მნიშვნელოვანი ინფორმაცია
4
მაისიდღის ზოგადი ასტროლოგიური პროგნოზი
კვირა, მთვარის მერვე დღე დაიწყება 11:21-ზე, მთვარე ლომშია
ახალი საქმეების დასაწყებად ნეიტრალური დღეა. დიდ დროსა და ენერგიას ითხოვს ადრე დაწყებული საქმეები. მნიშვნელოვანი გადაწყვეტილებების მიღება სხვა დღისთვის გადადეთ. კარგი დღეა უძრავ ქონებასთან დაკავშირებული საქმეების მოსაგვარებლად. კარგია მივლინების, მოგზაურობის დასაწყებად. ხშირად იმოძრავეთ, გადააადგილეთ ავეჯი, განაახლეთ ინტერიერი. სხვა დღისთვის გადადეთ ქორწინება და ნიშნობა. მოერიდეთ კუჭის გადატვირთვას, მოწევას, სმას. უმჯობესდება ფსიქოემოციური ფონი. ადამიანი უფრო ხალისიანი ხდება. კარგად გამოიძინეთ, მიიღეთ მზის აბაზანები და დიდხანს ისეირნეთ.
მნიშვნელოვანი ინფორმაცია
მკითხველის რჩევით
ასევე დაგაინტერესებთ
როგორ აფასებს დავით საგანელიძეს მისი მეუღლე
23:06 / 16-01-2013
ქალბატონი 23 წლისაა, მამაკაცი მასზე 30 წლით უფროსი. მათი დაქორწინებიდან მეოთხე წელიწადი დაიწყო და უკვე ორი შვილი ჰყავთ - ორი წლის ნოდარი, რომელსაც სახელი ბაბუის პატივსაცემად დაარქვეს და 10 თვის ელენე. ახალი წლის დღეებში მათ ოჯახს ვსტუმრობ. კართან ბავშვები მეგებებიან ძიძასთან ერთად. უხარიათ სტუმრის მისვლა და ჩემი ყურადღების მიქცევას ცდილობენ - ნოდარს ნაძვის ხესთან მივყავარ და თოვლის ბაბუის საჩუქრებს მაჩვენებს, ელენე მიღიმის და მეპრანჭება. სხვათა შორის, ელენე უკვე დადის. ცოტა ხანში საახალწლოდ ლამაზად მორთულ ოთახში ბავშვების დედაც შემოდის - კარგა ხანია, სოციალურ ქსელში ვმეგობრობთ, მაგრამ პირისპირ პირველად ვხვდებით. ძალიან ლამაზია და სასიამოვნო ადამიანიც ჩანს. მიბოდიშებს, მეუღლე რომ ვერ დამხვდა შინ. არც მიკვირს - ვიცი, ძალიან დაკავებულია. ახალგაზრდა ქალბატონს სოფო ჰქვია, გვარად ფარცხალაძეა, მისი მეუღლე კი საპარლამენტო უმრავლესობის ლიდერი დავით საგანელიძე გახლავთ.
- სოფო, სამწლიანი თანაცხოვრების შემდეგ რამით ხომ არ განიხიბლეთ, ხომ არ გამოიცვალა ბატონი დავითი?
- დათო სრულიად არ შეცვლილა, ეგაა, რომ მისმა პოლიტიკურმა სტატუსმა ფიზიკურად ცოტათი "დაგვაშორა" - სულ ქუთაისშია და შაბათ-კვირასაც იმ შემთხვევაში ჩამოდის, თუ აუცილებელი საქმე აქვს თბილისში. თუმცა ტელეფონით წამდაუწუმ რეკავს და დაწვრილებით ინტერესდება - როგორ ვართ, ბავშვებმა რა ჭამეს, რას აკეთებენ, დროულად დაიძინეს თუ არა და ასე შემდეგ. მოკლედ, დღის განრიგი ზეპირად იცის.
- ბევრი მითქმა-მოთქმა კი მოჰყვა თქვენს ქორწინებას. მაინც რით მოგხიბლათ წლოვანებით ასე უფროსმა მამაკაცმა?
