"საქართველო გამარჯობა" - "ქართული ოცნების" საარჩევნო კამპანიის დასკვნითი ღონისძიება ბერას სიმღერით დასრულდა: კადრები და ივანიშვილის ვაჟის მიმართვა

"საქართველო გამარჯობა" - ამ სიტყვებით მიმართა თბილისში, თავისუფლების მოედანზე შეკრებილ მოქალაქეებს ბერა ივანიშვილმა, რომელიც როგორც ჩანს დედაქალაქში სწორედ "ქართული ოცნების" საარჩევნო კამპანიის დასკვნითი ღონისძიებისთვის ჩამოვიდა.

"ჩემთვის დიდი პატივია თქვენთან ერთად დგომა. 16 წლის ვიყავი, როცა ეს ყველაფერი დაიწყო და მამაჩემის გვერდით ვიბრძოდი. მინდა გითხრათ, რომ მაშინაც და დღესაც მამაჩემს ნებისმიერ ბრძოლაში ბრმად გავყვები.

თუმცა მაშინ ემოციებით სავსე ბავშვი ვიყავი, რომელიც მამას მიჰყვებოდა, დღეს მე თვითონაც მამა ვარ. სულ სხვანაირად აღვიქვი, თუ რას ნიშნავს, სამშობლოს სიყვარული. თუ რისთვის იბრძვის მამაჩემი ამდენი წელია. მინდა, რომ ჩემმა ბერუკამ და დადუმ და თითოეული თქვენგანის შვილებმა ერთიან და ძლიერ საქართველოში იცხოვრონ. ამისთვის არსებობს ერთი გზა, ამ გზას ჰქვია "ქართული ოცნება" - თქვა ბერამ მას შემდეგ, რაც სცენაზე სიმღერა შეასრულა.

• ცნობისთვის ბერა ივანიშვილი ბოლო წლებში მეუღლესთან და შვილებთან ერთად ბრაზილიაში ცხოვრობდა.

"თავისუფლების მოედანზე“ „ქართული ოცნების“ საარჩევნო კამპანიის დასკვნითი ღონისძიება ეროვნული ჰიმნით გაიხსნა. მანამდე რამდენიმე ლოკაციიდან მსვლელობა გაიმართა. რესპუბლიკის მოედანზე შეკრებილებს ცოტნე ივანიშვილი შეუერთდა. კიდევ ერთი მსვლელობა გაიმართა ბარათაშვილის ხიდიდან.

შეკრებილ მოქალაქეებს ქართული ოცნების“ ლიდერებმა სიტყვით მიმართეს. ღონისძიების გამო, თავისუფლების მოედანსა და რუსთაველის გამზირზე ტრანსპორტის მოძრაობა სრულად აკრძალული იყო.

ნახეთ ასევე: კადრები "ქართული ოცნების“ საარჩევნო კამპანიის დასკვნითი ღონისძიებიდან - რა განცხადებები გაკეთდა სცენიდან