4
მაისიდღის ზოგადი ასტროლოგიური პროგნოზი
თბილისში 9-11 მაისს კავკასიის მუსიკალური კვირეული "Tbilisi Music Week" გაიმართება.
როგორც "ამბები.გე"-სთან საუბრისას შეხვედრის ორგანიზატორებმა განაცხადეს, "Tbilisi Music Week" ყოველწლიური ფესტივალი და მუსიკალური ინდუსტრიის კონფერენციაა, რომელიც 9-11 მაისს თბილისში, სხვადასხვა ადგილას გაიმართება და მოიცავს როგორც ქართველი, ასევე უცხოელი შემსრულებლების პერფორმანსებს, ასევე თბილისის მუსიკალური კვირეულის ქართველი და უცხოელი დელეგატების შეხვედრას, რომლის ფარგლებშიც ჩამოსული სტუმრები დიდი ბრიტანეთიდან, ფინეთიდან, ესტონეთიდან, გაეცნობიან, რა კეთდება ახალი და რით არის საინტერესო ქართული მუსიკალური სივრცე.
- ეს არის საერთაშორისო ფესტივალი/კონფერენცია/გამოფენა, რომლის მიზანია, ერთად მოუყაროს თავი ქართველ მუსიკოსებს, მუსიკის პროფესიონალებს, ინსტიტუციებსა და უბრალოდ, ენთუზიასტებს, რომლებიც ერთმანეთს ამ სფეროში დაგროვილ ცოდნასა და გამოცდილებას გაუზიარებენ.
- რა მიზნებს ისახავს ფესტივალი?
- ფესტივალისა და კონფერენციის მიზანია ევროპის მასშტაბით გაიზარდოს ქართული მუსიკის რეპუტაცია, ადგილობრივ მუსიკალურ ინდუსტრიას მისცეს საერთაშორისო სარბიელზე განვითარების შანსი და გაუწიოს პოპულარიზაცია საქართველოს, როგორც კულტურული ტურიზმის ზონას.
საფესტივალო პროგრამის ფარგლებში 9 მაისს თბილისში მონაწილე დელეგატები ჩამოვლენ, რომლებიც თბილისის კულტურულ ღირსშესანიშნაობებს გაეცნობიან, ასევე დაათვალიერებენ მცხეთას და ქართულ ვენახს. ამავე დღეს სტუმრებისთვის ქართული ტრადიციული სუფრა გაიშლება.
10 მაისს 11.00–15.00 საათებში სამეფო უბნის თეატრში ფესტივალის დელეგატები შეიკრიბებიან, სადაც ქართული მუსიკალური ბაზრის მიმოხილვა და დისკუსია გაიმართება თემაზე "როგორ უნდა გავყიდოთ კულტურა?.. როგორ დავაინტერესოთ სხვა ქვეყნები".
19.00 საათზე "თბილისის ივენთ-ჰოლში" ქართველი და უცხოელი შემსრულებლების მონაწილეობით გალა-კონცერტი გაიმართება.
11 მაისს 10.00-დან 18.00 საათამდე თბილისის მუსიკალური კვირეულის მონაწილეები ღვინის ფესტივალის სცენას დაიკავებენ.
19.00 საათზე გალაკტიონ ტაბიძის ქუჩაზე მდებარე კლუბ "Le France"-ში გამოვლენ.
21.00 საათზე კლუბში "დივანი" ჯემ-სეიშენი და ფესტივალის დახურვის ცერემონია გაიმართება.
მუსიკალურ ფესტივალსა და კონფერენციაში მონაწილეობას "დიდგორი" (საქართველო), "იბერი" (საქართველო), "გზება" (საქართველო), სოფი ვილი (საქართველო), მარი პოკინენი (ესტონეთი), ტუომარი ნურმიო (ფინეთი), ულტიმა ტულე (ესტონეთი) მიიღებენ.
ფესტივალის ჰედლაინერი ცნობილი ფინელი აკორდეონისტი კიმო პოიონენია, რომლის კარიერა 90-იან წლებში დაიწყო.
კიმო პიონენმა აკორდეონის ჟღერადობას სრულიად ახალი სული შთაბერა. მას აქვს გამოცემული რამდენიმე ალბომი და მოგზაურობს მთელ მსოფლიოში თავის აკორდეონთან ერთად.
აკორდეონისტი თბილისში თავის მეუღლესთან, ვოკალისტ და დრამერ საანა პოიონენთან ერთად ჩამოდის.
"Tbilisi Music Week"-ის დელეგატები არიან ჟურნალისტი ენდრიუ კრონშოუ (დიდი ბრიტანეთი); საფესტივალო პროდიუსერი ბენ მანდელსონი (დიდი ბრიტანეთი); ანსამბლ "იბერის" ხელმძღვანელი და მომღერალი ბუბა მურღულია (საქართველო); პროდიუსერი ანუ აიტონიემი (ფინეთი); საქართველოს ავტორთა საზოგადოების ხელმძღვანელი გიგა კობალაძე; ანსამბლ "დიდგორის" წარმომადგენელი გივი აბესაძე (საქართველო); პროდიუსერი ჰეიკი სავოლაინენი (ფინეთი); თბილისის მუსიკალური კვირეულის დამფუძნებელი და პრომოუტერი იუკო კარპანენი (ფინეთი); მენეჯერი და პრომოუტერი იულია ვოლოზი (გერმანია); პრომოუტერი პაულ პიფლაკი (ესტონეთი); პროდიუსერი ლაური ლიივაკი (ესტონეთი).
გიორგი ბერიძე
