"ღამის 02:00 საათი იყო, როდესაც...." - ცნობილი ხდება როგორ, რით და რა ვითარებაში მოკლეს "ჰამასის" პოლიტიკური ლიდერი
ცნობილი ხდება, რით მოკლეს "ჰამასის" პოლიტიკური ლიდერი, ისმაილ ჰანიე. როგორც საუდის არაბეთის გამოცემა Al Hadath წყაროებზე დაყრდნობით წერს, ჰანიე მოკლეს მართვადი რაკეტით თეირანში, როცა ის ომის ვეტერანთა რეზიდენციაში იმყოფებოდა.
რაკეტა შენობას ადგილობრივი დროით, დაახლოებით, ღამის 2:00 საათზე მოხვდა.
- Fars News, რომელიც დაკავშირებულია ირანის რევოლუციურ გვარდიასთან, ასევე ამბობს, რომ ჰანიე თეირანის ჩრდილოეთში რეზიდენციაში იმყოფებოდა და ის მოკლეს "ჰაერიდან წამოსული ჭურვით".
ცნობისთვის, ისმაილ ჰანიე თეირანში ირანის ახალი პრეზიდენტის ინაუგურაციაზე დასასწრებად იმყოფებოდა. ირანის ისლამური გვარდიის კორპუსის მიერ გავრცელებული განცხადებით, ჰანიეს მკვლელობასთან დაკავშირებით დაწყებულია გამოძიება. მათივე ცნობით, მოკლულია ჰანიეს დაცვის ერთ-ერთი წევრიც.
ისრაელის ოფიციალური პირები ბრალდებას ჯერჯერობით არ პასუხობენ და ოფიციალური განცხადება არავის გაუვრცელებია. ისრაელის თავდაცვის ძალებმა მედიას განუცხადეს, რომ ჰანიესთან დაკავშირებით მედიაში გავრცელებულ ინფორმაციაზე კომენტარს არ გააკეთებენ.