"ხაბიბმა პირადად მიიღო ზარები, ომის მხარდასაჭერ განცხადებას სთხოვდნენ, მაგრამ მან უგულებელყო" - როგორ და რატომ დასაჯა კრემლმა UFC-ის ჩემპიონი?
რუსეთის ოფიციალური პირების მიერ UFC-ის ყოფილი ჩემპიონის, ხაბიბ ნურმაგომედოვის საჯარო კრიტიკა შესაძლოა, უკრაინის ომთან დაკავშირებით მის პოზიციას უკავშირდებოდეს. აღნიშნულ თემასთან დაკავშირებით რუსულმა დამოუკიდებელმა მედია "პროექტმა" საგამოძიებო ვიდეო გამოაქვეყნა.
გამოძიების მიხედვით, რუსეთის უკრაინაში შეჭრის დაწყების შემდეგ, ნურმაგომედოვს დაურეკეს რუსეთის პრეზიდენტის ადმინისტრაციიდან და სთხოვეს გამოეთქვა მოსაზრება რუსეთის სასარგებლოდ და ომის მხარდამჭერი განცხადება გაეკეთებინა. ამის შესახებ სპორტსმენთან დაახლოებული წყარო ანონიმურობის დაცვის პირობით ჰყვება.
- წყაროს ცნობით, ნურმაგომედოვმა პირადად მიიღო ზარები პრეზიდენტის ადმინისტრაციის ხელმძღვანელის, ანტონ ვაინოსა და მისი პირველი მოადგილის, სერგეი კირიენკოსგან, მაგრამ სპორტსმენმა მათი მიმართვები უგულებელყო.
როგორც "პროექტის" ვიდეოშია აღნიშნული, ნურმაგომედოვს არასდროს გაუკეთებია კომენტარი რუსეთის უკრაინაში შეჭრაზე. მიმდინარე წლის ივნისის დასაწყისში ხაბიბი საჯაროდ ესაუბრა აშშ-ის პრეზიდენტობის კანდიდატს, დონალდ ტრამპს და საჯაროდ სთხოვა მას "შეაჩეროს ომი პალესტინაში. "ამ საუბარმა შესაძლოა კრემლში ხაბიბის მიმართ დამატებით უკმყოფილება გამოიწვია", - ამბობს ხაბიბთან დაახლოებული პირი.
მოგვიანებით, ტრამპა თქვა, რომ ხაბიბმა არასაჯაროდ სთხოვა მას, რომ ასევე მოეგვარებინა კონფლიქტი რუსეთსა და უკრაინას შორის.
- ტრამპთან საუბრის შემდეგ, ნურმაგომედოვი კრემლის ადამიანის უფლებათა საბჭომ გააკრიტიკა. საბჭოს წევრმა მარინა ახმედოვამ თქვა, რომ "ხაბიბს ახლა მხოლოდ პალესტინა აინტერესებს".
ნურმაგომედოვზე ზეწოლის ელემენტების და საჯარო კრიტიკის გარდა, შესაძლოა, კრემლს სპორტსმენთან ფინანსურ საკითხებზეც გაუჩნდა პრეტენზიები. თავდაპირველად, ნურმაგომედვის ვალების შესახებ პროკრემლისტური არხი ტელეგრამზე - "ბაზა" აქვეყნებდა ინფორმაციას, მოგვიანებით კი მისი შემოსავლებით რუსეთის ფინანსური პოლიცია დაინტერესდა. გამოძიების შემდეგ კი ფინანსურმა პოლიციამ განაცხადა, რომ ხაბიბს მრავალმილიონიანი დავალიანება აქვს.