მნიშვნელოვანი ინფორმაცია
14
მარტიდღის ზოგადი ასტროლოგიური პროგნოზი
პარასკევი, მთვარის მეთექვსმეტე დღე დაიწყება 19:51-ზე, მთვარე სასწორს ესტუმრება 22:58-ზე
მშვიდობიანი საქმეები წარმატებით დასრულდება. კაპიტალდაბანდებებს მოერიდეთ. კარგი დღეა იურიდიული საკითხების მოსაგვარებლად, სასამართლო პროცესების დასაწყებად; შემოქმედებითი საქმიანობისთვის. გარშემო მყოფებთან ურთიერთობისას გამოიჩინეთ ტაქტი. უფროსს მნიშვნელოვან საკითხებზე საუბრისთვის ნუ შეხვდებით; წვრილ-წვრილი საკითხები მოაგვარეთ. კარგი დღეა დასვენების, მოგზაურობის, ფიზიკური დატვირთვისა და საოჯახო საქმეების შესრულებისთვის. მოერიდეთ ალკოჰოლის მიღებას, მოწევას. არც იშიმშილოთ და არც კუჭი გადატვირთოთ. გაუფრთხილდით თირკმლებს. მოერიდეთ სითხისა და ალკოჰოლის მიღებას. აგრეთვე სუსტდება ენდოკრინული სისტემა.
მნიშვნელოვანი ინფორმაცია
მკითხველის რჩევით
ასევე დაგაინტერესებთ
ჰარვარდის ქართველი კურსდამთავრებული, რომელიც ცდილობს სამშობლოს ამერიკიდან დაეხმაროს - "ჯო უილსონმა ძალიან კარგად მიგვიღო, წერილიც გადავეცით..."
11:15 / 10-02-2025
ამერიკაში ქართველმა სტუდენტებმა და კურსდამთავრებულებმა მოამზადეს ღია წერილი ჰელსინკის კომისიის თავმჯდომარის, კონგრესმენ ჯო უილსონის სახელზე, რომელიც 5 დეკემბერს ვაშინგტონში ჩაიტანეს. ამ წერილით მათ კონგრესმენს რამდენიმე თხოვნა გადასცეს, რომელთა შორის იყო:
1. მიზანმიმართული ფინანსური სანქციების დაწესება რეპრესიებსა და რუსული პროპაგანდის გავრცელებაზე პოლიტიკურად პასუხისმგებელ პირებზე, შინაგან საქმეთა სამინისტროს მაღალჩინოსნებზე, ასევე, ბიზნეს ლიდერებზე, თუ ოლიგარქებზე, რომლებიც ანტიდემოკრატიულ აქტივობებს აფინანსებენ.
2. კონგრესში გამართოს საჯარო მოსმენა, რომელიც ნათელს მოჰფენს ქართველთა მიერ რუსულ ავტორიტარიზმთან ბრძოლისა და ევროპული კურსის შენარჩუნების გზაზე წარმოქმნილ სირთულეებს... ჯო უილსონთან შეხვედრაზე იმყოფებოდა მარინა კუტუბიძე, რომელიც ჰარვარდში სამართლის მაგისტრატურის დასრულების შემდეგ საქმიანობას ნიუ-იორკის "დიდ სამართალში“, ახალ იურიდიულ ფირმა - Greenberg Traurig LLP-ში გააგრძელებს.
მარინა კუტუბიძე ambebi.ge-ს საქართველოს ფარგლებს გარეთ მოპოვებულ წარმატებაზე უყვება:
- თსუ-ში ვსწავლობდი, სამართლის ფაკულტეტზე, საქართველოში დავამთავრე ბაკალავრიატი და მაგისტრატურაც. ამის შემდეგ იურისტად დავიწყე მუშაობა კორძაძის საადვოკატო ბიუროში. ამ პერიოდში დამაინტერესა საკორპორაციო სამართალმა და კორძაძის ბიუროდან გადავედი "GR ტრანზიტში“, რკინიგზის შვილობილ კომპანიაში, ჯერ იურისტის პოზიციაზე, მერე იურიდიული დეპარტამენტის ხელმძღვანელი გავხდი. ამ პერიოდში პარალელურად დავიწყე აპლიკაციების გაგზავნა აშშ-ში, რადგან სულ მინდოდა იქ მაგისტრატურის გავლა. პირველ წელს რამდენიმე უნივერსიტეტში გავაგზავნე აპლიკაცია, ყველამ მიმიღო და ავირჩიე ჰარვარდი, რომელმაც სრული დაფინანსება შემომთავაზა (ჯამში, ფინანსური დახმარების პაკეტი სადღაც 100 ათასი დოლარი იყო). ჩამოვედი ჰარვარდში და დავიწყე სწავლა სამართლის მაგისტრატურაზე. ძალიან საინტერესო იყო, ეს უმეტესად საერთაშორისო პროგრამაა და ძირითადად მათზეა გათვლილი, ვისაც მერე ამერიკაში ადვოკატთა ასოციაციაში გაწევრება, ან სადოქტოროზე ჩაბარება უნდათ - ძირითადად ამ ორი კატეგორიისთვისაა მაგისტრატურა. ჰარვარდში სწავლის დროს (2023-2024) ყველაფერში ვიღებდი მონაწილეობას და ერთ-ერთი მნიშვნელოვანი, რასაც