თუ 40 წელს გადააბიჯეთ, თქვენი მხედველობის შესახებ ეს აუცილებლად უნდა იცოდეთ - ოფთალმოლოგი შოთა თადუმაძე

ალბათ, ხშირად გსმენიათ ან შეიძლება საკუთარ თავზეც გამოგიცდათ, რომ ასაკის მატებასთან ერთად, მხედველობა უარესდება. საინტერესოა, რომ ეს არა დაავადება, არამედ მდგომარეობაა, სახელად პრესბიოპია.

როგორც „ნიუ ჰოსპიტალსის“ ოფთალმოლოგი, ოფთალმოქირურგი შოთა თადუმაძე განმარტავს, პრესბიოპია წარმოადგენს მდგომარეობას, რომელიც თავს იჩენს ასაკში და გამოიხატება ახლო მანძილზე არსებული ობიექტებზე ფოკუსირების გართულებით. პრესბიოპიაზე დეტალურად თავად შოთა თადუმაძე გვესაუბრება.

მოგვიყევით, რა პროცესია პრესბიოპია?

როგორც წესი, პრესბიოპია გამოვლინდება 40 წლის ასაკიდან და გამოწვეულია თვალში არსებული ბროლის გამკვრივებით. ამ დროს მცირდება მისი ელასტიკურობა, რის შედეგადაც ქვეითდება ახლო მანძილზე ფოკუსირების უნარი. ეს ეხება კითხვას, მობილური ტელეფონის გამოყენებას.

რა ნიშნები ახასიათებს პრესბიოპიას?

პრესბიოპიის ნიშნებია:

• პატარა შრიფტის გარჩევის გართულება;
• მკაფიოდ დასანახად ობიექტის თვალიდან შორს გაწევის სურვილი;
• ახლო მანძილზე მხედველობითი დატვირთვის შემდგომ თვალის გადაძაბვა და თავის ტკივილი;
• ახლო მანძილზე განთავსებული ობიექტის ყურებისას ბუნდოვანი მხედველობა.

როგორც აღნიშნეთ, პრესბიოპია თავს იჩენს 40 წლის ასაკიდან. რა იწვევს მის პროვოცირებას?

მის პროვოცირებას იწვევს ორგანიზმში განვითარებული ასაკობრივი ცვლილებები. მის ადრეულ გამოვლინებასა და შემდგომ პროგრესირებაში გარკვეული გავლენა აქვს მავნე ჩვევებს, ხშირ და ინტენსიურ სტრესს, სხვადასხვა მედიკამენტსა თუ დაავადებას.

არსებობს თუ არა რისკჯგუფი, ვისაც პრესბიოპიის განვითარების მაღალი რისკი აქვს?

რისკჯგუფს მიეკუთვნება ნებისმიერი 40 წელს გადაცილებული ადამიანი. მისი განვითარება სქესთან დაკავშირებული არ არის.

როდის უნდა მიმართოს ადამიანმა ოფთალმოლოგს?

როდესაც ადამიანი შეამჩნევს, რომ უჭირს ახლო მანძილზე საგნების გარჩევა, ადვილად იღლება კითხვის დროს და ტელეფონს მუდმივად შორს წევს, აუცილებელია სპეციალისტთან კონსულტაცია. არ აქვს მნიშვნელობა პრესბიოპია აწუხებს მას თუ მხედველობასთან დაკავშირებული სხვა დაავადება, ოფთალმოლოგთან დროული ვიზიტი ნებისმიერ შემთხვევაში მნიშვნელოვანია.

შესაძლებელია თუ არა პრესბიოპიის თავიდან აცილება?

ეს გახლავთ ასაკთან დაკავშირებული მდგომარეობა და ამიტომ მისი თავიდან აცილება შეუძლებელია. პრესბიოპიის დროს უნდა მოხდეს მისი შესაბამისი მართვა.

როგორ ხდება პრესბიოპიის მართვა და მკურნალობა?

ამ დროს ინიშნება საკითხავი სათვალე და კონტაქტური ლინზები.

პრესბიოპიის მართვის უახლესი სტანდარტია PRESBYOND-ის ლაზერი, რომელიც ლაზიკის პროცედურის ტიპია. კლასიკური ლაზიკის პროცედურისგან განსხვავებით, რომელიც 40 წელს გადაცილებულ პაციენტებთან მხედველობის გაუმჯობესებას მხოლოდ ერთ ფოკუსურ მანძილზე უზრუნველყოფს, პრესბიონდი ახდენს მხედველობის სიმახვილის კორექციას როგორც შორ და საშუალო, ასევე ახლო დისტანციაზე.

ეს ტექნოლოგია იძლევა საშუალებას შექმნას ე.წ “შერეული ზონა” ორ თვალს შორის, რომელთაგან ერთი შორს მხედველია, მეორე კი ახლო მხედველი. ორივე თვალის შერწყმული მუშაობის შედეგად უზრუნველყოფილია მკაფიო და ბუნებრივი მხედველობა როგორც შორ, ასევე ახლო მანძილზე. საქართველოში პირველად ეს პროცედურა „ნიუ ჰოსპიტალსში“ ჩატარდა.

როგორც თქვენ აღნიშნეთ,„ნიუ ჰოსპიტალსი“ პირველი კლინიკა იყო საქართველოში, სადაც PRESBYOND-ის ლაზერით პროცედურა ჩატარდა. დღეს რამდენად მოთხოვნადია აღნიშნული მანიპულაცია?

დიახ, „ნიუ ჰოსპიტალსში“ არსებულ ოფთალმოლოგიის ეროვნულ ცენტში, შესაძლებელია ჩატარდეს პრესბიოპიის ლაზერული მკურნალობა პრესბიონდის საშუალებით. ეს მეთოდი წარმოადგენს უსაფრთხო და სანდო მეთოდს, რომლის შედეგიც მორგებულია ყველა პაციენტის მოთხოვნილებაზე, ცხოვრების სტილსა და მხედველობითი დატვირთვის ინტენსივობაზე.

პრესბიონდის პროცედურის მიმართ დაინტერესება მაღალია 40 წელს გადაცილებული პირებისგან. ამ გზით ისინი სათვალეზე დამოკიდებულებისგან თავისუფლდებიან.

გაგვაცანით ზოგადი რეკომენდაციები ჯანმრთელი თვალის შესანარჩუნებლად

მავნე ჩვევებზე უარის თქმა, ჯანსაღი დიეტა, სტრესის შემცირება და ძილის რეგულირება მნიშვნელოვნად ამცირებს ზოგადი და, მათ შორის, თვალის დაავადებების განვითარების რისკს. ყოველდღიურად ეკრანთან მუშაობისას უნდა მოხდეს თვალის ზედაპირის დამატენიანებელი წვეთების რეგულარული მოხმარება, თვალის სიმშრალის თავიდან ასაცილებლად. ასევე, არ უნდა დავივიწყოთ გეგმური ვიზიტი ოფთალმოლოგთან 1-2 წელიწადში ერთხელ სკრინინგისთვის და დაავადების არსებობის შემთხვევაში, მისი დროული აღმოჩენისა და მკურნალობისთვის.

R