გიორგი ნაზღაიძე ცოლის მოყვანას აპირებს

მოდელმა და ტელე-რადიოწამყვანმა - გიორგი ნაზღაიძემ ტანსაცმლის დიზაინის სფეროშიც სცადა ბედი: მამაკაცების სამოსის კოლექცია შექმნა. როგორც თავად ამბობს, მის სამოსში გამოწყობილი მამაკაცების წინაშე ქალები უძლურები ხდებიან... თავად აღარ ანაღვლებს, ქალებისთვის სასურველია თუ არა, რადგანაც მისი გული დაკავებულია და მალე დაოჯახებასაც აპირებს. "გზის" მეშვეობით გიორგი იმ ასაკოვან ქალბატონებს უხდის ბოდიშს, რომლებთანაც წინათ სასიყვარულო ურთიერთობა ჰქონია...

- რატომღაც, საზოგადოების გარკვეულ ნაწილს ჰგონია, რომ თავის მოვლას ბევრ დროს ვანდომებ, მაგრამ ასე არ არის. უბრალოდ, დილით ხელ-პირს ვიბან, თავს ვიწესრიგებ და სამოსს დღის რეჟიმის შესაბამისად ვარჩევ.

სახის კანის მოვლა

- 27 წლის ვარ და სახის კანის მდგომარეობას არ ვუჩივი. წლების მერე, თუკი ნაოჭები გამიჩნდება, შეიძლება სახის კრემიც გამოვიყენო. ღამის ცხოვრებით ვცხოვრობ. ჩემი აზრით, როცა ცნობილი ადამიანი ხარ, საზოგადოებამ დაღლილობა არ უნდა შეგატყოს. ზოგადად, კოსმეტიკას არ ვიყენებ. მხოლოდ თვალის ქვემოთ ვისვამ "დიორის" კოსმეტიკურ საშუალებას, რომელიც ჩაშავებულ ადგილებს კარგად ნიღბავს.

ვარცხნილობა და თმის ფერი

- ვარცხნილობას ხშირად და ხასიათის მიხედვით ვიცვლი. გრძელი თმაც მქონია, მაგრამ კულულები და "კიკინები" - არა.

- თმის შეღებვის სურვილი გაგჩენია?

- კი. ალბათ შენიშნე, რომ ბევრი ჭაღარა მაქვს. ჰოდა, თმას ბუნებრივ ფერად ვიღებავდი. შემდეგ მივხვდი, რომ მამაკაცს ჭაღარა უფრო მეტად უხდება (იცინის).

- როგორც ვიცი, მამაკაცების უმეტესობისთვის თმის შეღებვა მიუღებელია...

- რატომ? თმას ბევრი ქართველი მამაკაცი იღებავს, მაგრამ მათზე ცუდს არაფერს ამბობენ. ზოგადად, ვისაც როგორ უნდა, ისე იცხოვროს. თუკი 25 წლის ბიჭს ჭაღარის დამალვა სურს, ამაში საპანიკო არაფერია.

- ორიგინალური ვარცხნილობა თუ გქონია?

- ბევრჯერ. 18 წლის ასაკში, როცა რეალითი შოუში ვმონაწილეობდი, თავი ალაგ-ალაგ ავიპარსე და შოუდან რომ გამოვედი, ყველა ბავშვს ჩემნაირი ვარცხნილობა ჰქონდა (იღიმის).

- შენი მისამართით გამოთქმული უარყოფითი აზრი არასდროს გაშფოთებს?

- მხოლოდ ჩემი მეგობრების აზრს ვითვალისწინებ, ისინი კი ყოველთვის და ყველაფერში მხარს მიჭერენ, ჩემს გადაწყვეტილებას იწონებენ. ჩემთვის მთავარი მათი აზრია და არა - ვინმე "ფეისის", რომელიც ჩემი მეგობარი არ არის.

- ე.წ. "ფეისებთან" არ მეგობრობ?

- თითქმის ყველასთან კარგი ურთიერთობა მაქვს და ბევრთან ვმეგობრობ კიდეც. თუმცა, გარკვეულ (არც თუ ისე მცირე) ნაწილთან არ ვმეგობრობ, რადგან მათ ამბიცია ულევი აქვთ, რაღაცის კარგად გაკეთების შანსი - ნული...

