51 წლის მამაკაცი, რომლის ჯანმრთელობის განზრახ მძიმე დაზიანებისთვის სამართალდამცველია დაკავებული, საავადმყოფოში გარდაიცვალა

გორის მუნიციპალიტეტის სოფელ ატენში, 29 ივლისს მომხდარი დანაშაულებრივი ფაქტის დროს მძიმედ დაშავებული 51 წლის რევაზ მიხანაშვილი გუშინ საღამოს საავადმყოფოში გარდაიცვალა.

მიხანაშვილის ჯანმრთელობის მდგომარება კლინიკაში შეყვანიდან კრიტიკულად მძიმე იყო.

შეგახსენებთ, საქართველოს პროკურატურამ გორის მუნიციპალიტეტის სოფელ ატენში მომხდარ ჯანმრთელობის განზრახ მძიმე დაზიანების ფაქტზე ბრალდებულ ორ პირს, რომელთაგან ერთ-ერთი - დემეტრე რევაზაშვილი, განსაკუთრებულ დავალებათა დეპარტამენტის ინსპექტორი იყო, ბრალდება 9 აგვისტოს დაუმძიმა.

უწყების ინფორმაციით, პროკურატურამ ორივე მათგანს დაზუსტებული ბრალდება საქართველოს სისხლის სამართლის კოდექსის 117-ე მუხლის მესამე ნაწილის „ლ“ ქვეპუნქტით (ჯანმრთელობის ჯგუფურად, განზრახ მძიმე, სიცოცხლისთვის სახიფათო დაზიანება) წარუდგინა, რაც სასჯელის სახედ და ზომად 9-დან 13 წლამდე თავისუფლების აღკვეთას ითვალისწინებს.

იხილეთ ასევე:

• პროკურატურამ სოფელ ატენში მომხდარ დანაშულში ბრალდებულ ორ პირს, რომელთაგან ერთი სამართალდამცველია, ბრალდება დაუმძიმა