნის პერსონაჟი ვხდები, მას მოგზაურობაში "მივყვები". დეტექტივის კითხვისას გამომძიებელი ვარ და ა.შ. როცა ბავშვობა მენატრება, "პატარა უფლისწულს" ვუბრუნდები და ყოველ ჯერზე მასში რაღაც ახალს ვპოულობ.
- ახლა რას კითხულობ?
- მაგიდაზე სეი სიონაგონის "მარტოობის ჟამს ჩანაწერები" მიდევს და პერიოდულად ვუბრუნდები. ეს წიგნი მეგობარს, რამდენიმე მცდელობის შემდეგ მოვპარე.
- რომელ პერსონაჟთან იმეგობრებდი?
- რემარკის ჟოან მადუსთან, მე თვითონ რავიკი ვიქნებოდი. რატომღაც "ტრიუმფალური თაღის" პირველად წაკითხვის შემდეგ საკუთარ თავს ამ პერსონაჟთან ვაიგივებ. დადებით თვისებებზე არ ვილაპარაკებ. გეტყვით, რომ მასავით ხისტი, ჩუმი და უემოციო (სხვის თვალში) ვარ.
- ბასა, გვარად სამხარაძე ხარ, ახლა კი ხარაზად გიცნობენ.
- წარმოშობით ჭიათურის რაიონის სოფელ უსახელოდან ვარ. ჩემს დიდ ბაბუას და საერთოდ, სამხარააძეების ამ შტოს ხარაზად მოიხსენიებდნენ. გვარი დავიბრუნე, მალე საბუთებითაც ხარაზი ვიქნები და იმედია, არავინ მიწყენს. მგონი, ამით წინაპრებს უფრო ვუახლოვდები.
- ყველას გვახსოვს, შენი თანარეჟისორობით გადაღებული კლიპი ქეთა თოფურიას სიმღერაზე - "შაირი". ახლა როგორც რეჟისორი, რატომ აღარ მუშაობ?
- სიმღერა, რომელზეც ვიმუშავებ, უნდა მაინტერესებდეს, ჩემში არსებული სიმებიდან ერთი მაინც უნდა შეირხეს. ძალიან მომწონს ახლახან გამოჩენილი 2 შემსრულებელი, რომლებთანაც შეიძლება მომავალში ვითანამშრომლო. ქეთასთან, როგორც სოლისტთან და თუ ხმამაღალ ნათქვამად არ გამომივა, - "ა სტუდიოსთანაც" დღესაც დიდი სიამოვნებით ვიმუშავებდი.
- რას გვეტყვი შენს პერსონაჟზე, რომელსაც სერიალში - "ჩემი ცოლის დაქალები" თამაშობ?
- ამ სერიალს დიდი აუდიტორია ჰყავს, ქუჩაში ყველა მცნობს. საქართველოში გეის როლის თამაში დისკომფორტია. ხშირად მესმის რეპლიკებიც. ხალხს ავიწყდება, რომ მსახიობის პერსონაჟთან გაიგივება არ შეიძლება.
- როგორც ვიცი, არა მხოლოდ ხელოვნება, ფიზიკა და ასტრონომიაც გიტაცებს.
- ნამდვილად ასეა, ეს მეცნიერებები ბავშვობიდან მაინტერესებს.
- როგორ შეიცვლება მოძრავი სხეულის კინეტიკური ენერგია, მისი სიჩქარის 3-ჯერ გაზრდისას?
- ცხრაჯერ გაიზრდება.
- რას ვუწოდებთ ნატრიუმის ქლორიდს?
- მარილს, რომელსაც საერთოდ არ გამოვიყენებ. უმარილო საკვებს გემრიელად მივირთმევ.
- რომელი ცნობილი დანიელი ფიზიკოსი მიმართავდა აინშტაინს შემდეგი სიტყვებით: "აინშტაინ, გეყო ღმერთისთვის მითითებების მიცემა"?
- არ ვიცი.
- ნილს ბორი. თვითმფრინავში ჰერმეტიზაციის დარღვევისას სხეულები გარეთ ცვივა. რატომ?
- თვითმფრინავში ატმოსფეროს წნევაზე მეტი წნევაა.
- რა ერქვა წვეტიან ჯოხს, რომლის დახმარებითაც ძველ რომში საქონელს მიერეკებოდნენ?
- არ ვიცი.
- მიგანიშნებ, ამ სიტყვას დღეს ხშირად ვამბობთ საქმის კეთების დროს, მას დიდი მნიშვნელობა აქვს.
- (ფიქრობს) სტიმული ხომ არა?
- გამოიცანი. "ღმერთმა შექმნა არც ისე ბევრი სრულყოფილი თავი, ხოლო დანარჩენი დაფარა თმით". ეს ერთ-ერთი კლუბის დევიზია. რა საერთო აქვთ ამ კლუბში გაწევრებულ ადამიანებს?
- ლოგიკურად თუ ვიმსჯელებთ, მელოტები უნდა იყვნენ.
- სადაური სიტყვაა "სადისტი"?
- ფრანგული.
- როგორი საათი უჩვენებს დღე-ღამეში სწორ დროს მხოლოდ 2-ჯერ?
- გაჩერებული.
- რა ერქვა ალუდა ქეთელაურის ცოლს?
- ვერ ვიხსენებ.
- ლელა. ძველად რომაელი ბატონები თავიანთი სამფლობელოების დასაცავად შავ დოგებს იყენებდნენ, სიბნელეში მათი შემჩნევა რთული იყო. მაშინ გაჩნდა და ჩვენამდე მოაღწია ამ გამოთქმამ, რომელიც მხოლოდ 3 სიტყვისგან შედგება.
