31
მარტიდღის ზოგადი ასტროლოგიური პროგნოზი
პენჯაბელმა ფერმერებმა საქართველოში ახალ და იაფფასიან საძოვრებს მიაგნეს, - სტატიას ამ სათაურით ბრიტანული გამოცემა The Guardian-ი აქვეყნებს.
პუბლიკაცია ერთ-ერთი ინდოელი ფერმერის, ტაჯინდერ სინგჰის ისტორიას ასახავს.
როგორც ავტორი აღნიშნავს, "კეთილსულოვანი კავკასიის მიწების დამუშავებას" ინდოელებს მიწის მაღალი გადასახადები აიძულებს.
სტატიის თანახმად, საქართველოში ათასობით ჰექტარი ნოყიერი მიწის არსებობის შესახებ 38 წლის სინგჰიმ დიუსელდორფში მზარეულად მუშაობისას შეიტყო.
"კონტრასტი საქართველოსა და მისი მშობლიური პენჯაბის მოსახლეობასა და მიწის მაღალ გადასახადებს შორის გასაოცარი იყო. ასე რომ, ორი თვის წინ, ის და მისი ორი მეგობარი ამსტერდამიდან თბილისში გაფრინდნენ - 50 ჰექტარი მიწის იჯარის ხელშეკრულების გასაფორმებლად. უკან დაბრუნებულმა სინგჰმა განაცხადა, რომ ბედნიერი იყო, იმის მიუხედავად, რომ ჯერ ოდნავაც ვერ გარკვეულიყო თავისი ახალი ადგილსამყოფელის გეოგრაფიაში", - წერს სტატიის ავტორი.
როგორც ინდოელი ფერმერი ყვება, ერთ ჰექტარ მიწაში, რომელიც 99-წლიანი იჯარით აქვს აღებული, 950 დოლარს იხდის.
"პენჯაბში ამ ფასად ამავე ფართობის მიწას ვერ იყიდი. დარწმუნებით არ შემიძლია იმის თქმა, ფერმა ჩრდილოეთით მდებარეობს თუ სამხრეთით, თუმცა ის თურქეთსა და სომხეთს ესაზღვრება", - ამბობს სინგჰი.
The Guardian-ის ცნობით, სინგჰი ერთადერთი არ არის, ვინც პენჯაბიდან საქართველოში გადაბარგდა.
როგორც გამოცემა აღნიშნავს, ასეთი ფერმერების რიცხვი სულ უფრო იზრდება. ინდოეთის მთავარ ქალაქებში, როგორიცაა მაგალითად ჯალანდარი, აგენტები საქართველოს მიწებისა და იქ ბიზნესის წარმოების რეკლამირებას ეწევიან.
მაღალჩინოსანი სოდჰი, რომელიც ამრისტარში ვიზებს გასცემს, ამბობს, რომ პენჯაბელები ძალიან რისკიანები არიან.
"ეს ყველაფერი რამდენიმე ხნის წინ დაიწყო. თავიდან ათამდე იყვნენ. შესაძლოა, ახლა ასობით არიან. თუ ერთხელ გავრცელდა ხმა, რაოდენობა სულ უფრო მატულობს. ჩემთან პასპორტებისთვის მოდიან. ახალ საძოვრებს ეძებენ. პენჯაბელი ხალხი ყოველთვის სხვადასხვა ქვეყნებში მიდის. ისინი ძალიან რისკიანები და ინიციატივიანები არიან", - აცხადებს სოდჰი.
მისივე ინფორმაციით, პენჯაბელი ფერმერები წარსულში ათასობით ჰექტარ მიწას უკრაინაში, უზბეკეთში, აღმოსავლეთ და ცენტრალურ აფრიკაში ყიდულობდნენ ან ქირაობდნენ.
როგორც The Guardian-ი წერს, საზღვარგარეთ ნაშოვნ ფულს ფერმერები ხშირად ისევ სახლში, მიწების შესაძენად აგზავნიან.
გამოცემის ცნობით, ინდოეთში მოღვაწე ქართველები კი აცხადებენ, რომ საქართველოში ახალჩასულები, შესაძლოა, იმედგაცრუებული დარჩნენ.
"ჩვენ მათ წასვლისკენ არ ვუბიძგებთ. ისინი საკუთარი სურვილით მიდიან. საქართველოში მიწებს კერძო პირები ყიდიან. ამისთვის ქვეყანას რაიმე სპეციალური პროგრამა არა აქვს", - აცხადებს ერთ-ერთი ქართველი ჩინოსანი, რომლის ვინაობასაც გამოცემა არ აკონკრეტებს.
როგორც The Guardian-ი წერს, საქართველოში, უცხო ქვეყნის მოქალაქისთვის მიწის პირდაპირ დასაკუთრება კანონით დაუშვებელია.
"ქვეყანაში ცოტა ხნის წინ განხორციელებული პროექტი - მოეზიდათ ფერმერები საზღვარგარეთის ქვეყნებიდან, განსაკუთრებით სამხრეთ აფრიკიდან, ჩავარდა", - წერს გამოცემა.
The Guardian-ის ინფორმაციით, ზოგიერთი პენჯაბელი, სოფლიდან მასობრივი გადინების გამო, საუკუნოვანი ცხოვრების წესის განადგურებაზე შიშობს.
მომზადებულია The Guardian-ის მიხედვით.
