ტრამპმა პოლიტიკოსი, რომელიც მას "საძაგელს" უწოდებდა და ჰიტლერს ადარებდა, ვიცე-პრეზიდენტობის კანდიდატად დაასახელა - რა არის ცნობილი "ტრამპის მომთვინიერებელზე"
აშშ-ის ექსპრეზიდენტისა და პრეზიდენტობის კანდიდატის, დონალდ ტრამპის გადაწყვეტილებით, ვიცე-პრეზიდენტობის კანდიდატად სენატორი და მწერალი ჯეი დი ვანსი დასახელდა. ჯეი დი ვანსი ერთ დროს ცნობილი იყო, როგორც "ტრამპის მომთვინიერებელი".
საინტერესო ისაა, რომ წარსულში ის ტრამპისტად არ მოიაზრებოდა. 39 წლის ვანსი 2016 წლის მემუარებით - "ჰილბილის ელეგია", გახდა პოპულარული და საბოლოოდ, სენატორობამდე ტრამპის კეთილგანწყობა ეტაპობრივად მოიპოვა. სწორედ ამის შემდეგ გახდა ტრამპის ერთგული მიმდევარი და როგორც დღეს უწოდებენ, მისი მემკვიდრე.
- ოჯახი და წარსული
ვანსი მიდლთაუნში, ოჰაიოში, 1984 წლის 2 აგვისტოს დაიბადა და ბავშვობა კენტუკიში გაატარა. ის საზღვაო სამხედრო დანაყოფში 2003-დან 2007 წლამდე მსახურობდა, სანამ ოჰაიოს სახელმწიფო უნივერსიტეტსა და იელის სამართლის სკოლაში ჩააბარებდა. მოგვიანებით, ვანსი ვენჩურულ კაპიტალისტად მუშაობდა.
ვანსის მეუღლე, უშა, ასევე იელის სამართლის სკოლის კურსდამთავრებულია, რომელიც ადრე უზენაესი სასამართლოს მთავარ მოსამართლე ჯონ რობერტსთან და მოსამართლე ბრეტ კავანოსთან მუშაობდა. 2015 წელს ის ასოცირებულ პარტნიორად Munger, Tolles & Olson-ს შეუერთდა, სადაც "რთულ სამოქალაქო დავებსა და აპელაციებზე" მუშაობდა ისეთ სექტორებში, როგორიცაა უმაღლესი განათლება, ადგილობრივი მთავრობა, გართობა და ტექნოლოგია. ფირმის უახლესი განცხადებით, მან გადადგომის შესახებ განცხადება დაწერა.
უშა ვანსი სან დიეგოს გარეუბანში გაიზარდა და ის ინდოელი მიგრანტების ოჯახიდანაა. ვანსებს სამი პატარა შვილი ჰყავს: იუენი, ვივეკი და მირაბელი.
- “ჰილბილის ელეგია”
2016 წელს ჯეი დი ვანსმა გამოაქვეყნა თავისი ბესტსელერი წიგნი "ჰილბილის ელეგია", სადაც აღმოსავლეთ ოჰაიოს ღარიბ ინდუსტრიულ ქალაქში საკუთარ ბავშვობას აღწერდა და ამერიკის თეთრკანიან მუშათა კლასის ბრძოლას ასახავდა.
წიგნი 2020 წელს Netflix-ის ფილმად იქცა, სადაც მთავარ როლებში ეიმი ადამსი და გლენ კლოუზი მონაწილეობდნენ.
- ერთ დროს ტრამპის კრიტიკოსი
CNN KFile-მა გასულ თვეში განაცხადა, რომ ვანსმა 2016 და 2017 წლებში მოიწონა ტვიტები, რომლებიც ტრამპსა და მის პოლიტიკას მკაცრად აკრიტიკებდნენ - მათ შორის ერთი პოსტი, სადაც გამოთქმულია მოსაზრება, რომ ვანსს შეეძლო, ჰილარი კლინტონის ადმინისტრაციაში ემუშავა, თუკი ეს უკანასკნელი გაიმარჯვებდა.
ვანსი იწონებდა ისეთ პოსტებს, სადაც საუბარი იყო იმის შესახებ, რომ ტრამპმა ჩაიდინა "სერიული სექსუალური ძალადობა", სადაც ექსპრეზიდენტს უწოდებდნენ "აშშ-ის ერთ-ერთ ყველაზე საძულველ, ბოროტ, უსიამოვნო ცნობილ ადამიანს".
