"ძვირფასო კოლეგებო, დავბრმავდით?! თუ არ გესმით, რას ამბობენ მომიტინგეები?" - რა ხდებოდა ევროპარლამენტში საქართველოზე დებატებისას: ვინ რა თქვა
საქართველოში ჩატარებული არჩევნებისა და საპროტესტო აქციების შესახებ კომენტარი ზედიზედ რვაჯერ გავაკეთეთ, მაგრამ ჩვენ არ ვატარებთ კენჭისყრას რეზოლუციის შესახებ, რომელიც ნეთანიაჰუს მიერ პალესტინელი ხალხის მასობრივ ხოცვა-ჟლეტას გმობს, - ამის შესახებ იტალიელმა ევროპარლამენტარმა, დანილო დელა ვალემ ევროპარლამენტში საქართველოს შესახებ გამართულ დებატებზე სიტყვით გამოსვლისას განაცხადა.
"მაშინ, როდესაც ჩვენ მესამე მსოფლიო ომში ვეშვებით, საქართველოში ჩატარებული არჩევნებისა და საპროტესტო აქციების შესახებ კომენტარი ზედიზედ რვაჯერ გავაკეთეთ, მაგრამ ჩვენ არ ვატარებთ კენჭისყრას რეზოლუციის შესახებ, რომელიც ნეთანიაჰუს მიერ პალესტინელი ხალხის მასობრივ ხოცვა-ჟლეტას გმობს. დროს ვკარგავთ, მაგრამ რისი აღიარებაც ჩვენ არ გვინდა არის ის, რომ საქართველოს მოქალაქეები ხმას თავიანთი ინტერესებიდან გამომდინარე აძლევენ და არა იმის, რაც კალასსა და ფონ დერ ლაიენს სურთ“, - განაცხადა დანილო დელა ვალემ.
- მისი თქმით, საპროტესტო აქციები მთელ ევროპაში მიმდინარეობს, სადაც ახალგაზრდები ქუჩებში გამოდიან და მეტ უფლებებსა და პალესტინელი ხალხის უფლებების დაცვას ითხოვენ.
"ევროკავშირი ორიენტირებულია საქართველოზე, ახლახან არჩეული მთავრობა სხვა ინტერესებს ატარებს და ვინც ნატო-ზე ზრუნავს ამას აპროტესტებს. ჩვენ ორმხრივ ურთიერთობებს უფრო მეტი დრო უნდა დავუთმოთ და არა სხვებზე ზეწოლასა და მუქარას“, - აღნიშნა იტალიელმა ევროპარლამენტარმა.
- ფრანგმა ევროპარლამენტარმა, ნატალი ლუაზომ ევროპარლამენტში, საქართველოს საკითხზე მიმდინარე დებატებისას განაცხადა, რომ ს აქართველოს მოსახლეობა აპროტესტებს იმას, რომ მათ არჩევნები მოპარეს და გააყალბეს.
"ძვირფასო კოლეგებო, თუ არ გესმით, რას ამბობენ მომიტინგეები თბილისში ყოველ ღამით, ნება მომეცით, გითხრათ, მე მივედი მათთან შესახვედრად. მათ არჩევნები მოპარეს, გააყალბეს, მათ თავისუფლებას პარავენ. ისინი გამუდმებით იმეორებენ, რომ საქართველო არის ევროპა და არა რუსეთი. ძვირფასო კოლეგებო, დავბრმავდით და ვერ ვხედავთ რეპრესიებს ამ მშვიდობიანი მომიტინგეების წინააღმდეგ? მათ დაპატიმრებას, ცემას. ჟურნალისტებსა და ოპოზიციის წევრებს ციხეში უშვებენ, ვხედავთ ღრუბელს ქვეყანაზე, მოსკოვთან დაკავშირებას. ვართ მნიშვნელოვანი? არ დავუწესებთ სანქციებს „ქართული ოცნების“ დონორებს, ვისაც სურთ საქართველო რუსეთად გადააქციონ? პრეზიდენტმა მეცოლამ სალომე ზურაბიშვილი იქნა ევროპარლამენტში მოიწვია. ქალბატონი ზურაბიშვილი თავისი ქვეყნის დემოკრატიული მომავლისთვის იბრძვის. მან პლენარულ სხდომაზე უნდა ისაუბროს. საქართველო მიეკუთვნება ჩვენი ევროპული დემოკრატიის სახლს. მათ ვისაც ჩვენი სჯერა ევროპის, ჩვენი უნდა დავუმტკიცოთ, რომ მართლები არიან, რომ ჩვენო სჯერათ“, – განაცხადა ლუაზომ.
ფრანგმა ევროპარლამენტარის, ტიერი მარიანის თქმით, საქართველოსა და რუმინეთში ევროკავშირის მხრიდან ხალხის არჩევანის უარყოფას აქვს ადგილი.
- მისი თქმით, ამას მოწმობს ღამის დემონსტრაციები თბილისის ქუჩებში, სადაც ევროკავშირის მიერ „წახალისებული ოპოზიცია მხარდამჭერების მობილიზებას ახდენს.