- ეს საზოგადოება თავის წრეში არ გიღებს?

- არ მაინტერესებს, ისინი მიმიღებენ თუ არა. სურვილი რომ მქონოდა, მათთან აუცილებლად ვიმეგობრებდი. ამ "სვეტსკი" ელიტას არავითარი წრე არ აქვს და სად უნდა მიმიღონ?..

ვარჯიში და დიეტა

- ჭამა და ალკოჰოლური სასმელების მიღება ძალიან მიყვარს, მაგრამ ჭარბი წონა არ მაწუხებს - კარგად გამოვიყურები. ჩემი ასეთი აღნაგობა გენების დამსახურება გახლავთ. დიეტის დაცვა მხოლოდ სეზონურად მჭირდება, რადგან კუჭის წყლული მაქვს. ტრენაჟორებზე არ ვვარჯიშობ: საქმეების გამო იმდენს დავდივარ, რომ ეს არც მჭირდება. ზოგმა მამაკაცმა მკერდი კი გაიდიდა, მაგრამ მე ჩემი მკერდის ზომა მაკმაყოფილებს - მომწონს, მაისურზე რომ არ "მასკდება" (იცინის).

სამოსი

- შოპინგზე ვგიჟდები! მეგობრები "შოპოჰოლიკს" მეძახიან. მიმაჩნია, რომ ქალიც და მამაკაციც ყოველთვის გემოვნებით და მოდურად უნდა იცვამდნენ. პირადად მე, სამოსში ფულის გადახდა არ მენანება - რაც მინდა, ის აუცილებლად უნდა ვიყიდო. ტანსაცმლის შერჩევისას ძვირად ღირებულ და შედარებით იაფფასიან ბრენდებს ერთმანეთს ვუხამებ.

აქსესუარები

- საათები, სამაჯურები, ყელსაბამები და სათვალეები მიყვარს. აქსესუარი აუცილებლად, კარგი ხარისხის უნდა იყოს. შეიძლება, ჩვეულებრივი სამოსი გეცვას, მაგრამ ყურადღება აქსესუარით მიიქციო.

- აქსესუარები თავდაჯერებას გმატებს?

- თავდაჯერებას - არა, უბრალოდ, თავს კომფორტულად ვგრძნობ, როცა ვიცი, რომ მაგალითად, ისეთი სათვალე მიკეთია, რომელიც ბევრ ადამიანს მოსწონს. სათვალე, საათი, სამაჯური, ყელსაბამი, ჯვარი, კულონი წმინდა გიორგისა და ღვთისმშობლის გამოსახულებით - ეს ყველაფერი შინიდან გასვლისას აუცილებლად უნდა მეკეთოს.

იმიჯი

- სექსუალური პარტნიორი მატერიალური სიძლიერის მიხედვით არასოდეს შეგირჩევია?

- არა. დავიჯერო, ასეთი კაცის შთაბეჭდილებას ვტოვებ? ცნობისათვის, რაც თავი მახსოვს, სულ ვმუშაობ...

- ყოველთვის სკანდალური განცხადებებით გამოირჩეოდი. ამას საკუთარი თავის პიარისთვის ხომ არ აკეთებდი?

- ბოლომდე გულწრფელი რომ ვიყო, ისეთ რაღაცებს ვიტყოდი, მტრისას!.. ჩემს მოსაზრებებს თავშეკავებულად ვაფიქსირებ ხოლმე.

- ერთი პერიოდი ასაკოვან ქალებთან ურთიერთობაზე ალაპარაკდი...

- მაშინ ბევრმა ადამიანმა სწორად ვერ გამიგო: 23 წლის ვიყავი და 35-37 წლის ქალბატონებს მივიჩნევდი ასაკოვნებად. არადა, ისინი ახლაც კი, ბევრ ახალგაზრდა გოგონაზე უკეთ გამოიყურებიან. მათთან ფლირტი, სასიყვარულო თუ სექსუალური ურთიერთობა მგონი, "გასატეხი" არ იყო, მით უმეტეს, რომ კონკრეტულ მანდილოსნებს ვუყვარდი და ჩემთან ყოფნა სიამოვნებდათ. ცნობისათვის, ამ ქალბატონების ფინანსებით პარიზშიც გახლდით...

