14
მარტიდღის ზოგადი ასტროლოგიური პროგნოზი
სრული პასუხისმგებლობით ვაცხადებ, რომ ქვემო ქართლში არჩევნების გაყალბება არ მოხდება!
"მიწის დეფიციტის გამო ქვემო ქართლში ჩაგვრის სხვადასხვა ფორმაა გავრცელებული. ქართველი ჩაგრავს აზერბაიჯანელს, აზერბაიჯანელი - ქართველს, აზერბაიჯანელი - აზერბაიჯანელს"
კოალიცია "ქართული ოცნება - დემოკრატიული საქართველოსთვის" ერთ-ერთი ლიდერი ზვიად ძიძიგური, რომელიც ორ თვეზე მეტია, ქვემო ქართლის მოსახლეობასთან შეხვედრებს მართავს, ამ რეგიონის მოსახლეობის პრობლემებზე გვესაუბრება:
- მარნეულის რაიონის აზერბაიჯანულ სოფელში გლეხებმა მაჩვენეს, როგორ ჰყავდათ ძროხა დაბმული ბაგაზე შუადღისას და როგორ ჭამდა საქონელი ზამთრის თივას პაპანაქება ზაფხულში, როცა მინდვრები ბალახითაა აბიბინებული. მარნეულისა და დმანისის რაიონებში უზარმაზარი ტერიტორიებია სახნავ-სათესად, მაგრამ არა გლეხებისთვის. დმანისის მაჟორიტარი დეპუტატის, კახაბერ ოქრიაშვილის მამას 3 ათას ჰექტარზე მეტი მიწა აქვს ნაყიდი. გლეხები კი ყოველგვარი საარსებო საშუალების გარეშე არიან დარჩენილი. ასეთი სურათია მთელ რეგიონში. მიწის დეფიციტის გამო ქვემო ქართლში ჩაგვრის სხვადასხვა ფორმაა გავრცელებული. ქართველი ჩაგრავს აზერბაიჯანელს, აზერბაიჯანელი - ქართველს, აზერბაიჯანელი - აზერბაიჯანელს და ა.შ. ერთი რამ კი ცხადია: ქვემო ქართლში აბსოლუტურად ყველაფერი ხელისუფლების ხელშია - მიწები თუ კერძო ბიზნესი. და ეს ყველაფერი მოსახლეობის შევიწროებისა და ჩაგვრის ხარჯზე ხდება. ხელისუფლებას აქ ყველანაირად მიუწვდება ხელი ადამიანთა ქონებაზე. აქ უფრო გალაღებული არიან, ვიდრე საქართველოს რომელიმე სხვა კუთხეში.
- რა არის ამის მიზეზი?
- ეს არის ერთგვარი გარიგება ხელისუფლებასა და მის წარმომადგენლებს შორის, რასაც წერტილი უნდა დაესვას. შევისწავლე ყველა ის პრობლემა, რომელიც ქვემო ქართლშია და ამ პრობლემების გადაჭრის გზებს დავსახავთ კოალიციაში. ხელისუფლების შეცვლის შემდეგ ქვემო ქართლში მდგომარეობა კარდინალურად უნდა შეიცვალოს.
- ბატონო ზვიად, არის კი იმის შანსი, რომ იმ მიწებს, რომელიც კაპიკებში შეისყიდეს, ხელისუფლების შეცვლის შემთხვევაში გლეხობას დაუბრუნებენ?
