30
მარტიდღის ზოგადი ასტროლოგიური პროგნოზი
18 წლის ლაშა მამულაშვილი დიჯეი ლაშა კიქსის სახელითაა ცნობილი, რომელსაც თურმე არა მარტო ქართველი, არამედ უცხოელი მსმენელიც კარგად იცნობს. დღეს ის უნგრეთში ფილმმცოდნეობას ეუფლება. მანამდე კი ჯერ ცეკვავდა, შემდეგ კი მოულოდნელად, მუსიკის წერა დაიწყო...
- თავიდან, ალბათ დედის გავლენით (მოცეკვავე გახლდათ), ქართულ ცეკვებს ვცეკვავდი, მერე ჯასტინ ტიმბერლეიკის სტილმა გამიტაცა. 10 წლისამ ერთ-ერთ ღონისძიებაზე მიშა შაუმიანი გავიცანი, რომელიც მაგრად ცეკვავდა. მას შემდეგ ჰიპ-ჰოპმა გამიტაცა. ერთ დღესაც, ფილმის "სტეპ უპ" მეორე ნაწილი ვნახე და ფილმის მთავარი როლის შემსრულებელი მსახიობის ფანი გავხდი. ჩემმა სამეგობრომ გაიგო, რომ რობერტ ჰოფმენის თაყვანისმცემელი ვიყავი.
- პირველად როდის დაიწყე მუსიკის შექმნა?
- აბიტურიენტობის დროს, როცა ძალიან დაკავებული ვიყავი და გარეთ გასვლის დრო აღარ მქონდა, ერთხელაც, განტვირთვისთვის, პიანინოს მივუჯექი და რაღაც ნოტები ავიღე. მომეწონა ეს ყველაფერი და დაკვრა კომპიუტერში გავაგრძელე...
მერე ჩემს ცეკვაზე გადაღებულ ვიდეოზე რობერტ ჰოფმენის კომენტარი ვნახე, - ცეკვას მიწონებდა. ვერც კი დავიჯერე, რომ ჩემმა კერპმა ცეკვა მომიწონა. მერე გაიგო, რომ მუსიკას ვწერდი და მოსმენის შემდეგ მომწერა, - გიჟი ხარ, რა მაგარი ტრეკები გაქვსო... ისიც მითხრა, რომ კლიპისთვის ჩემი მუსიკის გამოყენება სურდა, სადაც თვითონ და თავისი მეგობრები იცეკვებდნენ (ამ კლიპზე გადაღებული ვიდეო ინტერნეტსივრცეში დღეს საკმაოდ პოპულარულია. - ავტ.). უკვე დიდი ხანია, მე და რობერტს "სკაიპითა" და ელექტრონული ფოსტის საშუალებით გვაქვს ურთიერთობა. მისი პირადად გაცნობაც მინდა და ალბათ, ლოს-ანჯელესში ჩავაკითხავ.
- მუსიკალური განათლება თუ გაქვს?
- ცოტა ხანს ჩემს ახლობელთან ვემზადებოდი, მაგრამ ნოტებს მაინც ვერ ვცნობ, კლავიშებზე ვითვლი, რომელი რომელი ნოტია (იცინის).
- რა სტილის მუსიკას უსმენ?
- თითქმის ყველანაირი სტილის მუსიკას ვუსმენ. მთავარია, მუსიკაში გემოვნება და ხარისხი იგრძნობოდეს. ქართული ფოლკლორი ჩემზე ძალიან მოქმედებს, სულში ჩამწვდომია... ფოლკლორის გამიქსვაზეც მიფიქრია... მახსოვს, ამას წინათ "სუხიშვილების" "კახური" გავმიქსე და გამოვიდა! მინდა, რომ "ხორუმის" ელექტრონული ვერსიაც გავაკეთო. ცოტა ხნის წინ "შაბათის შოუს" ბიჭებს რაჭულის პატარა "დაბსტეპ" რემიქსი გავუკეთე, სკეტჩისთვის სჭირდებოდათ.
- როგორც ვიცი, ახლა უნგრეთში ხარ...