ვაკეთებდი იყო ის, რომ ვიყავი ჰარვარდის ქალთა ორგანიზაცია Harvard Women’s Law Association- ში, ჟურნალ ბიზნეს სამართლის - Harvard Business Law Review-ში უფროსი რედაქტორი, ასევე, მაგისტრების, დოქტორანტებისა და პირველკურსელების კომიტეტის თავმჯდომარე. დავამთავრე მაგისტრატურა... ახლახან წარმატებით ჩავაბარე ნიუ-იორკის ადვოკატთა საკვალიფიკაციო გამოცდა, შემოთავაზება მივიღე და 10 თებერვლიდან "დიდ სამართალში“, ახალ იურიდიულ ფირმა - Greenberg Traurig LLP-ში დავიწყებ მუშაობას. აქ "დიდ სამართალს“ ტოპ-ფირმებს უძახიან, სწორედ ეს კომპანიები ემსახურებიან ყველაზე დიდ კლიენტებს. ვინაიდან საკორპორაციო სამართალი მაინტერესებდა, როცა აქ ჩამოვედი, ჩემი მიზანიც ეს იყო, აქ მოვხვედრილიყავი.
- როგორც ვხვდები, თქვენი მიზნები ჯერჯერობით ამერიკას უკავშირდება და მანდ აპირებთ კარიერის გაგრძელებას...
- კი, ჯერჯერობით ასე იქნება. რა ცოდნაც ჰარვარდში და მანამდე საქართველოში მივიღე, მინდა, რომ ეს ამ მარკეტზე გამოვცადო იმიტომ, რომ ალბათ ერთ-ერთი ყველაზე დიდია მსოფლიოში იმ მიმართულებით, რისი კეთებაც მინდა - საკორპორაციო სამართლის მიმართულება. ამ ორმა წელიწადმა ძალიან ბევრი რამ შემძინა, ასე ვთქვათ, სულ სხვა სამყაროში გიხსნის კარს და ძალიან სამწუხაროა, რომ ეს ჯერ ჩვენთან, საქართველოში არ არის ხელმისაწვდომი. დარწმუნებული ვარ, რაღაც დროის მონაკვეთში ჩვენც გავხდებით ამ საერთაშორისო მარკეტის ნაწილი. აქედან რასაც ვუყურებ, ევროპა არის მისი ძალიან მნიშვნელოვანი ნაწილი, ასევე, სამხრეთ ამერიკაც და ნიუ-იორკიდან იმართება საერთაშორისო ტრანზაქციები ამ მიმართულებით. დიდი იმედი მაქვს, საქართველოც გახდება ამ დიდი ტრანზაქციული ოჯახის ნაწილი იმიტომ, რომ ეს უდიდეს რამეს ნიშნავს ქვეყნისთვის როგორც ეკონომიკურად, ისე ცნობადობის კუთხით.
- კონგრესში ჯო უილსონთან შეხვედრაზე მოგვიყევით...
- 5 დეკემბერს ვაშინგტონში, კონგრესში ტარდებოდა მოსმენა, სადაც მეგობრებთან ერთად ჩავედი. ეს იყო ღია მოსმენა - "ბელარუსის როლი რუსეთის დანაშაულებში“. გამომსვლელებმა ისაუბრეს ბელარუსზე, მათ შორის ახსენეს საქართველოც,იყო მსჯელობა იმაზე, თუ როგორ შეიძლება ჩვენს ქვეყანაში დასავლურმა ღირებულებებმა გაიმარჯვოს და ა.შ. ჯო უილსონი საქართველოს დიდი მეგობარია, რასაც თურმე ბევრი წინაპირობა აქვს. ყოველ შემთხვევაში, ის მართლაც დაინტერესებულია საქართველოში განვითარებული მოვლენებით. ჩვენ წინასწარ ვიკითხეთ, ჯო უილსონი ჩვენთან შეხვედრით თუ დაინტერესდებოდა, მანაც დიდი სიამოვნებით მიგვიღო და თქვა, რომ აუცილებლად დაიმახსოვრებდა და მოსმენაზე შეგვხვდებოდა. ჩვენ, ამერიკელმა სტუდენტებმა და კურსდამთავრებულებმა მოვამზადეთ ღია წერილი, რომელსაც ხელი მოაწერა 50-მდე ადამიანმა. ეს წერილი ჩავიტანეთ ვაშინგტონში და მოსმენის შემდეგ, ჯო უილსონს გადავეცით. ეს ის დრო იყო, როცა ამერიკას ჯერ არ ჰქონდა გადაწყვეტილი ქართველი მაღალჩინოსნებისთვის რაიმე სანქციების დაწესება. ამ წერილით ბატონ უილსონს გადავეცით რამდენიმე თხოვნა:
1. დაწესდეს მიზანმიმართული ფინანსური სანქციები შემდეგი პირების წინააღმდეგ: რეპრესიებსა და რუსული პროპაგანდის გავრცელებაზე პოლიტიკურად პასუხისმგებელი პირები, შინაგან საქმეთა სამინისტროს ის მაღალჩინოსნები და ძალოვანი სტრუქტურების წარმომადგენლები, რომლებიც ხელს უწყობენ აღნიშნულს და ბიზნეს ლიდერები, თუ ოლიგარქები, რომლებიც აფინანსებენ ანტიდემოკრატიულ აქტივობებს.