- უპირველესად გასარკვევია, ესა თუ ის მიწის ნაკვეთი კანონიერად თუ არის შესყიდული. ყველა ფაქტი, რომელიც ეჭვის საფუძველს იძლევა, გადაიხედება. საკითხავია, რატომ გახდა აუცილებელი ერთი ადამიანის ხელში აღმოჩენილიყო ასეულობით ჰექტარი მიწა და გლეხობა საძოვრების გარეშე დარჩენილიყო? ეს რეგიონი, პოლიტიკური თვალსაზრისით, ხელისუფლებისგან უპატრონოდ იყო მიტოვებულ, ბიძინა ივანიშვილის გამოჩენამ კი ვითარება შეცვალა. უკვე მივიღეთ გადაწყვეტილება, რომ მარნეულში, რომელიც არის ქვემო ქართლის გული, ჩატარდება "ქართული ოცნების" რეგიონული შეხვედრა. ხელისუფლების მიერ საარსებო საშუალების გარეშე დარჩენილი ადამიანები უნდა შეიკრიბონ სწორედ მარნეულში და ამ ხელისუფლებას უთხრან - არა! ხოლო ადამიანს, რომელიც მიიჩნევს, რომ სოფლის მეურნეობის განვითარება ქვეყნისთვის პრიორიტეტულია და რომელიც ბაღნარად გადააქცევს ამ ქვეყანას, მხარში უნდა ამოუდგნენ.
- ხელისუფლება მარნეულში არჩევნებს მუდამ მაღალი პროცენტით იგებდა, ახლა რა მდგომარეობაა, შეიცვალა რამე?
- მოსაზრება, რომ მარნეულში ხალხი ხელისუფლების მორჩილია, არასწორია და ამაში ადვილად დაგარწმუნებთ: "ქართული ოცნების" ოფისებში იმდენი ხალხი მოდის, სად წავიყვანოთ, არ ვიცით. ასეთი მდგომარეობა გვაქვს მარნეულში. ვაპირებთ არჩევნების პერიოდში ქვემო ქართლში წავიყვანოთ ათასი კაცი, რომლებიც იქნებიან კომისიის წევრები და ხელისუფლებას არ მისცემენ ოქმების გაყალბების საშუალებას. არ ვფიქრობთ, რომ ქვემო ქართლი ხელისუფლებისაა. ეს რეგიონი საქართველოს განუყოფელი ნაწილია და იქ მცხოვრები მოსახლეობა თვითონ გადაწყვეტს, ვის დაუჭიროს არჩევნებში მხარი - ხელისუფლებას თუ ბიძინა ივანიშვილს. არ ვაპირებთ ქვემო ქართლში პოზიციების დათმობას და აქ არსებული პოლიტიკური სიტუაციის ხელისუფლებისთვის გადაბარებას.
სრული პასუხისმგებლობით ვაცხადებ, რომ ქვემო ქართლში არჩევნების გაყალბება არ მოხდება!
ხელისუფლება მოსახლეობას ემუქრება, თუ "ქართულ ოცნებას" გაეკარებით, რასაც გიკეთებთ, იმას აღარ გაგიკეთებთო. ამის შესახებ მოსახლეობა ჩვენთან საუბარში დაუფარავად აცხადებს. მარნეულში დამთავრდა ხელისუფლების ტყუილები - მიწას დაგიბრუნებ, თუ ხმას მომცემო!" ამას ეუბნებიან ყველა არჩევნების წინ მოსახლეობას და ეს ტყუილი ესმით უკვე 8 წელია. ამჯერად ეს მეთოდი ძალადაკარგულია, რადგან ხალხი ხედავს, რომ გამოჩნდა ძლიერი პოლიტიკური ძალა, რომელიც ამ ხელისუფლებას ნამდვილად დაამარცხებს. ასე რომ, ხელისუფლების მცდელობა, არჩევნები გააყალბოს, უშედეგო იქნება. ქვემო ქართლში შიში გატეხილია და ამომრჩეველი არჩევანს "ქართულ ოცნებაზე" გააკეთებს.
- ბატონო ზვიად, არსებობს ინფორმაცია, რომ ბიძინა ივანიშვილი "ქართული ოცნების" მაჟორიტარობის კანდიდატად მარნეულში თქვენ წარგადგენთ.
- მოვლენებს წინ ნუ გავუსწრებთ. ბატონი ბიძინა ივანიშვილი უახლოეს პერიოდში თვითონ განაცხადებს ამის შესახებ.
დარეჯან ლიპარტელიანი
ყოველკვირეული გაზეთი "ყველა სიახლე"
(გამოდის ოთხშაბათობით)
