3
აპრილიდღის ზოგადი ასტროლოგიური პროგნოზი
უკანონო შეიარაღებული ფორმირების მეთაურობის საქმეზე ირაკლი ოქრუაშვილისა და სხვა პირების სასამართლო პროცესზე პროკურატურამ ოქრუაშვილთან მიმართებაში აღმკვეთი ღონისძიების , პატიმრობის გირაოთი შეცვლის შუამდგომლობა დააყენა.
როგორც პროკურორმა ელიზბარ გოზალიშვილმა პროცესზე მოსამართლისადმი მიმართვისას აღნიშნა, ოქრუაშვილთან ერთად შუამდგომლობას ითხოვს მის ბიძაშვილთან, საქმის ერთ-ერთ ფიგურანტ იოსებ გიგუაშვილთან მიმართებაშიც.
პროკურორის განცხადებით, აღნიშნული პირები სასამართლოზე საკუთარი ნებით გამოცხადდნენ. აქედან გამომდინარე, საფრთხე, რომ ისინი სხვა მოწმეებზე ზემოქმედებას მოახდენენ, აღარ არსებობს და 10 ათასლარიანი გირაოს სანაცვლოდ პატიმრობიდან უნდა გათავისუფლდნენ.
აღნიშნულ შუამდგომლობას ნაწილობრივ არ დაეთანხმა დაცვის მხარე. კერძოდ, ირაკლი ოქრუაშვილისა და იოსებ გიგუაშვილის ადვოკატებმა, მამუკა ჭაბაშვილმა და ზვიად კორძაძემ განაცხადეს, რომ აღკვეთის ღონისძიება აღნიშნულ საქმეზე აღნიშნულ ორ პატიმართან მიმართებაში საერთოდ უნდა მოიხსნას, თუმცა, თუ სასამართლო მაინც საჭიროდ მიიჩნევს აღკვეთის ღონისძიების არსებობას, გირაოს თანხა 2 ათასი ლარით უნდა განისაზღვროს.
იქიდან გამომდინარე, რომ პროცესი 10.00 საათიდან 19.00 საათამდე მიმდინარეობდა, მოსამართლემ აღნიშნული შუამდგომლობის შესახებ გადაწყვეტილების მისაღებად დრო ითხოვა და პროცესი ხვალ, 14.00 საათისთვის ჩანიშნა. სწორედ ხვალ გახდება ცნობილი, დააკმაყოფილებს თუ არა მოსამართლე ხათუნა ხარჩილავა პროკურატურის შუამდგომლობას და, ასევე, ცნობილი გახდება, მოხდება თუ არა დაცვის მხარის პოზიციის გათვალისწინება 10 ათასის ნაცვლად, 2 ათასლარიანი გირაოს შეფარდებასთან დაკავშირებით.
რაც შეეხება შეიარაღებული ფორმირების შექმნისა და აღნიშნული ჯგუფის საქართველოში დესტაბილიზაციისთვის შემოსვლის მცდელობაზე ბრალდებული რვა პირის, მათ შორის ოქრუაშვილის საქმის განხილვას, იგი მოწმეების დაკითხვის ეტაპით 11 იანვარს, 16.00 საათზე გაგრძელდება. დასაკითხი დარჩა სამი მოწმე, მათ შორის ერთი სწორედ აღნიშნულ საქმეზე მსჯავრდებული მიხეილ მაჭარაშვილია.
