ადვოკატებმა 23 წლის გოგონას ჯგუფურად გაუპატიურებაში ბრალდებულების დაცვაზე უარი თქვეს

ნიუ დელის სასამართლოს ადვოკატებმა 23 წლის გოგონას ჯგუფურად გაუპატიურებაში ბრალდებულების დაცვაზე უარი თქვეს. გოგონა რამდენიმე დღის წინ სინგაპურის კლინიკაში გარდაიცვალა.

როგორც ნიუ დელის სასამართლოს წარმომადგენლები აცხადებენ, სასამართლოში სულ 2 500 ადვოკატია დარეგისტრირებული. დეკემბერში მომხდარი საზარელი შემთხვევიდან რამდენიმე დღეში პოლიციამ ექვსივე თავდამსხმელი დააკავა და ისინი სასამართლოს გადასცა.

საქმესთან დაკავშირებული განხილვა 3 იანვარს დაიწყება. სასამართლოს წინაშე წარსდგება 5 დამნაშავე. რაც შეეხება მეექვსე ბოროტმოქმედს, ის 17 წლისაა და, შესაბამისად, მისი საქმე განსახილველად არასრულწლოვანთა სასამართლოს გადაეცა.

ადგილობრივი მედიის ინფორმაციით, სავარაუდოდ, ექვსივე მოძალადეს სიკვდილით დასჯას მიუსჯიან. ასეთ განაჩენს ითხოვდა ინდოეთის სხვადასხვა ქალაქის ქუჩებში ამ შემთხვევის შემდეგ გამოსული ასობით ათასი ადამიანი. დემონსტრანტები ქვეყნის ხელისუფლებისგან ასევე ითხოვენ, გაუპატიურების წინააღმდეგ კანონის გამკაცრებას და ამ კანონისთვის გარდაცვლილი გოგონას სახელის მინიჭებას.