"მე ამას აღარასდროს გავაკეთებ" - გადასაღებ მოედანზე ქეით უინსლეტს უთხრეს, რომ მუცლის ნაკეცები დაეფარა: ვარსკვლავის აღიარება და ნახევრადშიშველი ფოტოსესია
ჰოლივუდის ვარსკვლავი, ქეით უინსლეტი, ამბობს, რომ არ სურს სხეულზე არსებული "დეფექტები" დამალოს. ამის შესახებ Harper's Bazaar-თან ინტერვიუში ისაუბრა. გამოცემის ფოტოსესიისთვის კი მკერდმოშიშვლებულმა იპოზიორა.
- ვარსკვლავი მეორე მსოფლიო ომის ფოტოგრაფს და მოდელს, ლი მილერს თამაშობს ბიოგრაფიულ ფილმში, რომელიც ენტონი პენროუზის 1985 წლის ბიოგრაფიული წიგნის - "ლი მილერის ცხოვრება", ადაპტაციაა.
მსახიობის თქმით, გადასაღებ მოედანზე გადამღები ჯგუფის ერთ-ერთმა წევრმა შესთამაზა ისე დამჯდარიყო, რომ მუცელზე ნაკეცები არ გამოსჩენოდა.
- "არის მომენტი, სადაც ბიკინიში გამოწყობილი ლი სკამზე ზის... და გადაღებებს შორის გადამღები ჯგუფის ერთ-ერთი წევრი მოვიდა და თქვა: "შეგიძლია, უფრო სწორად დაჯდე რომ მუცლის ნაკეცები არ ჩანდეს?" - იხსენებს ქეითი და ამბობს, რომ მისი პასუხი იყო - "არავითარ შემთხვევაში".
მსახიობი განმარტავს, რომ არ აწუხებს ეკრანზე არასრულყოფილად თუ გამოჩნდება, - "პირიქით. მე ამაყი ვარ ამით, რადგან ჩემს სახეზე ჩემი ცხოვრებაა, და ეს მნიშვნელოვანია. აზრად ამის დაფარვა არც კი მომივიდოდა".
ვარსკვლავი მომავალ წელს 50 წლის იუბილეს აღნიშნავს, თავს ძალიან კომფორტულად გრძნობს როგორც სხეულის, ისე შინაგანი თავდაჯერებულობის გამო.
"უზარმაზარ შვებას ვგრძნობ იმის გამო, რომ ქალებს ადრინდელთან შედარებით, ახლა უფრო მეტი მიმღებლობა აქვთ საკუთარი თავის. მახსოვს დედაჩემი, რომელიც სარკეში იხედებოდა და ამბობდა: "ღმერთო ჩემო, ამას ვერ ჩავიცვამ, ბარძაყები მიჩანს? უკანალი დიდად ხომ არ მიჩანს?"
უამრავ დროს ვკარგავთ საკუთარი თავის დაკნინებაში და მე ამას აღარასდროს გავაკეთებ",- განაცხადა ვარსკვლავმა.