- უპირველესად ვიტყვი, რომ მიკვირს, როდესაც უცნობი ადამიანები სხვების ცხოვრებას, გადაწყვეტილებებს განიხილავენ და რატომღაც ჰგონიათ, მათზე მეტად ღელავენ. არც კი ფიქრობენ, თვითონ ის ადამიანები რას განიცდიან, საკუთარ ნაბიჯზე თუ იფიქრეს, ინერვიულეს თუ არა და ასე შემდეგ. როგორ ფიქრობთ, ყველაზე მეტად დედაჩემი არ ინერვიულებდა? მით უფრო, რომ დათოზე ცოტა უმცროსიც კი არის - ადრე გათხოვდა და 17 წლის იყო, მე რომ გავუჩნდი... იმ საღამოსვე, დათო რომ შემოვიდა აფთიაქში, სადაც ვმუშაობდი, სიყვარულზე არც მიფიქრია. ჩვეულებრივ შეიძინა რაც სჭირდებოდა და წავიდა, მაგრამ... თურმე, აფთიაქის მისამართი წაუკითხავს, შემდეგ "09"-ში დაურეკავს, აფთიაქის ტელეფონის ნომერი გაუგია, მერე ბევრი უფიქრია თუ ცოტა, გადაუწყვეტია და... აფთიაქში დამირეკა, - გუშინ დილით ვიყავი თქვენთან, თუ გახსოვართო? გამეღიმა: დილით ვერაფრით იქნებოდა, რადგან საღამოს ცვლაში ვმუშაობდი და ვუთხარი კიდეც. მკითხა, შეიძლება ტელეფონით ვისაუბროთ ხოლმე და ვიმეგობროთო? მის შემოთავაზებას ცუდად ვერ მივიღებდი, რადგან სერიოზულ ადამიანად ვიცნობდი შორიდან. ცხადია, ისიც ვიგრძენი, რომ მოვეწონე, ამიტომ დავთანხმდი. მერე შევხვდით კიდეც ლესელიძის ქუჩაზე... ვფიქრობ, ყველაფერი მაინც ღვთის ნება იყო, აბა, რატომ სხვა აფთიაქში არ შევიდა? რაღაცები ხდება ჩვენს ცხოვრებაში, რაც "სხვაგან" წყდება. მთავარია, მივხვდი, რომ დათო იდეალური ქმარი და მამა იქნებოდა. ზოგადად, რაჭველი კაცები ხომ გამოირჩევიან ამით. ბევრი თანამედროვე ქალისთვის სამსახურია პრიორიტეტული, მე კი უფრო მეოჯახე ვარ. ისე, სერიოზულობა არც ერთს გვაკლია. შეიძლება ჩემს ასაკთან შედარებით გაცილებით სერიოზულიც კი ვჩანვარ.
- თქვენ, მგონი, მამა ადრე გარდაგეცვალათ.
- სამი წლის ვიყავი და ამიტომ მამა არც მახსოვს. ვიცი, რატომაც ახსენეთ ეს ამბავი: ფიქრობთ, რაღაცნაირად ამანაც განაპირობა ჩემი არჩევანი? საერთოდ, ისე მოხდა ცხოვრებაში, რომ ბაბუებიც ჩემს დაბადებამდე გარდაიცვალნენ, მამის ძმაც გარდაცვლილია... შეიძლება, ამ ადამიანების არყოფნაც დათომ შემივსო... ის მართლა ძალიან კარგი პიროვნებაა, ნამდვილი მამაკაცი და უთბილესი ადამიანია. შინიდან ისე არ გავა, ოჯახის ყველა წევრი რომ არ ჩაგვკოცნოს. დათოს დედაც ჩვენთან ცხოვრობს და უნდა ნახოთ, რა თბილად ექცევა. ასე მგონია, კაცს თუ დედა არ უყვარს, ამქვეყნად არც არავინ ეყვარება, ამიტომ მახარებს მათი ასეთი ურთიერთობა. მეც შეიძლება წამდაუწუმ არ მითხრას, - მიყვარხარო, - მაგრამ ყოველ წუთს რომ მომიკითხავს, ბავშვებით რომ ინტერესდება, დიდ სიყვარულს არ ნიშნავს? მე კი ბავშვობიდან თბილ და სრულყოფილ ოჯახზე ვოცნებობდი. ხშირად წარმოვიდგენდი ხოლმე: ვსხედვართ სუფრასთან დედა, მამა, ჩემი და და მე, ვსვამთ ჩაის და ირგვლივ ყველაფერი სიყვარულითაა სავსე... სამწუხაროდ, ცხოვრებაში ასე არ მოხდა, რადგან მამა ადრე გარდაიცვალა... ადამიანმა ოჯახის ფასი უნდა იცოდე და თუ ამას ვერ დააფასებ, ცხოვრებაში ვერაფერს გააკეთებ. შვილებიც ასე უნდა გაზარდო. დღეს ჩვეულებრივი, სიყვარულით სავსე ოჯახი მაქვს, სადაც ხან შეიძლება ვკამათობთ, ხან - გვწყინს, უფრო მეტად კი ერთად ყოფნა გვიხარია და გვიყვარს. მინდა, დიდი ასოებით დაწეროთ, რომ ვერანაირი ანგარება და ძვირფასი ნივთები ვერ გადაარჩენს ურთიერთობას, თუკი შინ სიყვარული და სითბო არ არის. გგონიათ, რომ ძალიან მანებივრებს დათო? სულაც არა. ზედმეტი არაფერია საჭირო, რადგან შეიძლება მერე ყველაფერმა ფასი დაკარგოს. ალბათ, დათომ ეს კარგად იცის და ამიტომაც ამჯობინებს ზომიერებას. მეც ბევრ რამეს ვსწავლობ მასთან ურთიერთობით, მეც ვიზრდები. არასდროს მხიბლავდა კაცი, რომელიც ცოლის თვალის დაბრიალებით რაიმეს გააკეთებდა. ჩემმა შვილებმა უნდა იცოდნენ, რომ ოჯახში არის მამა, მამაკაცი, ძლიერი პიროვნება. ამ მხრივ, ოჯახს გარეთ მის სტატუსს დიდი მნიშვნელობა არც აქვს. შეიძლება ვინმეს არ მოეწონოს ჩემი ნათქვამი, მაგრამ არიან ე. წ. სტატუსიანი მამაკაცები, ოჯახში რომ ვერ კაცობენ. ასეთთან ვერც ვიცხოვრებდი. განა მე არ ვბრაზობ ხოლმე შინ, ვაღიარებ - ბუზღუნიც ვიცი, განსაკუთრებით მაშინ, დათოს წვეულებაზე რომ უნდა ჩემი წაყვანა - ძალიან ბრაზობს ხოლმე, რომ არ მივყვები, მე კი ბავშვების დატოვება მიძნელდება; ხანდახან ვიბუტები კიდეც, თვითონაც მებუტება, მაგრამ გაბუტვაც კი არ გრძელდება დიდხანს. საღამოს შინ რომ დაბრუნდება, მიუხედავად იმისა, რომელი ვართ ნაწყენი, მეტყვის ხოლმე: თუ გინდა, შეგირიგდე, სამ დათვლაში უნდა მაკოცოო (იცინის). მეც მივდივარ და ვკოცნი. სხვაგვარად არც შეიძლება: კამათისას ერთ-ერთმა უნდა დათმოს, თუმცა, უმჯობესია, მსგავსი სურვილი ორივეს გაუჩნდეს...
- მის საპარლამენტო გადაწყვეტილებებს ყოველთვის ეთანხმებით?
- ადრე გავაფრთხილე, იცოდე, ყველაზე დიდი ოპოზიცია მე გეყოლები, თუკი შენი გუნდისა და პირადად შენი გადაწყვეტილებები არ მომეწონა-მეთქი. თითქოს ჩასაფრებულივით ვარ და რაიმე უარყოფით ინფორმაციას რომ მოვისმენ, შინ მოსვლისთანავე მივვარდები ხოლმე, სიმართლე რომ დავადგინო. სამწუხაროდ, მერე აღმოჩნდება, რომ ბევრ ინფორმაციას დამახინჯებით გადმოსცემენ. იმიტომ კი არ ვლაპარაკობ ასე, დავით საგანელიძის ცოლი რომ ვარ, არამედ ამ ქვეყნის ერთი ჩვეულებრივი მოქალაქე ვარ, რომელსაც მართლა უნდა, ხალხმა ამოისუნთქოს, შვება იგრძნოს და აღარასოდეს გაწბილდეს.
- სოფო, როგორ წარმოგიდგენია მომავალი ცხოვრება, მუშაობას აპირებ?
- ძალიან ჩავჯექი შინ. რაც გავთხოვდი, სულ ფეხმძიმედ ვარ - ბავშვებს ვაჩენ და ვზრდი (იცინის). დათო მეხვეწება, სადმე წადი, ან შენს მეგობრებთან, ან ერთად ვეწვიოთ ვინმესო. სხვათა შორის, სულაც არ არის ეჭვიანი. გართობა, მოლხენა ძალიან უყვარს და უნდა, მეც ვიმხიარულო. რამდენჯერ ყოფილა, შინ დაბრუნებული მისჯდომია ჩვენს როიალს, აქეთ-იქით ბავშვები დაუსვამს, ჩემთვისაც დაუძახია და უმღერია. გვაქვს ხოლმე ასეთი მუსიკალური საღამოები... მიხარია, ორი შვილი რომ მყავს. მესამეც მინდა, თანაც ვიცი, პატრიარქი მომინათლავს. ბებო მასწავლიდა ხოლმე და უკვე მეც ვხვდები, რომ კარგია ოჯახში ბევრი შვილი, საშუალება თუ გაქვს, მით უფრო უნდა გააჩინო. ოჯახი გაძლიერდება ამით.
ირმა ხარშილაძე
ყოველკვირეული გაზეთი "ყველა სიახლე"
(გამოდის ოთხშაბათობით)
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
ხანგრძლივი ზრდის შემდეგ, თბილისში პარკირების ჯარიმები შემცირდა, თანაც თითქმის 60%-ით
კვირის კითხვადი სტატიები
მნიშვნელოვანი ინფორმაცია
მკითხველის რჩევით
