"2000 სოფელი მოვიარეთ.. წიგნები, კომპიუტერები” გიორგი კეკელიძე უკვე "ბიბლუსთან" და "წიგნიერების გამავრცელებელ საზოგადოებასთან” ერთად აგრძელებს საქართველოს რეგიონებისთვის წიგნის და განათლების ხელმისაწვდომობის ზრდას და ხელშეწყობას

"ბიბლუსის" შემოქმედებითი დირექტორი, მწერალი გიორგი კეკელიძე წერს, რომ უკვე 2000 სოფელი მომარაგდა წიგნებითა და კომპიუტერებით. მისი ინფორმაციით, პროექტი ეკვილიბრიუმმა დაიწყო და ახლა "წიგნიერების გამავრცელებელი საზოგადოება" აგრძელებს, რომელიც "ბიბლუსმა" და გიორგი კეკელიძემ ერთობლივად 2024 წელს დააფუძნეს.

მისივე ინფორმაციით, სიახლეა ის, რომ სოფელ პიპილეთს პროექტის ფარგლებში ახალი ბიბლიოთეკა ექნება.

"2000 სოფელი მოვიარეთ. 2000. წიგნები. კომპიუტერები. ლექციები. პიპილეთი საიუბილეო აღმოჩნდა. ეს საქმე ჯერ "ეკვილიბრიუმით" დავიწყეთ და ახლა წიგნიერების გამავრცელებელი საზოგადოება აგრძელებს. სპეციალური მადლობა ჩვენს ელჩს, ნანა აროშიძეს, რომლის ძალისხმევითაც პიპილეთელ მოსწავლეებს ახალი ბიბლიოთეკა ექნებათ" - წერს კეკელიძე.

ცნობისთვის, 2024 წლის იანვარში “ბიბლუსმა” და გიორგი კეკელიძემ ერთობლივად დააფუძნეს "წიგნიერების გამავრცელებელი საზოგადოება". საზოგადოება ქართული ქალაქებისა და სოფლების სკოლებსა და ბიბლიოთეკებს წიგნებითა და კომპიუტერებით ამარაგებს, ასევე საზღვარგარეთ ქართული წიგნის კუთხეების მოწყობას, ლექცია-სემინარებს და სხვა საგანმანათლებლო პროექტებს ემსახურება.