- ამიტომაც იყო, რომ შენზე ამბობდნენ, ჟიგოლოსავით იქცევაო...

- ჟიგოლო - "კაცი გამოძახებით" გახლავთ, ხოლო როცა ქალთან ერთად ცხოვრობ, რომელსაც შენზე კარგი მატერიალური მდგომარეობა აქვს, ეს სულ სხვა რამე გახლავთ. აქვე აღვნიშნავ, რომ ბევრი ქალი არ მყოლია და ვინც მყავდა, იმ პერიოდში ძალიან მიყვარდა. ამიტომ ჩემთვის შეურაცხმყოფელია, როცა მათ ყოველთვის "რაღაცნაირად" ვახსენებ. ამ ქალბატონებს ბოდიშს ვუხდი იმისთვის, რომ ეს ამბავი თავიდანვე სხვანაირად "გაჟღერდა".

საქმე

- რადიო და ტელეწამყვანი აღარ ვარ, დიზაინერობას მოვკიდე ხელი. გარდა ამისა, მაქვს ბიზნესი, მაგრამ ამ თემაზე ლაპარაკი არ მინდა.

- დიზაინერობა რამ გადაგაწყვეტინა?

- მე და ჩემი მეგობარი - ირა ერთ "სვეტსკი" საღამოზე გახლდით. ირამ ერთი დიზაინერის შესახებ თქვა: ეს რა დიზაინერია? ბავშვობიდან ხატავ, ჰოდა, მიდი, შენც დახატე და გააკეთე რამეო... ესკიზები ერთ ღამეში დავხატე, შემდეგ კი რაღაცები დავხვეწეთ და მამაკაცების სამოსის კოლექციაც შეიქმნა. იდეისთვის ირას დიდ მადლობას ვუხდი... მიზნად დავისახე, ჩემ მიერ შექმნილ სამოსში გამოწყობილი მამაკაცების წინაშე ქალები უძლურები ყოფილიყვნენ და გაყიდვებით თუ ვიმსჯელებთ, მიზანს მივაღწიე კიდეც.

- ტანსაცმლის დიზაინის სფეროში თავის დამკვიდრებას აპირებ?

- არა. ისეთი კარგი დიზაინერები გვყავს, რომ მათ კონკურენტობაზე ფიქრი სირცხვილიც კი იქნება. უბრალოდ, ხანდახან შოუს გავმართავ და ცნობისათვის, ჩემი ყოველი კოლექცია საქველმოქმედო იქნება.

- საკუთარ თავს ქალებისთვის სასურველ მამაკაცად მიიჩნევ?

- რადგანაც უკვე "დაკავებული" ვარ, ამას ჩემთვის მნიშვნელობა აღარ აქვს. ისე კი, როგორც იცი, გადაცემებში ხან სექსუალურ მამაკაცად მასახელებენ, ხან - სასურველად, "მოღუნულად"... ერთი ვიცი: ჩვეულებრივი, მოკვდავი ადამიანი ვარ. სიმართლე გითხრათ, ვისაც არ მოვწონვარ, "ფეხებზე მკიდია"!

ოჯახი

- დედ-მამა, 3 ძმა და ძაღლი - ლულუ მყავს. დაახლოებით 9 წლის წინ, როცა ლულუ სახლში მოვიყვანეთ, დედა ლოგინად იყო ჩავარდნილი. ძაღლი ხელში რომ აიყვანა, სასწაული მოხდა: 2 დღეში ლოგინიდან ადგა. მას შემდეგ ლულუ ჩვენთვის ოჯახის წევრივით არის...

ცოტა ხნის წინ დავინიშნე, ისიც ჩემი ასაკის გახლავთ. ერთმანეთის შესაფერისი წყვილი ვართ. მალე დავოჯახდები. მე და ჩემი რჩეული ძალიან ბედნიერები, შეხმატკბილებულები ვართ. გვინდა, რომ მალე ბავშვიც გვეყოლოს...

ეთო ყორღანაშვილი

ჟურნალი ”გზა”

(გამოდის ხუთშაბათობით)