"ცდილობენ ჩვენს დისკრედიტაციას, ცილს გვწამებენ... ამაში ჩართულია საფრანგეთის და აშშ-ს რამდენიმე მოქალაქეც" - როგორ ებრძვიან რუსული სპეცსამსახურები უკრაინაში მებრძოლ ქართველებს: რას ჰყვება მამუკა მამულაშვილი?

უკრაინაში მებრძოლი ქართველების დისკრედიტაციას რუსული სპეცსამსახურები მუდმივად ცდილობენ. განსაკუთრებული დარტყმის ქვეშ ხშირად ხვდებიან "ქართული ლეგიონი" და მისი ლიდერი მამუკა მამულაშვილი. ამ ცოტა ხნის წინ ინტერნეტ გამოცემაში, სახელით "უკრაინა თუდეი“, ჯეი ბიჩრის ავტორობით გამოქვეყნდა სტატია, რომელშიც ლაპარაკი იყო იმაზე, რომ, რომ თითქოს მამუკა მამულაშვილმა მოწამვლის ფაქტი გამოიგონა, მისი სისხლის მაჩვენებლები კი ნორმის ფარგლებშია. გარდა ამისა, სტატიის თანახმად, კონკრეტული პირები უკრაინის დასახმარებლად ფინანსური დონაციის მოზიდვის მიზნით, თითქოს თაღლითურ სქემებს მიმართავდნენ, დონაციით შემოსული თანხების ნაწილი კი რეალურად უკრაინის ნაცვლად, მათ ანგარიშებზე მიდიოდა. აღსანიშნავია ისიც, რომ ამ სტატიაზე დაყრდნობით ქართული ტელევიზიების ნაწილმაც მოამზადა სიუჟეტები, თუმცა, ძალიან მალევე გაირკვა, რომ გამოცემასს, რომელიც ამ ინფორმაციის წყარო იყო, სინამდვილეში არაფერი არ აქვს საერთო უკრაინაში ნამდვილად მოქმედ ინტერნეტგამოცემა "უკრაინა თუდეისთან“ და ის არის ბრიტანეთში დარეგისტრირებული დომეინი, რომელიც რუსული პროპაგანდის სამსახურშია.

"რუსულ სპეცსამსახურებს სურთ, გადასახადების გადამხდელ, ამერიკულ საზოგადოებს შეუქმნან განცდა, რომ ბიუჯეტიდან უკრაინის დასახმარებლად გახარჯული თანხები არამიზნობრივად იხარჯება და სწორედ ამიტომ გადაწყვიტეს ქართველებისთვის ცილის დაწამება", - ამბობს უკრაინაში მებრძოლი "ქართული ლეგიონის“ მეთაური მამუკა მამულაშვილი.

მისი თქმით, მადისკრედიტირებელი სტატიის ავტორთან ჯეი ბიჩერთან თანამშრომლობა უკრაინული მედიის ყველა წარმომადგენელმა უარყო, "კიევ პოსტის“ გარდა. ამ უკანასკნელმა კი განმარტა, რომ ბიჩერი მათთან თარჯიმნად მუშაობდა, მაგრამ პროვოკაციების გამო გააძევეს.

"ქართული ლეგიონთან“ დაკავშირებული ბიჩერის სკანდალური სტატიით დაინტერესდა უკრაინული გამოცემა "აქტუალნა პრავდა“ და ვრცელი ჟურნალისტური გამოძიება ჩაატარა. გამოძიების ფარგლებში შემოწმდა "ქართული ლეგიონის“ საბუღალტრო ანგარიშები, გადარიცხვები, პროკურატურაში მამულაშვილის მოწამვლის ფაქტზე აღძრულ სისხლის სამართლის ზოგიერთი დეტალი. საბოლოოდ, ჟურნალისტურმა გამოძიებამ გამოავლინა ფსევდო-ჟურნალისტი ჯეი ბიჩერის დამკვეთები და თანამოაზრეები, ასევე დამკვეთთა მიზნები და ამოცანები. როგორ ცდილობენ რუსული სპეცსამსახურები ქართველების დისკრედიტაციით, ამერიკულ საზოგადოებაზე ზემოქმედებას და როგორ აპირისპირებენ ერთმანეთთან ქართველებსა და უკრაინელებს, ამის გარკვევას მამუკა მამულაშვილთან საუბრისას შევეცადეთ:

