1
აპრილიდღის ზოგადი ასტროლოგიური პროგნოზი
მთავარი პროკურორი არჩილ კბილაშვილი ნინო ქადაგიძე-ჟვანიას განცხადებას პასუხობს და აცხადებს, რომ ირაკლი ოქრუაშვილის გათავისუფლება მტკიცებულებების უსაფუძვლობის გამო მოხდა.
როგორც კბილაშვილმა "ინტერპრესნიუსს" განუცხადა, ქადაგიძის მოსაზრება იმის თაობაზე, რომ მისთვის ოქრუაშვილის გათავისუფლება მოულოდნელი იყო და ალბათ, "იქ რაღაც პროცესები მიდის", მხოლოდ მისი სუბიექტური აზრია.
"ოქრუაშვილის გათავისუფლება ზურაბ ჟვანიას საკითხს საერთოდ არ უკავშირდება. ეს უკავშირდება იმას, რომ მტკიცებულებები, რომელიც იქნა წარდგენილი ბრალის დასასაბუთებლად, იყო უსაფუძვლო - სასამართლო განხილვის დროს ყველა მოწმემ, რომელიც ადრე მის წინააღმდეგ ჩვენებას აძლევდა, განაცხადა, რომ ზეწოლის შედეგად მისცეს ცრუ ჩვენებები, ხოლო სხვა მტკიცებულებები არ იყო ან იყო სუსტი. ამიტომაც იქნა მიღებული ოქრუაშვილის გათავისუფლების გადაწყვეტილება, ეს ამ თემას საერთოდ არ უკავშირდება და აქედან გამომდინარე, ვფიქრობ, ეს მისი სუბიექტური აზრია", - განმარტა მთავარმა პროკურორმა.
რაც შეეხება იმას, მოხდება თუ არა ოქრუაშვილის დაკითხვა იმ განცხადებასთან დაკავშირებით, რომელიც მან ზურაბ ჟვანიას გარდაცვალებასთან დაკავშირებით გააკეთა, არჩილ კბილაშვილის თქმით, გადაწყვეტილება საქმის გამომძიებელმა უნდა მიიღოს.
"რომელი გამომძიებელიც საქმეს იძიებს და, რომელი პროკურორიც მას ზედამხედველობს, ის იღებს გადაწყვეტილებას, ვინ დაკითხოს და არის თუ არა პირი საქმესთან შემხებლობაში მყოფი. მე არ ვიღებ ამ გადაწყვეტილებას. მე რომ საქმის გამომძიებელი ან პროკურორი ვყოფილიყავი, ოქრუაშვილს იმ ფრაზის გამო არ დავკითხავდი, მაგრამ თუ საქმეში არის სხვა მონაცემები მისი ინფორმირებულების შესახებ, ალბათ დაიკითხება. შეიძლება დღეის მდგომარეობით დაკითხულიცაა, არ მომიკითხავს, გადავამოწმებ, ამის საშუალება მაქვს", - აღნიშნა კბილაშვილმა.
რაც შეეხება უშუალოდ ზურაბ ჟვანიას გარდაცვალების საქმის გამოძიების მიმდინარეობას, მთავარი პროკურორის თქმით, გამოძიება ჯერჯერობით არანაირი დასკვნის გაკეთების საშუალებას არ იძლევა.
"გამოძიება ჯერ არ გვაძლევს არანაირი დასკვნის გაკეთების საფუძველს - ასე იყო თუ ისე. ამაზე პასუხს გავცემთ, როცა გამოძიება მივა ლოგიკურ შედეგამდე, ძალიან ინტენსიურად ვმუშაობთ, ვთანამშრომლობთ გოგლა ჟვანიასთანაც, რომელიც გამომძიებელთან კავშირშია",-აღნიშნა მთავარმა პროკურორმა.
18 იანვარს თავდაცვის ყოფილმა მინისტრმა ირაკლი ოქრუაშვილმა "მე-9 არხთან" საუბარში განაცხადა, რომ მისი აზრით, ზურაბ ჟვანიას გარდაცვალება "მკვლელობა არ იყო".
ნინო ქადაგიძე-ჟვანიამ ამ განცხადებაზე კომენტარი დღეს "ინტერპრესნიუსთან" გააკეთა და აღნიშნა, რომ ოქრუაშვილის ნათქვამი ოჯახის პოზიციას არ ცვლის.
მისივე განმატებით, ოქრუაშვილი ყოველთვის იმას ლაპარაკობს, რაც აწყობს.
"რა თქმა უნდა, ოქრუაშვილის განცხადება არანაირად არ ცვლის ჩვენს პოზიციას. ოქრუაშვილი ყოველთვის იმას ლაპარაკობს, რაც აწყობს და ამ სიტუაციაში ზუსტად არ ვიცი, რატომ აწყობს ამის თქმა. ალბათ, ეს მის ციხიდან გამოსვლასთანაა დაკავშირებული", - განმარტა ქადაგიძე-ჟვანიამ.
ამასთან, ზურაბ ჟვანიას ქვრივის თქმით, მისთვის ოქრუაშვილის გათავისუფლება მოულოდნელი იყო.
"ჩვენთვის მოულოდნელი იყო, რომ ოქრუაშვილი ასე უცებ გაათავისუფლეს. ალბათ, იქ რაღაც პროცესები მიდის, თუმცა ზუსტად მიჭირს თქმა. მე ოქრუაშვილისგან განსხვავებით რაც არ ვიცი, იმას არ ვლაპარაკობ. ალბათ, გაირკვევა ყველაფერი", - აღნიშნა ნინო ქადაგიძემ.
