რიანა: "მე და კრისი ისევ ერთად ვართ"

თუ ურტყამს, ე.ი. უყვარს - როგორც ჩანს, რიანასა და კრის ბრაუნის შემთხვევაში სწორედ ასეა. ერთად რომ არიან, სულ ჩხუბობენ, ერთმანეთის გარეშე კი ვერ ძლებენ.

ექსტრავაგანტური მომღერალი რიანა თაყვანისმცემლებს გამუდმებით აოცებს - ხან ბიჭურად იჭრის თმას, ხან ჟღალთმიანია, ხან - ქერა, ხან კი გრძელი ყვითელი ფრჩხილებით დადის. მაგრამ ამ ვრცელ სიაში არ შედის მხოლოდ გარეგნული ცვლილებები, ან კიდევ მისი სიმღერების მაღალი რეიტინგები, არამედ აქტიური პირადი ცხოვრებაც. ახლა გაირკვა, რომ რიანამ ყოფილ მეგობარ ბიჭთან - კრის ბრაუნთან აღადგინა ურთიერთობა.

გასულ უქმეებზე პაპარაცებმა წყვილი ლოს-ანჯელესში წვეულების დროს გადაიღეს. ერთმანეთს ეხუტებოდნენ, ერთ სიგარეტს ეწეოდნენ, კოცნაობდნენ. ღამის კლუბი კონსპირაციის მიზნით ცალ-ცალკე მანქანებით დატოვეს, მაგრამ მერე ისევ შეხვდნენ ერთმანეთს.

ცოტა ხნის წინ ოპრა უინფრისთვის მიცემულ ინტერვიუში რიანამ გულღიად გამოაცხადა, რომ კრისი ისევ უყვარს. ბიჭიც მაშინვე გამოეხმაურა. უპასუხა, რომ თვითონაც ძალიან უყვარს.

რიანამ მსახიობის რანგშიც გამოსცადა თავი, ითამაშა სურათში "ზღვის ბრძოლა", რომელშიც თავისნაირი გიჟმაჟი გოგონა განასახიერა.

- შენთან ახლოს არის ეს გმირი, არა?

- მერედა როგორ! რეალურ ცხოვრებაში მეც რთული ხასიათი მაქვს. თუმცა ფილმისთვის წვრილმანებში უნდა დამემუშავებინა "ძალიან ცუდი გოგონას" სახე. მისი მზერა და ყველაფერი დანარჩენი. იმდენად ღრმად შევიჭერი როლში, რომ ჩემი სახე ფილმის ჩარჩოებს გასცდა და ჩვეულ ცხოვრებაში გადმოინაცვლა. ერთი სიტყვით, ახლა უფრო უარესი ხასიათი მაქვს.

- კლიპებში გადაღების გამოცდილება რამდენად დაგეხმარა ამ ფილმზე მუშაობაში?

- არც ისე. საკმაოდ ბევრი სხვაობაა. ის რიანა, რომელიც კლიპებში მღერის, არანაირად არ მგავს მე, როგორც მსახიობს. მაგრამ მომეწონა "პიროვნების გაორება".

- ბევრი რამ შეიტყვე ახალი საკუთარ თავზე?

- როცა თამაშობ, არარეალურია ემოციების შეკავება, ამიტომ ყველაფერი, რაც შიგნით მქონდა, გარეთ გამოდიოდა. ასე რომ, მე ხელახლა აღმოვაჩინე საკუთარი თავი. როცა თამაშობ, რაოდენ უცნაურიც უნდა იყოს, საკუთარ თავს ხედავ.

- ახლა ასე თუ ისე გასაგებია, კინოს რომელ ჟანრს ანიჭებ უპირატესობას...

- სულაც არა! მე, რასაკვირველია, მიყვარს თრილერები, ბოევიკები და საშინელებათა ფილმები... მაგრამ თუ სიმართლე გინდათ, უფრო რომანტიკული კომედიები მიტაცებს.

- რომანტიკას რაც შეეხება, ცოტა ხნის წინ ყოფილი მეგობარი ბიჭის მისამართით საინტერესო აღიარება გააკეთე, ცრემლებიც კი დაღვარე...

- დიახ, დღემდე მიყვარს კრისი. არ მეშინია ამის აღიარების, თუმცა ეს მძიმეა. ის ჩემი პირველი სიყვარულია და ყოველთვის ასე იქნება. საერთოდაც ვფიქრობ, რომ ის "სწორედ ის არის"... ვიცი, რომ მასაც ვუყვარდი... ჩვენ ისეთი ახალგაზრდები და სპონტანურები ვიყავით... და მართალი ხარ, ცრემლებიც ვერ შევიკავე. ახლა ახლო მეგობრები ვართ და ვცდილობთ ერთმანეთს ხელახლა ვენდოთ. ყოველთვის, როცა მას ვხედავ, საშინლად ვიძაბები, ეს ძალიან მძიმეა.

- ამბობენ, რომ კრისმა ნახა შენი საჯარო აღიარება, რა რეაქცია ჰქონდა?

- მესიჯი გამომიგზავნა, მადლობა გადამიხადა, მის შესახებ თქმული თბილი სიტყვებისთვის და ბოდიშიც მომიხადა ყველაფრისთვის. კიდევ ის მითხრა, რომ ვუყვარვარ (იცინის).

GQ

ჟურნალი "რეიტინგი"

(გამოდის ორშაბათობით)