KFile-ის ცნობით, ვანსმა წაშალა ძველი, ანტი-ტრამპისტული ტვიტები 2021 წლის ივლისში იმის გამოცხადებამდე, რომ ის ოჰაიოს სენატის ვაკანტურ პოსტზე იყრიდა კენჭს. 2016 წელს გამოქვეყნებული ჰქონდა ტვიტი, სადაც ვანსმა დასვა კითხვა - იყო თუ არა ტრამპი "ამერიკის ჰიტლერი".
ვანსმა ასევე თქვა, რომ 2016 წელს კლინტონისთვის ხმის მიცემასაც კი განიხილავდა, მაგრამ როგორც საბოლოოდ განაცხადა, ხმას დამოუკიდებელ კანდიდატს, ივან მაკმალინს მისცემდა.
- სენატი
ოჰაიოს ახალბედა სენატორმა 2022 წლის არჩევნები მას შემდეგ მოიგო, რაც ტრამპის მხარდაჭერა მოიპოვა. მას ასევე პროტრამპისტული განწყობების მქონე ტექნოლოგიური მაგნატი, პიტერ თილი აფინანსებდა.
ვანსი კონგრესში უკრაინისთვის დახმარების გაწევის მკაცრი მოწინააღმდეგე იყო, ეწინააღმდეგებოდა კანონმდებლობას, რომელიც რუსეთის ომის ფონზე აშშ-დან უკრაინისთვის მეტი დახმარების გაგზავნას ითვალისწინებდა.
- ტრამპის ბოლოდროინდელი მხარდაჭერა
სენატში კანდიდატობისთვის ტრამპის მხარდაჭერის მოპოვების შემდეგ, ვანსი ყოფილი პრეზიდენტის ძლიერი მოკავშირე გახდა. სენატის კამპანიის დაწყებამდე, ვანსმა ბოდიში მოიხადა იმისთვის, რომ ადრე ტრამპს "საძაგელს" უწოდებდა.
"ბევრი ადამიანის მსგავსად, 2016 წელს ტრამპს მეც ვაკრიტიკებდი", - განუცხადა მან CNN-ს 2021 წელს, - "ვნანობ, რომ ამ კაცის შესახებ ვცდებოდი" და დაამატა, რომ მისი აზრით, ტრამპი კარგი პრეზიდენტი იყო.
ვანსი ტრამპის გვერდით იდგა ნიუ-იორკის სასამართლოში ყოფილი პრეზიდენტის სისხლის სამართლის საქმის განხილვისას.
ოჰაიოს სენატორმა მაისში CNN-თან ინტერვიუში ვალდებულება აიღო, რომ 2024 წლის არჩევნების შედეგებს მიიღებს, იმ პირობით, რომ ეს იქნება "თავისუფალი და სამართლიანი არჩევნები", გამარჯვებულის მიუხედავად. მან მაშინ ხაზი გაუსვა, რომ რესპუბლიკელებსა და დემოკრატებს უნდა ჰქონდეთ შესაძლებლობა, გააპროტესტონ არჩევნებთან დაკავშირებული ნებისმიერი საკითხი, როგორც ეს მოხდა წარსულში - მან 2000 და 2020 წლებზე მიუთითა. 2020 წლის არჩევნებში მასშტაბური თაღლითობის მტკიცებულება არ აღმოჩნდა.
შაბათს ტრამპის მკვლელობის მცდელობის შემდეგ, ვანსმა სოციალურ ქსელში დაწერა პოსტი, სადაც ნაწილობრივ ბაიდენის კამპანიას ადანაშაულებდა: "დღევანდელი დღე არ არის უბრალოდ ინციდენტი. ეს ბაიდენის კამპანიის ცენტრალური ნაწილია იმის შესახებ, რომ პრეზიდენტი დონალდ ტრამპი ავტორიტარული ფაშისტია, რომელიც ნებისმიერ ფასად უნდა იყოს შეჩერებული. ამ რიტორიკამ პირდაპირ გამოიწვია პრეზიდენტ ტრამპის მკვლელობის მცდელობა", - აღნიშნა მან.