კარვები, კოცონი, ცეკვა და ფერხულში ჩაბმული აქციის მონაწილეები - როგორ გაათენეს ღამე თსუ-სთან შეკრებილებმა პროტესტანტებმა და ოპოზიციის ლიდერებმა (ფოტო/ვიდეო)
ოპოზიციონერმა პოლიტიკოსებმა და საპროტესტო აქციის მონაწილეებმა, რომლებმაც 24 საათიანი პროტესტი გუშინ, საღამოს 20:00 საათზე დაიწყეს, ღამე კარვებში გაათენეს.
მონაწილეები აქამდე ადგილზე რჩებიან. ნაწილი ადგილზე როტაციისთვის დილიდან მივიდა. ადგილზე იმყოფებოდნენ ოპოზიციური პარტიის ლიდერებიც.
ადგილზე 20-ზე მეტი კარავია გაშლილი, რის გამოც გადაადგილება ამ დრომდე შეფერხებულია რამდენიმე მიმართულებით: მელიქიშვილის გამზირი, ვარაზისხევი, კეკელიძის ქუჩა და ჭავჭავაძის გამზირი.
აქციის ორგანიზატორებს რამდენიმე ადგილზე ცეცხლი ჰქონდათ დანთებული. ამასთანავე, ჭავჭავაძის გამზირზე ნაგვის ურნებისა და სკამების საშუალებით გზა ჰქონდათ ჩახერგილი.
მონაწილეები მთელი ღამის განმავლობაში თავს ცეკვით და სიმღერით იმხნევებდნენ.
“ჩვენ ვდგავართ სადაც სამშობლოს ჭირდება! შენ?“ - ფოტო “ერთიანობა ნაციონალური მოძრაობის“ ახალგაზრდულმა ფრთამ გამოაქვეყნა.
შეკრებილებს ოთხფეხა ცხოველებიც ამხნევებდნენ. სოციალურ ქსელში პოპულარულია ჭავჭავაძის გამზირის მიმდებარედ გადაღებული ფოტოები.
ასევე პოპულარულია მონაწილეების მიერ შესრულებული სიმღერა, რომლებიც გათბობას პლედებით ცდილობდნენ.
დილის მდგომარეობით, ჭავჭავაძის გამზირის მიმდებარედ ათეულობით ადამიანი რჩება. მათ უკვე მიმართეს ოპოზიციური პარტიის ლიდერებმა და განაცხადეს, რომ ბრძოლა ამომრჩეველთა ხმების დასაცავად, ისევ გაგრძელდება.
შეგახსენებთ, საპროტესტო აქციის მონაწილეები ხელახალი არჩევნების ჩატარებას ითხოვენ. მათი თქმით, საპარლამენტო არჩევნები ტოტალური გაყალბების ფონზე ჩატარდა, რაც გამოსაძიებელია.
იხილეთ ასევე:
- კარვები ისევ გაშლილია, პოლიტიკოსები პროტესტანტებს მიმართავენ - რა ხდება ამჟამად ჭავჭავაძის გამზირზე?
- ქალაქში პირველი კარავი გაიშალა - 24 საათიანი გამაფრთხილებელი პროტესტი და გადაკეტილი მაგისტრალი: რას გეგმავს ოპოზიცია? (ფოტო/ვიდეო)