8
აპრილიდღის ზოგადი ასტროლოგიური პროგნოზი
ისრაელი პალესტინის სტატუსთან დაკავშირებით საქართველოს გადაწყვეტილებით გაკვირვებული და იმედგაცრუებულია, - ამის შესახებ ჟურნალისტებს ისრაელის ელჩმა საქართველოში იუვალ ფუქსმა დღევანდელ პრესკონფერენციაზე განუცხადა.
მისი თქმით, ამ საკითხზე მიმდინარეობდა დიალოგი საქართველოს მთავრობასთან, თუმცა საბოლოოდ მიღებულ იქნა პალესტინის სტატუსის მხარდამჭერი გადაწყვეტილება.
კითხვას, მოახდენს თუ არა ეს ფაქტი გავლენას საქართველო-ისრაელის ურთიერთობებზე, იუვალ ფუქსმა უპასუხა, რომ დიპლომატიური მისია რჩება და აგრძელებს მუშაობას საქართველოში.
"მისია საკუთარი საქმიანობით ყოველთვის ცდილობდა და მომავალშიც შეეცდება ურთიერთობების გაღრმავებას ორ ქვეყანას შორის, მათ შორის პოლიტიკურ, კულტურულ თუ ბიზნესურთიერთობებში", - განაცხადა იუვალ ფუქსმა.
რაც შეეხება პალესტინის დამკვირვებელ სახელმწიფოდ ცნობის თაობაზე მიღებულ რეზოლუციას, იუვალ ფუქსი აცხადებს, რომ ეს რეზოლუცია ადგილზე სიტუაციას ვერ შეცვლის, რადგან "ასეთი მანერით სახელმწიფო არ შეიძლება შეიქმნას".
"ისრაელს სურს მშვიდობა და ეს არაერთხელ დაუმტკიცებია თუნდაც ეგვიპტის მაგალითზე. მშვიდობისთვის საჭირო არ არის ნიუ-იორკში გაფრენა. ამის გაკეთება შეიძლება ადგილზეც. ამგვარი გადაწყვეტილებები ხელს არ უწყობს მშვიდობას. ვინ, თუ არა საქართველომ კარგად იცის, რა შედეგი მოაქვს დამოუკიდებლობის ცალმხრივად გამოცხადებას", - აღნიშნა იუვალ ფუქსმა.
პალესტინას, რომელიც გაერო-ს წევრი არ არის, გაერო-ში სტატუსი მუდმივი დამკვირვებლიდან დამკვირვებელ სახელმწიფომდე გაეზარდა. პალესტინის სტატუსის გაზრდას მხარი დაუჭირა 138-მა ქვეყანამ, მათ შორის საქართველომ. თავი შეიკავა 41-მა სახელმწიფომ, ხოლო 9-მ ხმა წინააღმდეგ მისცა. სტატუსის მინიჭებას კატეგორიულად ეწინააღმდეგებოდნენ ისრაელი და ამერიკა.
