კირილ ბუდანოვი აცხადებს, რომ ჩრდილოეთ კორეელი სამხედროების პირველი ქვედანაყოფები კურსკში დღეს ჩავლენ
მოსალოდნელია, რომ ჩრდილოეთ კორეელი სამხედროების პირველი ნაკადი რუსეთის კურსკის ოლქში 23 ოქტომბერს ჩავა, - ამის შესახებ უკრაინის თავდაცვის სამინისტროს მთავარი სადაზვერვო სამმართველოს ხელმძღვანელმა, კირილ ბუდანოვმა განაცხადა.
მისი თქმით, ჩრდილოეთ კორეელი ჯარისკაცები რუსებს კურსკის ოლქში უკრაინის თავდაცვის ძალების წინააღმდეგ ბრძოლაში დაეხმარებიან.
"ველოდებით პირველ ქვედანაყოფებს კურსკის მიმართულებით“, - აღნიშნა ბუდანოვმა.
მისი თქმით, ჯერჯერობით უცნობია რამდენ ჯარისკაცზეა საუბარი და როგორ აღიჭურვებიან ისინი."რამდენიმე დღეში ვნახავთ", - დასძინა ბუდანოვმა.
შეგახსენებთ, სამხრეთ კორეის სადაზვერვო სააგენტომ რამდენიმე დღის წინ განაცხადა, რომ ჩრდილოეთ კორეამ, რუსეთის მხარდასაჭერად, 12 000 სპეცრაზმელის გაგზავნის გადაწყვეტილება მიიღო და რომ მათგან 1 500 უკვე რუსეთის შორეულ აღმოსავლეთშია.
ნატო-ს გენერალურმა მდივანმა, მარკ რუტემ გუშინ განაცხადა, რომ ამ მომენტისთვის მას არ შეუძლია უკრაინის წინააღმდეგ რუსეთის ომში ჩრდილოეთ კორეელების მონაწილეობის შესახებ ცნობები დაადასტუროს. “ამ მომენტში არ შემიძლია ინფორმაციის დადასტურება და მხოლოდ აღვნიშნავ, რომ ინფორმაციას სამხრეთ კორეა მოგვაწვდის”, - აღნიშნა რუტემ.
იხილეთ ასევე: