"ჩრდილოეთის ნაკადის" აფეთქებაში ეჭვმიტანილი იპოვეს? - ვინ არის უკრაინის მოქალაქე, რომლის დაკავების ორდერი გერმანიამ გასცა
"ჩრდილოეთის ნაკადის" აფეთქებაში ეჭვმიტანილი მყვინთავი პოლონეთიდან უკრაინაში ივლისის დასაწყისში გაემგზავრა, - ამის შესახებ პოლონეთის გენერალური პროკურატურის პრესმდივანმა, ანა ადამიაკმა განაცხადა.
- "მამაკაცმა პოლონეთ-უკრაინის საზღვარი ივლისის დასაწყისში გადაკვეთა“, - განაცხადა ანა ადამიაკმა.
პოლონეთის პროკურატურამ დაადასტურა, რომ საქმეზე გერმანული მხარის მიერ გაცემული დაკავების ორდერი მიიღეს, თუმცა ეჭვმიტანილი მის სავარაუდო საცხოვრებელ ადგილას ვერ იპოვეს.
შეგახსენებთ, დღეს, გერმანულმა მედიამ ინფორმაცია გაავრცელა, რომ ბალტიის ზღვაში „ჩრდილოეთის ნაკადის“ გაზსადენზე აფეთქებებიდან თითქმის ორი წლის შემდეგ, გერმანიის გენერალურმა პროკურორმა, იენს რომელმა ეჭვმიტანილი უკრაინის მოქალაქის, ვლადიმერ ს.-ს დაკავების ორდერი გასცა.
მედიის ცნობით, როდესაც პოლონელი ოფიცრები ივლისის დასაწყისში მივიდნენ, ვლადიმირი სახლში არ იყო, მას უკვე დატოვებული ჰქონდა ქვეყანა. ცნობილი ხდება, რომ ის პოლონეთში პრუსკოვში ცხოვრობდა და უკრაინელი მყვინთავების გუნდის წევრი იყო.
რა მოხდა 2022 წელს?
"ჩრდილოეთის ნაკადი 1“-სა და "ჩრდილოეთის ნაკადი 2“-ის მილსადენებიდან ბალტიის ზღვაში, დანიისა და შვედეთის ტერიტორიულ წყლებში გაზის გაჟონვა მოხდა. მომხდარს ორივე ქვეყანა იძიებდა. აშშ-ის, ევროკავშირისა და ნატო-ს ოფიციალურმა პირებმა განაცხადეს, რომ ინციდენტის მიზეზი დივერსიული აქტია.
ევროპის უსაფრთხოების სამსახურების წარმომადგენლებმა "ჩრდილოეთ ნაკადის“ მილსადენებზე მომხდარი გაჟონვის ადგილის მახლობლად რუსეთის სამხედრო-საზღვაო ფლოტის გემები დააფიქსირეს. ინფორმაციას CNN დასავლეთის დაზვერვის ორ წარმომადგენელზე დაყრდნობით ავრცელებდა.
ტელეკომპანიის წყაროების განმარტებით, გაურკვეველია, ჰქონდათ თუ არა რაიმე კავშირი გემებს წყალქვეშ აფეთქებებთან. დაზვერვის ერთ-ერთი წარმომადგენელის განცხადებით, ამ ტერიტორიებთან ახლოს მომხდარის წინა დღეებში რუსული წყალქვეშა ნავებიც შენიშნეს. აღნიშნულ საკითხზე კომენტირებისას დანიელმა სამხედრო მაღალჩინოსანმა განაცხადა, რომ რუსული გემები რეგულარულად მოძრაობენ რეგიონში და ხაზი გაუსვა, რომ გემების დაფიქსირება სულაც არ მიუთითებს იმაზე, რომ დაზიანება რუსეთის გამოწვეულია.
წაიკითხეთ ასევე: