გუბერნატორებს პრემიერ-მინისტრი დანიშნავს

რეგიონების გუბერნატორებს, პრეზიდენტის ნაცვლად, პრემიერ-მინისტრი დანიშნავს. "საქართველოს მთავრობის სტრუქტურის უფლებამოსილებისა და საქმიანობის წესის შესახებ" საქართველოს კანონში ცვლილების პროექტს მთავრობის დღევანდელ სხდომაზე განიხილავენ.

როგორც ჟურნალისტებს რეგიონული განვითარებისა და ინფრასტრუქტურის მინისტრმა დავით ნარმანიამ განუცხადა, გუბერნატორები რეგიონებში არიან მთავრობის წარმომადგენლები, კოორდინაციას უწევენ პროექტებს, რომლებიც რეგიონებში სხვადასხვა სამინისტორების მიერ ხორციელდება. შესაბამისად, ნარმანია მიიჩნევს, რომ გუბერნატორებს უნდა ნიშნავდეს პრემიერ-მინისტრი და ისინი ანგარიშვალდებულნი უნდა იყვნენ მთავრობასთან.

"ცვლილების მიხედვით, გუბერნატორები უნდა დანიშნოს არა პრეზიდენტმა, არამედ - პრემიერ-მინისტრმა. ამას საკონსტიტუციო ცვლილება არ სჭირდება, ეს არის უბრალოდ საკანონმდებლო ცვლილება, რომელსაც მთავრობა პარლამენტს გაუგზავნის", - აღნიშნა დავით ნარმანიამ.

მოქმედი კანონმდებლობით, გუბერნატორებს საქართველოს მხარეებში საქართველოს პრეზიდენტი ნიშნავს და ისინი ანგარიშვალდებულნი არიან პრეზიდენტის წინაშე.

"ინტერპრესნიუსი"