შონზომ ფრაქცია "ნაციონალური მოძრაობა" დატოვა

თბილისის საკრებულოს ფრაქცია "ნაციონალური მოძრაობა" კიდევ ერთმა წევრმა - ზურაბ გაჩეჩილაძემ, იგივე შონზომ დატოვა. ამის შესახებ დღეს გამართულ პრესკონფერენციაზე ფრაქცია "თავისუფლებას" თავმჯდომარე ირაკლი შიხიაშვილმა განაცხადა.

მისი თქმით, ეს გადაწყვეტილება ზურა გაჩეჩილაძემ დამოუკიდებლად მიიღო და უკვე შეუერთდა ფრაქცია "თავისუფლებას".

შიხიაშვილი ამბობს, რომ "ნაციონალური მოძარობის" რღვევა გრძელდება და გაგრძელდება, ვიდრე ხალხი არ მიიღებს იმას, რის გამოც გააკეთა არჩევანი.

"ხალხს უნდა სამართლიანი, დაბალანსებული ხელისუფლება ქალაქში. აქედან გამომდინარე, ყველა გონიერი, ღირსეული ადამიანი, ვისაც პასუხისმგებლობა აქვს საკუთარი ამომრჩევლის წინაშე, გაემიჯნება "ნაციონალურ მოძრაობას" და უახლოეს მომავალში დატოვებენ მათ რიგებს", - განაცხადა ირაკლი შიხიაშვილმა.

რაც შეეხება კითხვას, თავად ზურა გაჩეჩილაძემ რატომ არ გააკეთა ეს განცხადება, შიხიაშვილის ინფორმაციით, ის თბილისში არ იმყოფება, ერთ კვირაში ჩამოვა თბილისში და თვითონ გამოეხმაურება ამ ფაქტს.

რაც შეეხება მიზეზს, თუ რის გამოც დატოვა ფრაქცია ზურა გაჩეჩილაძემ, შიხიაშვილი ამბობს, რომ მიზეზი არის ის მოვლენები, რომელიც ვითარდება ბოლო დროს, ხოლო მთავარი მასტიმულირებელი იყო 8 თებერვალი.

შიხიაშვილის განცხადებით, ამ დროისთვის საკრებულოს უმრავლესობაში კვლავ "ნაციონალური მოძრაობაა", 29 დეპუტატით, ხოლო ოპოზიციაში - 18. რაც შეეხება კონკრეტულად ფრაქცია "თავისუფლებას", მათი რაოდენობა 7-მდე გაიზარდა.

"ინტერპრესნიუსი"

იხილეთ: რატომ ტოვებენ "ნაციონალურ მოძრაობას" პარტიის წევრები?