მელანქოლიური ლუკა ზაქარიაძის გატაცება

მუსიკალური პროექტის - "საქართველოს ვარსკვლავი" გამარჯვებული, ლუკა ზაქარიაძე იმიჯზე განსაკუთრებულად არ ზრუნავს, მაგრამ ყოველთვის ცდილობს, სიმპათიურად გამოიყურებოდეს. ის ცხოვრებისგან ბევრ სიახლეს ელის და ყველაფერში ზომიერებას იცავს; არ მოსწონს "თავზე ხელაღებული" გართობა...

სამოსი

- სიმართლე გითხრათ, ჩვეულებრივი სამოსი უფრო მეტად მომწონს, ვიდრე - ექსტრავაგანტური. უპირატესობას შავ ფერს ვანიჭებ - ჩემს შინაგან მდგომარეობას გამოხატავს.

- ანუ მელანქოლიური და დეპრესიული ხარ?

- ცოტა მელანქოლიური, ცოტაც - დეპრესიული, აგრესიული, მგრძნობიარე... სხვა ფერის სამოსიც მიხდება, მაგრამ შავი ძალიან მომწონს.

- ტანისამოსს დამოუკიდებლად ირჩევ თუ ვინმეს რჩევებს ითვალისწინებ?

- მეგობრების, ახლობლების, გოგონების რჩევებს ვითვალისწინებ. ჯერ საქმე იქამდე არ მისულა, რომ პროდიუსერის რჩევებიც გავითვალისწინო (იცინის). კაპრიზული ადამიანი არ ვარ.

- როცა პროექტში მონაწილეობდი, სასცენო სამოსიც მოგწონდა?

- მაშინ ამ საქმეში სხვისი შრომა და აზროვნება იყო "ჩადებული". მომწონდა თუ არა, პრეტენზია არ გამომითქვამს.

- შოპინგი შენთვის სასიამოვნო პროცესია?

- შოპინგით გატაცებულ ადამიანებს ვიცნობ, მაგრამ პირადად მე, აკვიატებული არ მაქვს, რომ ყოველკვირა ან თვეში ერთხელ მაინც რაღაც ახალი ვიყიდო. ჩაცმულობას და ზოგადად, გარეგნობას უზომოდ დიდ ყურადღებას არ ვაქცევ. არ მიმაჩნია, რომ შოპინგი ადამიანს უფრო მეტად საინტერესოს ხდის.

აქსესუარები

- სათვალე, ქამარი და ტატუ მომწონს, პირსინგები - არა. ჩემს თვალში პირსინგი უშნოდ ჩანს. ტატუ არ მაქვს. მგონია, რომ გავიკეთო, მალე მომბეზრდება. მზის სათვალეს სიბნელეში არ ვიკეთებ - გიჟი არ ვარ (იღიმის)... მედიატორი ყოველთვის თან დამაქვს, რადგან შეიძლება, ნებისმიერ დროს დამჭირდეს. მეგობარმა მაჩუქა, რომელიც ასევე, როკით გახლავთ გატაცებული.

ვარცხნილობა

- ექსტრავაგანტური ვარცხნილობის გაკეთებაზე არ მიფიქრია. უბრალოდ, თმა ახალი დაბანილი მაქვს და ქარმა გამიწეწა (იცინის). აუცილებელი არ არის, რომ როკის მომღერალი "ბინძურ იმიჯთან" ასოცირდებოდეს და 4 დღის დაუბანელი, გაწეწილი თმით დადიოდეს. ჩვეულებრივი, მოწესრიგებული ვარცხნილობა მომწონს, ჰიგიენის ნორმების დაცვით (იცინის).

ვარჯიში და დიეტა

- მიმაჩნია, რომ მამაკაცმა კუნთებზე და ზოგადად, გარეგნობაზე ყოველთვის უნდა იზრუნოს. უბრალოდ, ეს სხეულის სილამაზეა. კულტურისტი არ ვარ, მაგრამ ფორმაში ყოფნისთვის, ყოველ დილით გამამხნევებელ ვარჯიშებს ვაკეთებ, რათა "მოშვებული" არ ვიყო.

დიეტის დაცვა არ დამჭირვებია. 60 კილოზე მეტს ვიწონი - ბოლო დროს ბევრს ვჭამ და "შევსუქდისავით". ძლიერმა ქარმა რომ დაუბეროს, არ წამიღებს, ადრე კი ამის ცოტა არ იყოს, მეშინოდა (იცინის).

ცურვა და ფეხბურთი

- ზაფხულობით, დღე და ღამე ზღვაზე არ დავდივარ, მაგრამ მეგობრებთან ერთად, ზღვაში ღრმად გასვლა მიყვარს - იქ უფრო მეტ სიამოვნებას ვიღებ.

- ცურვა დამოუკიდებლად ისწავლე?

