5
მაისიდღის ზოგადი ასტროლოგიური პროგნოზი
საზოგადოების განსჯის საგანი ამჯერად საზოგადოებრივ მაუწყებელში გენერალურ დირექტორსა და საინფორმაციო სამსახურის უფროსს შორის მომხდარი უთანხმოების საფუძველზე შექმნილი სიტუაცია გახდა. როგორც უკვე ცნობილია, მაუწყებლის დირექტორმა, გიორგი ბარათაშვილმა რეორგანიზაციის შედეგად საინფორმაციო სამსახურის უფროსი, ხათუნა ბერძენიშვილი თანამდებობიდან გაათავისუფლა. ამის გამო სამეურვეო საბჭომ თავად ბარათაშვილი გაათავისუფლა თანამდებობიდან.
სამეურვეო საბჭოს წევრები ამბობენ, რომ გიორგი ბარათაშვილმა არხზე შექმნილი დაძაბული და არაჯანსაღი სიტუაციის აღკვეთა ვერ შეძლო.
გიორგი ბარათაშვილი სამეურვეო საბჭოს გადაწყვეტილებას უსამართლოს უწოდებს. "როგორ შეიძლება, არჩეული გენერალური დირექტორი გადააყენო იმიტომ, რომ საკადრო გადაადგილება მოახდინა?" - კითხულობს ის. ხათუნა ბერძენიშვილის აზრით კი, სამეთვალყურეო საბჭომ სამართლიანი გადაწყვეტილება მიიღო. "ბორდის ხელმძღვანელმა, ლევან გახელაძემ სწორად ახსნა, რომ იმ პოლიტიკურ კრიზისში, რომელშიც ახლა საზოგადოებრივი მაუწყებელი იმყოფება, არ შეიძლებოდა გარკვეული მხრიდან სიტუაციის პროვოცირება, მაგრამ აქ მთავარი კიდევ ერთი ფაქტორია - დაბალანსებული საინფორმაციო გამოშვებები. რეზოლუციების მიუხედავად, არ მთავრდება ზეწოლის მცდელობა საინფორმაციო სამსახურზე", - ამბობს ბერძენიშვილი. ვნახოთ, რას ფიქრობენ ამის შესახებ საზოგადოებრივი მაუწყებლის სხვა თანამშრომლები და რიგითი მაყურებლები.
დოდო შონავა, საზოგადოებრივი მაუწყებლის მეორე არხის დირექტორი:
- რეორგანიზაციის შედეგად არხი არაერთმა თანამშრომელმა დატოვა, თუმცა, არც ერთ მათგანზე სამეურვეო საბჭოს გენერალური დირექტორისგან ანგარიში არ მოუთხოვია. ვნებათაღელვის მიზეზი მხოლოდ ერთი საკადრო გადაწყვეტილება გახდა. თანამშრომლებს გვინდოდა, რომ დავით პაიჭაძის გადაცემაში სამეურვეო საბჭოს მიერ მიღებული გადაწყვეტილების გამო მაუწყებელში შექმნილი პრობლემების შესახებ გვესაუბრა, მაგრამ დავით პაიჭაძემ თქვა, რომ ეს არ არის საზოგადოებისთვის საინტერესო თემა.
ნინო ზაუტაშვილი, პირველი არხის წამყვანი:
- ბორდმა არასწორი გადაწყვეტილება მიიღო. 2007 წლის 7 ნოემბერს, როდესაც "იმედი" დაარბიეს, მაშინ მე ჩემს კოლეგებს ვუთხარი, - ფრთხილად იყავით, ეს ყველაფერი შეიძლება მოხდეს თქვენთანაც. დღესაც გაფრთხილებთ, ფრთხილად იყავით, ეს ყველაფერი შეიძლება მოხდეს თქვენთანაც! საზოგადოებრივი ცნობიერება უნდა ამაღლდეს და ყველაფერი უნდა დაიწყოს ზუსტად აქედან, ზუსტად დღეიდან. ჩვენ ან დავიხოცებით, ან ყველაფერს გავაკეთებთ ისე, როგორც წესი და რიგია.