- პირველ რიგში მინდა გითხრა, რომ მსგავსი მეთოდებით ბრძოლა ჩვენს ბრძოლისუნარიანობაზე ვერ იმოქმედებს. უკვე ათი წელია, რაც რუსეთთან პირდაპირ კონფრონტაციაში ვართ და იმუნიტეტი გამოგვიმუშავდა. რუსებმა ბრძოლის ველზე ვერაფერი დაგვაკლეს და შეეცადნენ შეხებოდნენ იმას, რაც ზოგადად ქართველი მებრძოლისთვის ყველაზე მტკივნეულია, ეს არის სახელის შებღალვა. ამ საქმეში ჩართულნი არიან რუსეთის სახელმწიფო სადაზვერვო და კიბერ სამსახურები - ბოტები. ძალიან გამიხარდა, როდესაც გავიგე, რომ უკრაინელებმა ჟურნალისტური გამოძიების ჩატარება გადაწყვიტეს ჩვენს საქმეზე. მათ მართლაც ყველაფერ გაარკვიეს და კვალი რუსეთის ფედერაციის სპეცსამსახურებამდე მივიდა. ჩემდა გასაკვირად, გაირკვა, რომ ჩემს წინააღმდეგ შეთითხნილი ცრუ ბრალდებების გავრცელებაში ბიჩერთან ერთად ჩართულია საფრანგეთის და ამერიკის შეერთებული შტატების რამდენიმე მოქალაქე. ესენი წარმოადგენენ დანაშაულებრივ ჯგუფს, რომლებიც უკრაინაში არეგისტრირებენ დომეინებს, ქმნიან საკუთარ გვერდებს სოციალურ მედიაში, წერენ უკრაინის მხარდამჭერ რამდენიმე სტატიას ან პოსტს - ნდობის მოპოვების მიზნით და მერე უცებ აქვეყნებენ ისეთ სტატიებსა და პოსტებს, რომლებიც სხვადასხვა დოზით და სხვადასხვა ფორმით რუსეთის წინააღმდეგ მებრძოლთა, ზოგადად თავისუფლებისთვის ბრძოლის იდეის დისკრედიტაციას ახდენს. პრინციპში, ეს რუსული სპეცსამსახურების ხელწერაა და ძნელად გამოსაცნობიც არ იყო.

- რაში აძლევს ხელს, ბიჩერს ან რუსულ სპეცსამსახურებს ვერსიის გავრცელება იმის შესახებ, რომ თქვენ საკუთარი მოწამვლა გამოიგონეთ?

- ნახეთ რა ხდება, ჯეი ბიჩერის და მისი გუნდის მიზანი პირადად ჩემი დისკრედიტაცია რომ ყოფილიყო, უფრო დამაჯერებელი ბრალდებების შეთითხნას შეეცდებოდნენ, რაიმე ისეთს დამაბრალებდნენ, რაში გარკვევაც უკრაინელებს გაუჭირდებოდათ. იმის გაქარწყლება, რომ ფულის შესაგროვებლად გამოვიგონე ჩემი თავის მოწამვლა, ძალიან ადვილია და ამას ბიჩერიც უნდა მიმხვდარიყო და მისი დამკვეთებიც. იმიტომ რომ ამ ამბავზე პროკურატურაში საქმეა აღძრული - მკვლელობის მცდელობის მუხლით. ჟურნალისტებს იმის საშუალებაც კი მიეცათ, რომ პირდაპირ საქმის მასალებიდან გამოექვეყნებინათ ამონაწერი. ასევე ძალიან მარტივი დასადგენია, როგორ იხარჯება "ქართული ლეგიონისთვის“ ჩარიცხული თანხები. ზოგადად, ნებისმიერი სადონაციო სისტემა შეერთებულია ერთ საბუღალტრო აღრიცხვაში. ჩვენ ჟურნალისტებს სრული თავისუფლება მივეცით, რომ რაც სჭირდებოდათ, ყველაფერი ენახათ "ლეგიონის“ საბუღალტრო ჩანაწერებში. მათ ნახეს, რომ "ქართული ლეგიონის“ სახელზე შემოსული თანხებიდან ერთი დოლარიც კი არ იყო არამიზნობრივად გახარჯული. რამდენიმე მიღება-ჩაბარების აქტი გამოაქვეყნეს კიდეც. ეს საჯარო ინფორმაციაა და ამის გაგება მართლა რომ სდომებოდა ვინმეს, აუცილებლად გაარკვევდნენ.