"ამას მოწმობს ღამის დემონსტრაციები თბილისის ქუჩებში, სადაც თქვენს მიერ წახალისებული ოპოზიცია მხარდამჭერების მობილიზებას ახორციელებს, რომლებიც უდავოდ ისწრაფვიან ესკალაციისა და "მაიდანის" სტილის პროვოკაციებისკენ. თუმცა საქართველო და მისი ინსტიტუტები მტკიცედ დგანან, ისინი წინააღმდეგობას უწევენ ძალადობას. ვინც არჩევნები წააგო, ახლა თქვენი მხარდაჭერით ცდილობს ძალაუფლების ძალით ხელში ჩაგდებას. „ქართული ოცნების“ გამარჯვება ცენტრალურმა საარჩევნო კომისიამ აღიარა და პრეზიდენტი ყაველაშვილი კანონმდებლობის შესაბამისად აირჩიეს. ხალხს, არც საქართველოში და არც რუმინეთში, აღარ სურს, სუვერენიტეტი წაართვან. ევროკავშირი აცხადებს, რომ დემოკრატიის და კეთილდღეობის გარანტია, მაგრამ ის საქართველოში სახელმწიფო გადატრიალების წახალისებას ახდენს. ეს ამ ქვეყნის ქაოსში ჩაძირვის საფრთხეს ქმნის“, - აღნიშნა ევროპარლამენტარმა.
ნიდერლანდელმა ევროპარლამენტარმა, რაინიე ვან ლანშოტმა თქვა, რომ პარტია „ქართული ოცნება“ რუსულ კოშმარად გადაიქცა.
"ამ კოშმარის ლიდერებმა ხალხის ხმა მოიპარეს არჩევნებით, რომელიც არც თავისუფალი და არც სამართლიანი ყოფილა და ევროკავშირისკენ გზის გადაკეტვით ხალხს იმედი მოპარეს. ისინი არალეგიტიმურები და არაკონსტიტუციურები არიან, მაგრამ ნიღბები ჩამოხსნილია და მათ ნამდვილი სახე აჩვენეს. სახე, რომელიც ქართველმა ხალხმა კარგად იცის, რუსული ჩაგვრის სახე“, - განაცხადა რაინიე ვან ლანშოტმა.
- მისივე თქმით, დემონსტრანტების, ჟურნალისტებისა და ოპოზიციის ლიდერების წინააღმდეგ ძალადობის მიუხედავად ქართველი ხალხი არ ნებდება.
"მოსახლეობის 7% ყოველდღიურად საპროტესტო აქციებზე გამოდის. გასულ ხუთშაბათს ამ აქციების მონაწილეებთან ერთად გავიარე და ისინი ახალ არჩევნებს ითხოვენ. ერთი წლის წინ საქართველომ ევროკავშირის კანდიდატის სტატუსი მოიპოვა არა მისი ხელისუფლების, არამედ ხალხის გამო და ეს ხალხი დღეს ჩვენგან მოქმედებას ელის, მაშ როგორ დავეხმაროთ მათ?! სანქციები დავუწესოთ „ქართული ოცნების“ ლიდერებს, მათ მხოლოდ საკუთარი სიმდიდრე აინტერესებთ, დავაფინანსოთ დამოუკიდებელი მედია და დემოკრატიის სხვა დამცველები, მხარი დავუჭიროთ სალომე ზურაბიშვილს, საქართველოს ერთადერთ ლეგიტიმურ პრეზიდენტს, რომელიც 29 დეკემბრის შემდეგაც ლეგიტიმური იქნება. როგორც ერთმა დემონსტრანტმა მითხრა, საქართველოს ნამდვილი ოცნება ევროპულია“, - აღნიშნა ევროპარლამენტარმა.
გერმანელმა ევროპარლამენტარმა, ჰანს ნოიჰოფმა ევროპარლამენტში საქართველოს შესახებ გამართულ დებატებზე სიტყვით გამოსვლისას განაცხადა:
"თუ საქართველოს პარლამენტში, ისევე როგორც გერმანიის პარლამენტში, ოპოზიციას ოფისებში არ დაუშვებდნენ, თუ ოპოზიციონერ პოლიტიკოსებს თავს დაესხმებოდნენ, მათ სახლებსა და ავტომობილებს დააზიანებდნენ, თუ საქართველოში, ისევე როგორც გერმანიაში, სახელმწიფო პროგრამა იქნებოდა ოპოზიციის წინააღმდეგ საბრძოლველად, თუ სახელმწიფო მედია ოპოზიციის დისკრედიტაციას მოახდენდა, თუ ოპოზიციას პოლიტიკურ დებატებში მონაწილეობას აუკრძალავდნენ, თუ საქართველოში, ისევე როგორც გერმანიაში, სახელმწიფო სამსახური იქნებოდა, რომელიც ოპოზიციას უთვალთვალებდა, ასეთ შემთხვევაში, ქალბატონებო და ბატონებო, ეს დარბაზი სამართლიანად მივიდოდა იმ დასკვნამდე, რომ საქართველო ევროკავშირში გაწევრიანებას ვერ შეძლებს“, - განაცხადა ჰანს ნოიჰოფმა.