გოგა ჩართოლანი, გადაცემა "სამოთხის ვაშლების" პროდიუსერი:
- სრულიად გაუგებარია ის პუნქტები, რის გამოც სამეურვეო საბჭომ გიორგი ბარათაშვილის გენერალური დირექტორობიდან გათავისუფლების გადაწყვეტილება მიიღო. თანამშრომლების უმრავლესობისთვის გაუგებარია, რაში მდგომარეობს კრიზისი. ამ ეტაპზე კრიზისი გენერალურ დირექტორს ნამდვილად არ შეუქმნია. თუ თანამშრომლის ერთი თანამდებობიდან მეორეზე გადაყვანა კრიზისი იყო, მით უფრო - პოლიტიკური, მართლა გაოცებული ვარ. როდესაც საზოგადოებრივ მაუწყებელზე გარკვეული ცვლილებები დაიწყო და ბევრ თანამშრომელს თანამდებობის დატოვება მოუხდა, კრიზისი მაშინ რატომ არ გამოიკვეთა?
მაია თალაკვაძე, მაყურებელი:
- "ნაციონალები" ამბობენ, რომ მედიას "ქართული ოცნება" აკონტროლებს. ამ ამბის შემდეგ რაღას იტყვიან? ხომ ხედავთ, როგორ არ შეარჩინეს გენერალურ დირექტორს "ნაციონალების" აქტიური მხარდამჭერისთვის თანამდებობიდან გათავისუფლება?
- ფიქრობთ, რომ ხათუნა ბერძენიშვილი "ნაციონალების" აქტიური მხარდამჭერია?
- რა თქმა უნდა, ამაში დარწმუნებული ვარ, ეს ქალბატონი თავის პოზიციას აშკარად გამოხატავს. ეს ახალი აღმოჩენა არ არის. მეცინება, როდესაც "ნაციონალები" "ქართულ ოცნებას" ადამიანების სამსახურიდან პოლიტიკური ნიშნით გათავისუფლებაში ადანაშაულებენ. ეგენი ისეთი ჩაფრენილები არიან თავიანთ სკამებს, "ქართული ოცნება" კი არა, მამაზეციერი ვერ ააძრობს იქიდან. თავად განსაჯეთ, პროკურატურაც კი სავსეა "ნაციონალებით". არადა, ხალხს იმედი ჰქონდა, რომ ეს უწყება სამართლიანობას აღადგენდა. როგორ დავიჯერო, რომ პროკურატურაში მოკალათებული "ნაციონალები" თავიანთ ხალხს დაიჭერენ?
ნოდარ გრიშიკაშვილი, მაყურებელი:
- არა მგონია, ბორდის გადაწყვეტილება სამართლიანი იყოს. ჩემი აზრით, არხის გენერალურ დირექტორს საკადრო ცვლილებების განხორციელების საშუალება უნდა ჰქონდეს. თუმცა, ეს ისე უნდა მოხდეს, რომ თანამშრომლის შრომითი უფლებები არ უნდა შეილახოს.
როზა გოგსაძე, მაყურებელი:
- მაგას რა დიდი მკითხაობა უნდა? ყველამ ვიცით, რომ საზოგადოებრივი მაუწყებელი "ნაციონალების" ტელევიზიაა. ისიც ყველამ ვიცით, ვინ არის ხათუნა ბერძენიშვილი. ჰოდა, არ აპატიეს გიორგი ბარათაშვილს, "ნაციონალების" გულმხურვალე გულშემატკივრის "ჩამოლაბორანტება".
გაიოზ მესაბლიშვილი:
- საზოგადოებრივი მაუწყებელი, ისევე, როგორც "რუსთავი 2", ოპოზიციის სამსახურშია. გიორგი ბარათაშვილმა ობიექტურობა მოინდომა და ხათუნა ბერძენიშვილს იმის გამო უსაყვედურა, რომ აშკარად ოპოზიციის სასარგებლოდ აკეთებდა ყველაფერს. ჩემი აზრით, "ნაციონალები" ძალიან თავხედობენ, როდესაც ხელისუფლებას მედიის ზეწოლაში ადანაშაულებენ. ზეწოლა და ასეთი რამეები მაგათი მოგონილია.
ხათუნა ბახტურიძე
(გამოდის ხუთშაბათობით)