ახლახან გაირკვა, რომ უკრაინული არმიის კიდევ ოთხი სხვადასხვა დანაყოფის წინააღმდეგაც წამოიწყეს ცილისმწამებლური სტატიების გავრცელება. ე.ი. ბიჩერის მთავარი მიზანი მამუკა მამულაშვილისა და "ქართული ლეგიონის“ ტალახში ამოსვრა არ არის. ეს არის რუსული სპეცსამსახურების შექმნილი პროექტის ნაწილი, რომლის ფარგლებშიც დასავლური საზოგადოება უნდა დარწმუნდეს, რომ უკრაინული არმია დასავლურ დახმარებას არ იმსახურებს. ამ პროექტს აქვს ქვე მიზნებიც, ვიღაცებმა ქართველი ხალხის სახელით დაიწყეს ლაპარაკი, რატომ უნდა ომობდნენ, ჩვენი ბიჭები უკრაინაში, როდესაც უკრაინელები მათი სახელის გაფუჭებას ცდილობენო?! ე.ი რამდენიმე მიმართულებით გაშალეს ცრუ ვერსიები და რომ არა, უკრაინელი ჟურნალისტები, საქმეში ჩაუხედავი ძალიან ბევრი ადამიანი წამოეგებოდა რუსულ დეზინფორმაციულ ანკესს.

არ ვიცი, "ქართული ოცნებაც“ ჩართული იყო ამ სქემაში თუ, უბრალოდ, დაემთხვა, მაგრამ ფაქტი ის არის, ბიჩერის ბრალდებები ჩემს მიმართ მხოლოდ ქართული სამთავრობო მედიის წარმომადგენლებმა აიტაცეს. ჯეი ბიჩერის სტატია ერთი ერთში აქვს გადაღებული "იმედის“, რუსთავი2-ისა და "პოსტივის". ყველაზე ცუდი კი ის არის, რომ არცერთი ტელევიზიის ჟურნალისტს არ გაუჩნდა ჩემთან დაკავშირებისა და სიმართლე გარკვევის სურვილი. მინდა გითხრათ, რომ რუსული კიბერ-შეტევა ისევ გრძელდება. საომარი მოქმედებების დროს პროვოკაციების მოწყობა და სიცრუის ტირაჟირება დასჯადია, ეს განიხილება, როგორც საბოტაჟი უკრაინული არმიის წინააღმდეგ. ამის შესახებ მალე უკრაინული სპეცსამსახურებიც გააკეთებენ განცხადებას. მე რამდენადაც ვიცი, უკვე სისხლის სამართლის საქმეებიც არის აღძრული ბრიტანეთის, საფრანგეთის და ამერიკის შეერთებული შტატების იმ მოქალაქეების წინააღმდეგ, რომლებიც ჯეი ბიჩერთან ერთად იყვნენ ჩართული ამ დანაშაულებრივ სქემაში. ყველაფერი ძალიან მალე გაირკვევა. სხვათა შორის, ერთ-ერთმა ყველაზე გავლენიანმა უკრაინელმა ბლოგერმა, რომელმაც თავის გადაცემაში დამპატიჟა, შემახსენა, რომ "ქართულ ლეგეიონზე“ ამერიკის 2020 წლის საპრეზიდენტო არჩევნებამდე ერთი თვით ადრეც ძალიან მძიმე შეტევა გაანხორციელდა.

- ბიჩერის თანამოაზრეების შესახებ რა იცით?

- პირველ რიგში ჯეი ბიჩერის შესახებ გეტყვით, ის არის ინგლისის მოქალაქე, რომელიც საკუთარი ქვეყნიდან გამოქცეულია იმის გამო, არ გადაეხადა სასამართლოს მიერ დაკისრებული ჯარიმა, რომელიც მას ცილისწამებისთვის დააკისრეს. გაირკვა ისიც, რომ ბიჩერი თავადვე ყოფილა ეჭვმიტანილი პედოფილიაში და ნარკოტიკებით ვაჭრობაში. მის გუნდში არის ასეთი პიროვნება ფოი რისი, რომელიც ყალბ ინფორმაციას ავრცელებს იმის შესახებ, რომ თითქოს "ქართული ლეგიონი“ ბრძოლებში არ მონაწილეობს. ის დეზინფორმაციული სტატიის გამო აშშ-ს არმიიდან დაითხოვეს, ჩამოვიდა უკრაინაში, ჩაირიცხა საერთაშორისო ლეგიონის რიგებში და აქედან განაგრძო დეზინფორმაციული საქმიანობა. მის "ფეისბუქის" გვერდზე რომ შეხვიდეთ, უკრაინის თავდაცვის ძალების არაერთი მადისკრედიტირებელ სტატიას ნახავთ. ჯეი ბიჩერს ასევე ეხმარება ემეს ფაიკი, ფოი რისის კოლეგა საერთაშორისო ლეგიონში. ეს არის ადამიანი, რომლის შესახებაც, გასულ წელს, ბრიტანული გამოცემა Daily Mail-ი წერდა, - უკრაინელი სამხედროების მედიკამენტებისთვის გათვლილი ფული მოიპარაო... არის კიდევ ერთი ადამიანი, მარკ ენდრიუ ჰამლინი, იგივე ომის სანტა, რომელის სახელზეც დაპატიმრების ორდერიც კი გამოწერეს ბავშვთა პორნოგრაფიის ფლობისთვის. თუმცა, მისი საქმე როგორღაც ჩაიფარცხა. ეს კიდევ არასრული ჩამონათვალია იმ გუნდისა, რომელიც ჯეი ბიჩერმა შეკრა ,უკრაინული სამხედრო ძალების დისკრედიტაციისათვის.

