2
აპრილიდღის ზოგადი ასტროლოგიური პროგნოზი
საქართველოს მთავრობა დღეს არასტაბილურობას ასხივებს და ქაოსის სიგნალებს იძლევა, - ამის შესახებ საქართველოს პრეზიდენტმა მიხეილ სააკაშვილმა დღეს მარტვილში, ადგილობრივი საკრებულოს ხელმძღვანელსა და რაიონის გამგებელთან შეხვედრაზე განაცხადა.
პრეზიდენტმა მუნიციპალიტეტების გამგეობების პიკეტირების ფაქტებიც შეაფასა. მიხეილ სააკაშვილმა საკრებულოს თავმჯდომარისა და რაიონის გამგებელისგან მოისმინა ინფორმაცია, თუ რამდენად ეძლევათ მათ მუშაობის საშუალება. ამის შემდეგ კი განაცხადა, რომ იმ რეგიონების თვითმმართველობის ორგანოებზე, რომლებსაც "ნაციონალური მოძრაობის" წარმომადგენლები ხელმძღვანელობენ, ზეწოლა საქართველოს მთავრობის დაკვეთით ხორციელდება.
"ეჭვს არ იწვევს, რომ ეს ქაოსური პროცესები, სამწუხაროდ, საქართველოს მთავრობის მიერ არის კოორდინირებული. ჩემს ხელთ არსებული ყველა ინფორმაციით, მათ შორის ამ საკითხებზე მომუშავე საერთაშორისო დამკვირვებლების ცნობით ვიცი, რომ თვითმმართველობის ორგანოებზე ზეწოლა პირადად პრემიერ-მინისტრის დავალებით ხორციელდება", – განაცხადა მიხეილ სააკაშვილმა.
პრეზიდენტმა ზეწოლის რამდენიმე მაგალითიც დაასახელა. მათ შორის ხაზი ქედის დეპუტატის შემთხვევას გაუსვა. მიხეილ სააკაშვილის თქმით, დეპუტატ ფუტკარაძის შვილი ნარკოტიკების ფაქტზე დაიჭირეს და ამით აიძულეს, რომ "ნაციონალური მოძრაობის" ფრაქცია დაეტოვებინა.
"საქართველოს მთავრობა დღეს არასტაბილურობას ასხივებს და ქაოსის სიგნალებს იძლევა. არ შეიძლება მთავრობა ხულიგნურ აქციებს და ქაოსს კოორდინირებდეს. ეს ყველაფერი ატარებს ნიშნებს, რომელიც საბოლოოდ საქართველოს პროვინციული დიქტატურის სიტუაციაში შეიყვანს და ქვეყანას 10-15 წლით უკან დასწევს", - აღნიშნა მიხეილ სააკაშვილმა.
პრეზიდენტის თქმით, "რამდენიც არ უნდა ვუკეთოთ რევერანსები ჩრდილო მეზობელს, საქართველო ევროპული ქვეყანაა და ევროპულ ქვეყნებში ასეთი ქმედებებით ფონს ვერც ერთი მთავრობა ვერ გავა".
