31
მარტიდღის ზოგადი ასტროლოგიური პროგნოზი
სასტუმრო "რედისონში" შრომის კანონმდებლობაში ცვლილებების პროექტის პრეზენტაცია მიმდინარეობს.
პრეზენტაცია იუსტიციის მინისტრმა თეა წულუკიანმა გახსნა. როგორც პრეზენტაციის დაწყებამდე წულუკიანმა აღნიშნა, შრომის მოქმედ კოდექსში ყველაზე მეტ კრიტიკას როგორც ქვეყნის შიგნით, ასევე საერთაშორისო ორგანიზაციების მხრიდან, დამსაქმებლის მიერ დასაქმებულის არგუმენტაციის გარეშე გათავისუფლება იმსახურებდა.
მისივე თქმით, ახალი პროექტის მიხედვით, ეს საკითხი მთლიანად იცვლება, ასევე იცვლება შრომითი ხელშეკრულებების ფორმატი, რომელიც ძირითადად ზეპირ ხასიათს ატარებდა, იყო მოკლევადიანი და დასაქმებულს საკუთარი უფლებების დაცვის შესაძლებლობას არ აძლევდა. თეა წულუკიანის განცხადებით, აღნიშნული საკითხები ცვლილებათა პროექტში ახლებურად რეგულირდება.
"რეალურად დღეს საქართველოს არ აქვს ტექსტი, რომელიც იმსახურებს შრომის კოდექსის სახელწოდებას, ამიტომაც გვქონდა შეხვედრები პროფკავშირებთან, დამსაქმებლებთან, საერთაშორისო ორგანიზაციებთან და შევიმუშავეთ ახალი პროექტი. მთავარი აქ არის ერთი რამ - არც ერთ დამსაქმებელს მომავალში არ შეეძლება დასაბუთების გარეშე, ერთი ხელის მოსმით, დასაქმებული სამსახურიდან გაათავისუფლოს. ასევე, შრომითი ურთიერთობის ზეპირი ფორმები შეიძენენ წერილობით და უფრო დეტალურ ხასიათს. დროებით დასაქმებულთა ინტერესები იქნება მაღალი ხარისხით დაცული. არავითარ შემთხვევაში არ უნდა იფიქროს დამსაქმებელმა, რომ შრომის კოდექსი მასზე იქნება მორგებული", - განაცხადა წულუკიანმა.
იუსტიციის მინისტრის განცხადებით, შრომის კანონმდებლობის რეფორმირება იუსტიციის სამინისტროს ახალი მთავრობის პირველივე სხდომაზე დაევალა და ცვლილებების შემუშავებისთვის მინისტრის მოადგილის, ალექსანდრე ბარამიძის ხელმძღვანელობით, სამუშაო ჯგუფი შეიქმნა, რომელმაც არსებული კანონმდებლობის ხარვეზების გამოსავლენად კვლევა ჩაატარა. სამუშაო ჯგუფმა ასევე კონსულტაციები გამართა სამინისტროების, პროფესიული კავშირების, დამსაქმებელთა სხვადასხვა გაერთიანებების, დიპლომატიური კორპუსისა და სამოქალაქო სექტორის წარმომადგენლებთან.
დღევანდელ შეხვედრას ასევე ესწრებიან საკანონმდებლო ხელისუფლების, ბიზნესსექტორის, მთავრობის, პროფკავშირების, საერთაშორისო ორგანიზაციებისა და დიპლომატიური კორპუსის წარმომადგენლები.
როგორც პროფკავშირების ხელმძღვანელი ირაკლი პეტრიაშვილი აცხადებს, ახალ პროექტში სამუშაო ჯგუფმა თითქმის სრულად გაითვალისწინა ყველა ის მოთხოვნა, რომელიც პროფკავშირებს შრომის კოდექსის მიმართ ჰქონდა.
იხილეთ ვიდეო