2. დამტკიცდეს ფინანსური დახმარების პაკეტი სამოქალაქო საზოგადოებრივი ორგანიზაციების გასაძლიერებლად.
3. კონგრესში გამართოს საჯარო მოსმენა (როგორც ჩატარდა ბელორუსზე), რომელიც ნათელს მოჰფენს ქართველთა მიერ რუსულ ავტორიტარიზმთან ბრძოლისა და ევროპული კურსის შენარჩუნების გზაზე წარმოქმნილ სირთულეებს.
ჯო უილსონმა ძალიან კარგად მიგვიღო, წერილიც გადავეცით და მშვენიერი შეხვედრა გამოგვივიდა. ამას მერე მართლაც მოჰყვა ფინანსური სანქციები, ვიმედოვნებთ, სანქციებში რაღაც წვლილი ჩვენც შევიტანეთ.
- ტრამპის ინაუგურაციის დღეებში, აშშ-ში მყოფ პრეზიდენტ სალომე ზურაბიშვილთან შეხვედრის საშუალებაც მოგეცათ...
- ტრამპის ინაუგურაციის შემდეგ სალომე ზურაბიშვილი ვაშინგტონში ერთი კვირით დარჩა და რამდენიმე შეხვედრა ჩაატარა. ჩვენ ვიყავით 2 შეხვედრაზე და ორივე 22 იანვარს გაიმართა - AEI-ს (American Enterprise Institute) შეხვედრა “ქართული დემოკრატიის გადარჩენა: საუბარი პრეზიდენტ სალომე ზურაბიშვილთან”. პრეზიდენტმა მნიშვნელოვანი განცხადებები გააკეთა ამ რთულ გზაზე ქართველი ხალხის მიერ სიმტკიცის გამოჩენისა და ამერიკის შეერთებული შტატების თანადგომის მნიშვნელობაზე. პრეზიდენტმა მნიშვნელოვანი მესიჯები გაახმაურა საქართველოზე . ამის შემდეგ ის შეხვდა ქართულ დიასპორას ვაშინგტონში და ეს შეხვედრაც ძალზე საინტერესო გამოვიდა.
- ახალ პროექტზე მუშაობთ, კონკრეტულად რა მიმართულებით?
- მე და ჩემმა მეგობარმა სოფო გუგავამ კიდევ ერთ აზერბაიჯანელ მეგობართან ერთად დავაფუძნეთ არასამთავრობო ორგანიზაცია "She Leads Peace“ . სოფო ჩიკაგო-კენტ-იდან არის. ამ პროექტს ორი მიმართულება აქვს და ორივე ქალების დახმარებაზეა კონცენტრირებული. ჩემი მიმართულებაა მეწარმე ქალების დახმარება - მინდა საკორპორაციო სამართალში ჩემი გამოცდილებით დავეხმარო იმ ქალებს, რომლებიც ახლა იწყებენ თავის ბიზნესს. ისინი სამართლებრივ რჩევებს, რა თქმა უნდა, უფასოდ მიიღებენ. სოფოს მიმართულებაა ქალები პოლიტიკაში, ის უხელმძღვანელებს, როგორ შეიძლება მათი ხმა მივაწოდოთ პოლიტიკოსებს, გავზარდოთ ქალების ჩართულობა პოლიტიკაში. ეს ძირითადად მოხდება შეხვედრების დაორგანიზებით, ტრენინგებით და რამენაირად უნდა ვეცადოთ, რომ ქალები კიდევ უფრო მეტად ჩაერთონ პოლიტიკის საკითხებში. ორგანიზაცია ახლახან, წინა თვეში დავაფუძნეთ და ნელ-ნელა ვიწყებთ აქტივობებს.
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
კონექტიკურის ქუჩებში პატარა სელაპი იპვეს
კვირის კითხვადი სტატიები
მნიშვნელოვანი ინფორმაცია
მკითხველის რჩევით