- გარკვეული ძალები ქართველი მებრძოლების ერთმანეთთან დაპირისპირებასაც ხომ არ ცდილობენ?

- დიახ, ნამდვილად არიან ძალები, რომლებიც ქართველი მებრძოლების ანგაჟირებას და "ქართულ ლეგიონთან“ დაპირისპირებას ცდილობენ. სხვათა, შორის ეს ღონისძიება საკმაოდ მასშტაბური იყო, თან ერთმანეთს გვაპირისპირებდნენ და თან ყველას ერთად გვლანძღავდნენ. მაგალითად, "რაშა თუდეიში“ დაიბეჭდა სტატია რომელშიც წერია, რომ უკრაინული არმია სავსეა ქართველები, რომლებიც იქ საძარცვავად, საყაჩაღოდ, ფულის საკეთებლად ჩადიან და ის ფული, რომელსაც დასავლეთი უკრაინულ არმიაში აგზავნის, წყალში გადაყრილია. ძალიან ცუდია, მარგარიტა სიმონიანის ნარატივს დროდადრო საქართველოშიც რომ იმეორებენ.

- მე მოვისმინე ვერსია იმის შესახებ, რომ უკრაინულმა პროკურატურამ თქვენს წინააღმდეგ აღძრა საქმე, თანხების გაფლანგვის თაობაზე.

- (იცინის) ამის შესახებ ჯერ მე არაფერი ვიცი, ალბათ ეს კიდევ ერთი რუსული დეზინფორმაციაა.

- რაც შეეხება თქვენი მოწამვლის ფაქტს, როგორია ახლა თქვენი ჯანმრთელობის მდგომარეობა ?

- მკურნალობა გრძელდება, ეს არ არის მარტივი... მძიმე მეტალები, რომელიც ჩემს ორგანიზმში მოხვდა, ნელ-ნელა იწყებს ორგანიზმის დაავადებას.

- ასეთ ვითარებაში საომარ მოქმედებებში მონაწილეობა ალბათ ორმაგად რთულია...

- კი, მაგრამ როგორც საუბრის დასაწყისში გითხარით, იმუნიტეტი მაქვს გამომუშავებული. 2020 წელს, ამერიკის საპრეზიდენტო არჩევნების წინ ადამიანმა, რომელიც "გაზპრომში" 8 წელი მუშაობდა, ჩვენს გაშავების მიზნით ფილმის გადაღება დაუკვეთა. ასეთი პროვოკაციები ბრძოლის უფრო დიდ მოტივაციას მიჩენს.

- რა ხდება ახლა ფრონტის ხაზზე?

- შემიძლია გითხრათ, რომ მტერი გააქტიურებულია და ამერიკის საპრეზიდენტო არჩევნებამდე კიდევ უფრო გააქტიურდება. ეცდებიან, რაც შეიძლება მეტი ტერიტორიების ოკუპაცია მოახდინონ. პუტინი დარწმუნებულია, რომ ამერიკული საპრეზიდენტო არჩევნების შემდეგ მოლაპარაკება გაიმართება და სურს, ამ დროისათვის, რაც შეიძლება მეტი სავაჭრო ჰქონდეს.

- თქვენ, როგორც ამ პროცესების უშუალო მონაწილეს, რა განცდა გაქვთ, შედგება თუ არა მოლაპარაკება რუსეთსა და უკრაინას შორის, ამერიკის შეერთებული შტატების საპრეზიდენტო არჩევნების შემდეგ?

- პირდაპირ გეტყვით, პუტინს ამის ილუზია არ უნდა ჰქონდეს, უკრაინელი ხალხი და უკრაინელი პრეზიდენტი პუტინთან მოლაპარაკებაზე წავა.

- ახლა უკრაინული არმიისთვის ძალიან დიდ გამოწვევად მიიჩნევს 12 000 - მდე ჩრდილო კორეელ ჯარისკაცს, რომლებიც უკვე მობილიზებულები არიან და სავარაუდოდ, პირველი ნომებრიდან ჩართვებიან ომში...

- ჩრდილო კორეელ ჯარისკაცებს არც ომის გამოციდლება აქვთ და არც მოტივაცია, შესაბამისად, ჩვენი მათ დიდ გამოწვევად არ მივიჩნევთ. რუსები მაგათაც ისევე გამოიყენებნ საზარბაზნე ხორცად, როგორც საკუთარ ხალხს იყენებენ.