- ეზოში ავი ძაღლია.
- დაასრულე ჩარლი ჩაპლინის ცნობილი გამონათქვამი: "სარკე ჩემი საუკეთესო მეგობარია, არასდროს იცინის, როცა..."
- ვერ დავასრულებ...
- "...როცა ვტირი". პოეზია გიყვარს?
- ძალიან, იმასაც ამბობენ, რომ კარგი მკითხველი ვარ, მაგრამ ლექსს მხოლოდ ვიწრო სამეგობროში ვკითხულობ. არ მინდა, ძალიან გავუშინაურდე და ემოცია გავცვითო. ძალიან მომწონს ოთარ ჭილაძის "გამოთხოვება". პოეზიასთან ზედმეტად ინტიმური დამოკიდებულება მაქვს. ლექსისგან მიღებული ემოციით მიბღავლია და არა მხოლოდ - მე... რომ გავიხედე, გარშემო მყოფებიც ჩემნაირ მდგომარეობაში იყვნენ.
- საყვარელი ქალისთვის მიგიძღვნია ლექსი?
- საყვარელ ქალს მირჩევნია, ჩემი სიტყვები ვუთხრა. რითმულად თუ გამომივა, შეიძლება ლექსი დაერქვას. ქალისთვის ყველაზე დიდი სათქმელი სიჩუმითა და ერთი შეხედვით მითქვამს. მადლობა ღმერთს, გაუგია. სიტყვები ხშირად ჩემში დიდ ხმაურს იწვევს, მეტყველი სიჩუმე მირჩევნია.
- პირად ცხოვრებაზე ლაპარაკი არ გიყვარს.
- რა უნდა ვილაპარაკო? მხოლოდ იმას გეტყვი, რომ ახლა ჩემი გული თავისუფალია. მომავალში ვინმე ისე თუ შემიყვარდება, ვისთანაც ჩემი ცხოვრების დაკავშირება მომინდება, შეიძლება ვილაპარაკო. წარსული მხოლოდ ჩემია.
- მხატვრობაში ერკვევი?
- თავადაც ვხატავ, მაგრამ გამოფენის მოწყობას არ ვაპირებ. ჩემს მხატვრობას, ემოციის ტილოზე ფერებად გადატანა ჰქვია. ეს დიდი კაიფია.
- შენს ნახატებში რომელი ფერები ჭარბობს?
- შავი, რომელიც ჩემთვის ყველაზე მეტად ფერადია, სიცოცხლის ფერია და მწვანე - სიხარულის ფერი.
- რა პოზაში აქვს ხელები ლეონარდო და ვინჩის ჯოკონდას?
- გადაჯვარედინებული.
- ეს უმდიდრესი მხატვარი ფულს ბანკში არასდროს ინახავდა. ამბობდა, ბანკები კოტრდებიან და მათი მეანაბრეები ფანჯრებიდან ხტებიანო. დაასახელე, რომელ მხატვარზეა ლაპარაკი?
- სალვადორ დალიზე.
- ცდები.
- პაბლო პიკასო. ეს ორი მხატვარი მფლანგველობით გამოირჩეოდა.
- ნებისმიერ ზრდასრულ ვეფხვს საკუთარი სანადირო ტერიტორია აქვს, სადაც არავის უშვებს, მაგრამ ხდება გამონაკლისიც. როდის?
- როცა გამრავლების პერიოდი აქვთ.
- წყალბადის გარდა, რომელი ელემენტი შედის მარილმჟავას შემადგენლობაში - ქლორი, გოგირდი, ნატრიუმი თუ აზოტი?
- ქლორი.
- სად არსებობდა ძველი მსოფლიოს ყველაზე ძველი ბიბლიოთეკა?
- ალექსანდრიაში.
- "რომელი ქვეყნის ხალხი გვასწავლის: "თუ მართლა გინდა გაჭირვებულს დაეხმარო, ასწავლე მას რაიმე ხელობა".
- არ ვიცი...
- ჩინელები. "ლიტერატურა ჩემი კანონიერი ცოლია, ხოლო მედიცინა - საყვარელი. როცა ვიღლები ერთ-ერთი მათგანისგან, მთელ ღამეს ვატარებ მეორესთან". რომელი ცნობილი რუსი მწერალი და დრამატურგი ამბობდა ამ სიტყვებს?
- (ფიქრობს).
- ის პროფესიით ექიმი იყო. მისი პიესის მიხედვით არაერთი სპექტაკლია დადგმული.
- ანტონ ჩეხოვი.
- მსახიობობასა და რეჟისორობას შორის რომელია შენი ცოლი და რომელი - საყვარელი?
- ხან ერთთან ვარ, ხან - მეორესთან, რომელი რომელია, თავადაც არ ვიცი. პოლიგამიური ოჯახი გვაქვს, შეხმატკბილებულად ვცხოვრობთ.
- რა ერქვა ლუარსაბისა და დარეჯანის მაჭანკალს, რომელსაც მეტსახელად სუტ კნეინასაც ეძახდნენ?
- არ შემახსენო, გიპასუხებ. (პაუზის შემდეგ) ხორეშანი, არა? მოახლეს ლამაზისეული ერქვა.
- დაბოლოს, დაასრულე რემარკის ცნობილი გამონათქვამი: "ჭკვიანი ადამიანები სურნელოვან ყვავილებს ჰგვანან, ერთი სასიამოვნოა და თაიგულმა შეიძლება თავი..."
- "...თავი აგატკიოს".
თამუნა კვინიკაძე
(გამოდის ხუთშაბათობით)
_2019-10-07_pcZAK5dDPSlBIBs.jpg)