- კი. ერთხელ ხიდიდან გადმოვხტი და გავცურე - სხვა გამოსავალი არ მქონდა. ცურვა კარგი რამ არის... ფეხბურთი მიყვარს. ის სპორტის ნომერი პირველი სახეობა გახლავთ. თან, მამაკაცს ფეხბურთი რომ არ უყვარდეს, ცოტა არ იყოს, უჩვეულო იქნება. სპორტის ამ სახეობით ბავშვობიდან გატაცებული ვარ. "ბარსელონას" ვგულშემატკივრობ. ეზოში ისეთი სტადიონი გვქონდა, რომ ფეხბურთის წრეზე სიარულის მოთხოვნილებას მინაზღაურებდა. ყოველდღე ვთამაშობდი.

საქმე

- ამ ეტაპზე, ჩემთვის ყველაზე მნიშვნელოვანი საქმე მუსიკა გახლავთ. "საქართველოს ვარსკვლავში" გამარჯვების შემდეგ, ჩემს ცხოვრებაში ბევრი რამ შეიცვალა. თუმცა, შინაგანად ისევ ისეთი ვარ, როგორიც ადრე ვიყავი...

- შენი მუსიკალური კარიერა როგორ ვითარდება? როგორც ვიცი, იურმალას მუსიკალურ კონკურსში მონაწილეობას აპირებ.

- ეს საკითხი ჯერ გადაწყვეტილი არ არის. დაზუსტებით ვერაფერს გეტყვით... სხვათა შორის, სცენაზე აბსოლუტურად ბუნებრივი ვარ: იმას ვაკეთებ, რასაც ვგრძნობ. ისეთი დონის არტისტი არ ვარ, რომელსაც საზოგადოებისათვის ყალბი ღიმილის ჩუქება შეუძლია. თუ არ მეღიმება, არ ვიღიმი.

თაყვანისმცემლები

- ჩემ მიმართ გამოხატული დიდი ყურადღება გარკვეულწილად, დისკომფორტს მიქმნის. იმასაც ვაცნობიერებ, რომ ყურადღების მიზეზი ხალხის სიყვარულია და მათთან კონტაქტი აუცილებელია. ხშირად იმის ხასიათზე არ ვარ, რომ ყველას ერთდროულად ვეკონტაქტო, მაგრამ ჩემი გულშემატკივრების წრიდან გარკვეულ ადამიანებს გამოვარჩევ ხოლმე; მათთან ისეთი ურთიერთობა მაქვს, როგორიც საჭიროა: ისინი არ უნდა გავაბრაზო, უმადურად არ უნდა მოვექცე... ღმერთი არ ვარ, რომ ვინმემ ჩემზე ილოცოს.

- როგორც ვიცი, სწავლობ. რა პროფესიას ეუფლები?

- იურიდიულ ფაკულტეტზე ვსწავლობ.

ოჯახი

- მადლობა ღმერთს, ოჯახთან ერთად კარგად ვცხოვრობ, - ანუ ისე, როგორც ქართულ ოჯახს შეეფერება. ადამიანი მშობლებისგან ყოველთვის საინტერესო რჩევებს იღებს...

- შენს პირად ცხოვრებაზე რას გვეტყვი?

- ამ ეტაპზე, შეყვარებული არ ვარ.

- არადა, 1 კვირის წინ, ერთ-ერთ სატელევიზიო გადაცემაში თქვი, რომ შეყვარებული იყავი.

- ეგ რამდენიმე თვის წინანდელი ჩანაწერი გახლდათ.

- შენს ყურადღებას როგორი გოგონები იქცევენ?

- ჩამოყალიბებული კრიტერიუმები არ მაქვს. მთავარია, გოგონამ დამაინტერესოს და მომხიბლოს.

გართობა

- დღეს ცუდი რაღაცების კეთება (მაგალითად, ნარკოტიკების მიღება) მოდაშია, მაგრამ მე უპირატესობას ჯანსაღ ცხოვრებას ვანიჭებ; "კალაპოტიდან" არასოდეს ვვარდები. ჯერ არ შემხვედრია ზრდასრული ადამიანი (ჩემი ან მშობლების მეგობარი), რომელსაც ჩემ შესახებ უთქვამს, - ცუდი ბიჭია, დროს ცუდად ატარებსო. ბიჭი ვარ და თავისებურებები მეც მახასიათებს, მაგრამ თავზე ხელაღებული გართობის მორევში არ გადავეშვები ხოლმე. ზომიერებას ვიცავ. სიმართლე გითხრათ, გართობაშიც მუზას ვეძებ...

- და მაინც, როგორ ან სად ერთობი ხოლმე?

- კლუბებში სიარული დიდად არ მომწონს, მაგრამ მეგობრებთან ერთად, ასეთ ადგილებშიც დავდივარ...

ეთო ყორღანაშვილი

ჟურნალი ”გზა”

(გამოდის ხუთშაბათობით)