- კი, თითქმის ერთი წელია, აქ ფილმმცოდნეობას ვეუფლები. მაისში, დიპლომის აღების შემდეგ ისევ საქართველოში დავბრუნდები. შემდეგ კი მინდა, რომ ლოს-ანჯელესში ჩავიდე და სწავლა განვაგრძო. იქ ხომ საერთოდ, ოცნებები ხდება... ახლახან ბუდაპეშტში ძალიან დიდი ელექტრონული ფესტივალი იყო და მეც, როგორც უცხოელი სტუმარი, დასაკრავად მიმიწვიეს.
- 18 წლის ბიჭისთვის უცხო ქვეყანაში ცხოვრება რთული არ არის?
- საკმაოდ რთულია... აქ მეგობრები არ მყავს, არავის ვიცნობ და არსად წასვლაც არ შემიძლია. არის ადგილები, სადაც უამრავი ადამიანის გაცნობის საშუალებაა, მაგრამ ახლო მეგობრის პოვნა ძნელია. ბევრ სტუდენტთან ერთად ვცხოვრობ. ჩემს ოთახში ერთი ბერძენი ბიჭია, მაგრამ ინგლისური კარგად არ იცის და მასთან ურთიერთობა მიჭირს. საჭმელს დამოუკიდებლად ვამზადებ და ვცდილობ, კარგად გამომივიდეს (იცინის)... უცხო ქვეყანაში რამდენი მეგობარიც უნდა გყავდეს, მაინც მარტო ხარ!
- ერთხელ კონკურსში მონაწილეობდი, სადაც შენ მიერ გამიქსულმა კრისტინა აგილერას სინგლმა მეორე ადგილი დაიკავა.
- არის სპეციალური საიტი, სადაც ყველა ელექტრონული მუსიკის შემქმნელია დარეგისტრირებული. ხშირად ესა თუ ის ცნობილი მომღერალი, ამ საიტის მეშვეობით, სპეციალურ პროექტს ამზადებს. შენ კი არემიქსებ მის მუსიკას და თუ მომღერალს მოეწონება და მსმენელიც მხარს დაგიჭერს, რამდენიმე ეტაპის გავლის შემდეგ, შენი ნამუშევარი გარკვეულ ადგილს დაიკავებს. კრისტინა აგილერას კონკურსში მონაწილეობა დაახლოებით ორი ათასმა ადამიანმა მიიღო. ყველა სიმღერას კრისტინამ და მისმა ხმის ჩამწერმა სტუდიამ მოუსმინა და მე მეორე ადგილი მარგუნეს. ამ კონკურსს სკანდალიც უკავშირდება, იმ ადამიანმა, რომელმაც პირველი ადგილი დაიკავა, მთელი ინსტრუმენტალი ერთ-ერთ ცნობილ მუსიკოსს მოჰპარა და მის მუსიკას აგილერას ხმა დაადო... მსგავსი კონკურსი იყო როკჯგუფ "პაპაროვიჩის" სიმღერის გამიქსვაზეც და იმ კონკურსზეც მეორე ადგილი დავიკავე. ამ კონკურსებმა დიდი წარმატება მომიტანა და ჩემით რამდენიმე ხმის ჩამწერი კომპანიაც დაინტერესდა. ასევე ხშირად მიკავშირდებიან სხვადასხვა ქვეყნიდან და თავისი სიმღერის გამიქსვას მთხოვენ. მქონდა მოლაპარაკება იტალიელ პროდიუსერებთან და შესაძლოა, იტალიაში მიმიწვიონ. მომწერეს ფლორიდის შტატში არსებული კლუბიდან, მთხოვდნენ, - შენი რემიქსი გამოგვიგზავნე, გვინდა, ჩვენს კლუბში დავუკრათო.
- სამომავლოდ რას აპირებ?
- მინდა, რომ ალბომი გამოვუშვა, რომელშიც 5-6 ტრეკი იქნება. ამასთან, "ოფენ ეარის" ფესტივალშიც მინდა მონაწილეობა მივიღო. ასევე, მინდა, ერთ კონკრეტულ მუსიკაზე ცეკვა დავდგა. მოკლედ, დიდი გეგმები მაქვს.
ელენე ბასილიძე
(გამოდის ხუთშაბათობით)
